2 Koronti 13

1Wan ki̶n so pe wun ɗi, a ɗiikun nɗiisi. Mpeku mo man zeen ki̶ meepo azeen-nzeen, ɓe ni a ting ku mo kat langting mo vul koo kun. 2Wan ki̶n gwak a nyem ɗi gyet mo c`in shikbish yam, ki̶ kaghar ni mo jir zak. Gyet wan ki̶n gwak mo, ɓe ba wan ɗi ashak ki̶ mo kas. Wan gwak wun kaaɗi gyet wan gwak wun ndi̶ghi̶n po fi̶na ɗiivul pe wun ɗi si, nee, katɗang wan mbaaj`i, ɓe wan ncín kar nyem ɗi jí mo c`in shikbish si, ki̶ kaghar ni mo. 3Katɗang ɓe ɗyen nwun ku wu man azeen-nzeen nee, wan ki̶n satpo ɗiisi mo a shi iiko mu Kristi, ba ni ret ku wu man nee Kristi wuri ki̶ iiko ɗes. A wurin nkar wun, ki̶ a wurii kám iiko fi̶ri ndi̶ghi̶n wun. 4Mpeeɗi koo ɗi gyet mo pwas wuri nkaa shiyeep, ɓe gyet a wuri cín shin ni mo pwas nkaa shiyeep ni, ɓe jir ki̶si, ɓe wuri ɗi ki̶ seen shi iiko mu Naan. Mun a nyem ɗi ba mun ki̶ ɓal kas, amma ndi̶ghi̶n iiko mu Naan shi Kristi, ɓe mun ɗi ki̶ seen, mpeku mu ɓam wun ɗi. 5Wu kyamkáa fuu mo, ku wu man ɗi riret nee, kyet wuu mwaan a ndi̶ghi̶n cínzeen fuu ni mo wa? Wu kyamkáa fuu mo riret. Ba wu man nee, Jesu Kristi wurii tong a ndi̶ghi̶n wun kas aa? See koo katɗang wuu taa wu pal ki̶n ndi̶ng-ndi̶ng. 6Muu riɓet ku wu man nee, ba mun mu taa mu kat kas. 7Muu ɗang pu Naan ku taji wu c`in mee mbii ɗiibish kas. Muu ɗang pu Naan, ba a mpeku ni kám ɗi agaak ne, mun ki̶ se koghorong nkaa kyam ni kas, amma see a mpeku wun wu c`in mbii ɗiiret mo ɗi, koo ɗi wu naa kaa mun muu taa mu ki̶kat si. 8Mpeeɗi ba ni mmak c`in ku mu c`in mee mbii nkaa zeen ni kas, amma see muu sat a zeen ni. 9Muu kat retnyit, katɗang ba mun ki̶ ɓal kas, ki̶ wun ɗi ki̶ ɓal. Aduwa ɗi muu c`in ni a mpeku wu ɗee ɗi a ɗiigi̶gam. 10Mpeemi̶ni, ɓe wan ran wasika ɗiisi so wun ɓe ba wan ɗi ashak ki̶ wun kas, a shiɓal ɗi Naan wuri cín ni nwan mpee ɗik wun, ba ni a mpee shirip wun kas. 11Peekyes ki̶ ni, ɗyemnaa mo, ɗang mukaat. Wu ɗak mi̶se fuu mo. Wu ki̶lingpo fi̶na mo. Wu lappo ki̶ shak, ki̶ wu tongriyang ki̶ shak zak. Naan ɗi wuri a wal, ki̶ riyang, wurin ntong ashak ki̶ wun. 12Wu tok ki̶ shak shi wal riret. 13Nyem kì̵ Naan mo jir, moo tok ki̶ wun. 14Ɗiiret kì̵ Daa Jesu Kristi, ki̶ wal kì̵ Naan, ki̶ shaar ashak ki̶ Riin Ɗiiɓang, mo tong ashak ki̶ wun jir. Amin.

will be added

X\