2 Koronti 2

1Wan kì̵ lepan ndi̶ghi̶n putughup fi̶na nee, ba wann mbaaso pe wun ɗi kas, mpeku taji wan wat putughup nwun. 2Katɗang ɓe wan wat putughup nwun, ɓe a we ɗee ɗi a ɗi wurin nle retnyit nwan ye? A wun nyem ɗi wan wat putughup nwun, ɓe a wun ncaa nwan. 3A mpeemi̶ni, ɓe wan ran wasika ni nwun, mpeku katɗang wan j`i pe wun ɗi, ɓe taji wan kat mee mbii wat putughup mɓut nwun, nyem ɗi wu le retnyit nwan kas. Wan cínzeen nwun jir nee, retnyit fi̶na ni a muu jir zak. 4Wan ran wasika ni nwun a shi putughup ɗiiwuwat hakyeng, ki̶ shi yitmwaan, ki̶ jeel ɗes zak. Wan ran wasika ɗiisi, ba a mpeku wan wat putughup ɗi nwun kas, amma a mpeku wu man ɗi nee, wan wal nwun zam. 5Katɗang ɓe mee ngo kì̵ wat putughup mmee gurum, ɓe ba ngo mi̶ni wat a putughup mi̶na ɓejee ɗak kas, amma wuri wat a putughup muu, koo a putughup mu pak fuu mo. Ba ɗyen nwan nsatpo shiɓal nkaa ngo mi̶ni kas. 6Mpee kiyeet kì̵ ngo mi̶ni, ɓe kar ɗi wun kì̵ ten cín nwuri, ni mak. 7Amma yaksi, ɓe ngyal wu fwo ɗi ngwar mi̶ni, mpeku wu ɓam wuri ɗi, mpeku taji putughup ɗiiwuwat fi̶ri ni waa si̶ghi̶t daampee nwuri hakyeng. 8Mpeemi̶ni wan ɗang pe wun, wu si̶ghi̶t wu kám wal fuu mon nwuri. 9Gyet wan ran wasika ni nwun, a mpeku wan kyam wun ɗi, ku wan man ɗi nee, kyet wun a nyem c`in mbii mo, ndi̶ghi̶n ɗyen jir wa? 10Koo ngo ɗiiɗang ye ɗi wu fwo nwuri, mpee mee ɗiibish ɗi wuri c`in, ɓe wan nfwo ngo ni aasi zak. Katɗang ɓe mee mbii mu fwo ni ɗi, ɓe wan nfwo ngo mi̶ni a mpee wun, mpee ɗiiret kì̵ Kristi. 11Mpeku taji Shetan kat mee li̶ɓet ndi̶ghi̶n mun kas, mpeeɗi ba seen fi̶ri ɗiibish mo a ɗiisi̶sok mmun kas. 12Kaaɗi wan baaj`i nTrowas mpee satpo nkaa Kristi ngurum mo, ɓe wan kat Daa wuri kì̵ wang ar mpee wan. 13Jir ki̶si, ɓe ba putughup fi̶na ni kat retnyit kas, mpeeɗi ba wan kat ɗyemni̶ghi̶n fi̶na Titus ɗi mpeemi̶ni kas. Mpeemi̶ni ɓe gyet wan sat ɗang-mukaat mmo, ɓe wan ɗel so nyil Masidoniya. 14Wan pi̶lang Naan, ɗi a wurii sel mun shidaar-shidaar, ku mu ɗee ɗi a koghorong mo, mpee ɗiiret kì̵ Kristi. A shi mun, ɓe wuri pweer man kì̵ Kristi ɗi ni a kaa mbii ɗiiɗu shang-shang si, koo a mpee ɗiiɗang ye. 15Mpeeɗi pe Naan ɗi, ɓe mun a kaa ɗu ɗiishang mo, mu Kristi, mpee nyem ɗi mo kat ɓam, ki̶ nyem ɗi mo a ar lagham. 16A mu peekyes ni nɗiisi, ɗu ɗiivul ni a ɗu ɗii mu wam, mu muut ɗi nii so a peelagham. Amma a mu ɗin nshee ni nɗiisi, ni a fuwaap ɗiishang mu seen ɗi nii so a peeseen. A we mmak mang toghon kì̵ mbii ɗiisi mo ye? 17Mpeeɗi ba mun a kaa pak gurum ɗi moo satpo Naan ni a mpee kat li̶ɓet mu shaghal kas. Po munu ni a mi̶ndong, mbii ɗi Naan wuri sat mmun, ɓe muu sat a po mi̶ni ntoghom kì̵ Naan aasi, ndi̶ghi̶n Kristi.

will be added

X\