2 Koronti 12

1Wan ncanjagham a ting, koo ɗi ba wan kat mee li̶ɓet ndi̶ghi̶n ni kas. Amma yaksi ɓe wan nsekiyeen ki̶ satpo nkaa sughun mo, ki̶ mbii ɗi Naan wuri woo mo nwan. 2Wan man mee gurum ndi̶ghi̶n Kristi ɗi gyet Naan mang wuri kàa ki̶ wuri ndi̶ghi̶n ɗengnaan ɗiikun. Ni wul a ɓit mo kaghapaat baafeer yaksi. Kyet, gyet Naan kàa ki̶ wuri a ndi̶ghi̶n nan mu yil ɗiisi aa? Ɓe ba wan man kas, amma Naan man. 3Wan man nee, mo mang gwar ni kàa ki̶ wuri a mparadayis. (Shii kì̵ mi̶ni a peeɗi Naan ɗi). Kyet a shi nan mu yil ɗiisi aa? Koo ba a shi shin mu yil ɗiisi kas aa? Ɓe ba wan man kas, amma Naan wuri man. 4Wuri ki̶ling mbii mo, ɗi ba mon mmak sat mo shi po kas, ki̶ mbii ɗi ba gurum mo mak sat shi li̶po kas zak. 5Wan ki̶n canjagham a shi gwar ɗiisi. Ba wan ki̶n canjagham a shi káa fi̶na kas. Amma wan ki̶n kám a ciin ɓal fi̶na agaak. 6Koo ɗi wan riɓet canjagham ni, ɓe ba wan ɗee a mwen kas, mpeeɗi wan ki̶n sat azeen. Amma ba wan canjagham kas, mpeku taji mee gurum lepan nkaa wan, waa met mbii ɗi wurii naa wan ki̶n c`in mo, ki̶ mbii ɗi wurii ki̶ling pu wan kas. 7Mpeku taji wan ɗiyeep káa fi̶na mpee sughun ɗiiɗes ɗiisi ɗi Naan kì̵ kám mo nwan kas. Amma mo le mee hi̶r ndi̶ghi̶n san fi̶na, ɗi ni ɗee a mee shwal pe wan ɗi, ngulop kì̵ Shetan wurii daampee nwan, mpeku taji wan canjagham ki̶ san fi̶na kas. 8Wan ki̶n ɗang pu Daa yit mo kun, mpeku wuri shang mbii ɗiisi ni baa ki̶ ni aku. 9Amma Daa wuri sat nwan nee, "Ɗiiret fi̶na ni mak wugha. Mpeeɗi a ndi̶ghi̶n ciin ɓal mu gurum, ɗangɓe mon naa gam ki̶ iiko fi̶na." Mpeemi̶ni ɓe wan si̶ghi̶t canjagham ndi̶ghi̶n ciin ɓal fi̶na ni. Mpeku iiko mu Kristi ni tong ɗi ndi̶ghi̶n wan. 10Aasi ɓe wan ki̶n kat retnyit ndi̶ghi̶n sum mu Kristi, mpee ciin ɓal fi̶na ni, ki̶ kàss ɗi moo c`in nwan, ki̶ mbii daampee mo, ki̶ jeel mo, ki̶ luk mo shini-shini, mpee Kristi. Mpeeɗi katɗang ba wan ki̶ ɓal kas, ɓe wuri cínɓal nwan. 11Wan ki̶n lesan ɗee a kaa mwen si, amma ɓe a wun wu le ku wan ɗee a mwen ni. Gyet ni ret ku a wun, wun nkwoop wan, mpeeɗi ba wan a ɗiikat met jir ndi̶ghi̶n jeplop ni mo kas, koo ɗi ba wan a mee mbii kas. 12Naan c`in mbii lukshik ki̶ mbii aapo mo, ki̶ ɗak ɗiinan-nan mo shi wan, kaaɗi wan gung mpee c`in ɗak fi̶na mo shidaar-shidaar. Ɗak mu mbii aapo ɗi mo kám agaak nee, wan a ngulop azeen-nzeen. 13Wan ki̶n c`in a me, kaghar Eki̶lisya ni mo ye? Ɗiiba wan ki̶n c`in mi̶ni nwun kas ye? Aa koo a mpee ɗi ba gyet wan le mee toghon nwun kas aa? Ɓe wu fwo ɗi nwan. 14Yaksi ɓe wan ki̶n ɗak san mpee so pe wun ɗi, ɓe a so ɗiikun pe wun ɗi mmi̶ni. Ba wan le ku wu kwat wan kas, mpeeɗi ba wan ki̶n tang a mee mbii pu wun ɗi kas, amma wan ki̶n tang a wuwun. Mpeeɗi ba a jep mon ntang mbii le mpee puun furu mo kas. Amma puun ni mon ntang mbii le mpee jep furu mo. 15Nin nret nwan nyit zam, mpeku wan cín mbii ɗi wan ki̶ ni jir, ki̶ san fi̶na zak, mpee ɓam wun. Wan wal nwun ɗes, amma ɓe wun wu wal nwan a lee ɗak aa? 16Wu man azeen nee, ba gyet wan lejeel wun kas. Amma mee gurum sat nee gyet wan si̶seen nkaa wun, ki̶ wan lecip mu numpee wun zak. 17Kyet wan ki̶n kyam seen a wun shi numpee mɓut nyem ɗi wan lop mo so pe wun ɗi wa? 18Gyet wan ɗang Titus, ku wuri so pe wun ɗi, ashak ki̶ ɗyemni̶ghi̶n funu ɗiisi. Kyet, gyet Titus wuri lap mee mbii pu wun ɗi wa? Ba a Riin kì̵ Naan ɗiimi̶ndong wuri sel mun weet kas aa? Ba mun weet muu c`in ɗak ni a ar ɗiimi̶ndong kas aa? 19Ashee, puji ɗi ɓe wuu pan ne, mu j`i aa mee mbii langkáa mpee sun funu pe wun ɗi wa? Waash. Muu sat a po mu Kristi ntoghom kì̵ Naan. Shaar fi̶na mo, mbii ɗi muu c`in mo jir, ɓe muu c`in mo a mpee ɓam wun. 20Mpeeɗi wan ki̶i̶r nee, meeɓe, katɗang wan so pe wun ɗi, ɓe wan nkat mi̶se fuu ni ɗik ki̶ mi̶se ɗi ɗyen nwan nkat wun ki̶ ni. Ki̶ zak, wun nnaa mi̶se mi̶na ni ɗik, ki̶ mi̶se ɗi ɗyen wun naa wan ki̶ ni. Meeɓe wan kat ɓi̶lep, ki̶ zughur, ki̶ tughup, ki̶ walnkáa, ki̶ ɗung ki̶ po ndagham-ndagham, ki̶ ɗiyeepkáa, ki̶ ciin tongriyang nnaar fuu. 21Wan ki̶i̶r nee, katɗang wan mbaa nso pe wun ɗi, ɓe ba Naan fi̶na wurin nsham ki̶ wan ntoghom fuu kas. Katɗang Naan sham ki̶ wan ntoghom fuu, ɓe wan nkat putughup ɗiiwuwat, ki̶ gurum mo ɗes ndi̶ghi̶n wun. Nyem ɗi gyet mo ki̶ c`in shikbish yam, ɗangɓe ba mo ki̶ tuwap kas mpee mi̶se ɗiibish, kaa c`in ngaa, ki̶ kyaghar mu c`in mbii ɗiibish mo zak.

will be added

X\