1 Timoti 6

1Wun ɗi wun a ki̶rom mo, ni ret ku wu cín ɗiiɗes nyemlu fuu mo, mpeku taji gurum mo satpo ɗiibuu nkaa sum kì̵ Naan, ki̶ nkaa kám funu ni kas. 2Wun ki̶rom ɗi nyemlu fuu mo a nyemso ndang Kristi mo, taji wu ɓák mo kas, amma wu cín ɗiiɗes mmo, mpeeɗi mo a ɗyemni̶ghi̶n fuu mo. Ni ret met, ku wu c`in ɗak mmo shi putughup mi̶ndong, mpeeɗi nyem ɗi wuu c`in ɗak mo ni, mo a nyemcínzeen mo, ɗi wu wal mmo zak. Ni ret ku wugha kám ki̶ satpo mmo nkaa mbii ɗiisi mo. 3Katɗang mee gurum c`in mee kám ɗi ɗik, ɗi ba ni ntiit-ntiit ki̶ kám mu Daa funu Jesu Kristi, ki̶ kám ɗi ni a mu ar so ndang Naan kas. 4Ɓe gwar mi̶ni ɗiyeepkáa, ki̶ zak, ba gwar mi̶ni man mee mbii kas koo diɓen. Gwar mi̶ni ki̶ pan ɗiibish mpee ɓeetshik ki̶ jighi̶r nkaa po mo. Kiyeet kì̵ ɓeetshik ɗiisi mo, moo j`i aa zughur ki̶ jighi̶r, ki̶ po ɗiibish mo, ki̶ ciin cínzeen nshak. 5Ki̶ ɓeetshik shidaar-shidaar, nnaar kì̵ nyem ɗi ba mo man zeen ni kas. Mo pan nee, so ndang Naan ni a mpeku gurum kat long mu yil ɗiisi ɗi. 6Azeen, so ndang Naan ni mak le gurum kat long, katɗang gurum wuri kat retnyit ki̶ mbii ɗi wuri ki̶ ni. 7Ba gyet mu j`i ki̶ mee mbii ndi̶ghi̶n yil ɗiisi kas, ki̶ zak, ba mun nkyam mang mee mbii mu put ki̶ ni ndi̶ghi̶n yil ɗiisi kas. 8Amma katɗang, mun ki̶ mbiise, ki̶ leelop, ɓe ni ret ku mu c`in retnyit ki̶ mi̶ni mo. 9Amma jir nyem ɗi moo riɓet ɗee a nyemlong mo, ɓe moo taa ndi̶ghi̶n jwaan, ki̶ cip mu pan ɗiibuu mo, ki̶ riɓet mbii ɗiibish mo. Mbii ɗiisi moo so ki̶ gurum mo har a peelagham ki̶ muut. 10Wal nshaghal, a ni a kuk kì̵ mbii ɗiibish mo jir. A mpee riɓet shaghal ɓe gurum mo ɗes, mo yit ar ɗi mu cínzeen ni, ki̶ mo wat putughup furu mo ɗi shi pan ɗiibish mo. 11Amma, wugha nguso ndang Naan, a yit mbii ɗiisi mo ɗi jir. Amma a leyit fugha a mpee c`in mbii ɗin ndi̶re mo, ki̶ ki̶i̶r Naan, ki̶ cínzeen, ki̶ wal. A gung ndi̶ghi̶n cínzeen fugha ni, a c`in mbii ndi̶ghi̶n ɗyen. 12A c`in lek ɗiiret ni, ɗi ni a mu cínzeen ni. A yaa seen ɗiiso ngaa-ngaa ni ɓal-ɓal, mpeeɗi gyet Naan wuri pet wugha a mpeemi̶ni, kaaɗi gyet wugha sat agaak nyit kì̵ gurum mo nee, wugha kì̵ cínzeen nKristi. 13Wan ɓal wugha kì̵ Naan ɗi wuri cín seen mbii mo jir, ki̶ Kristi Jesu, ɗi gyet wuri sat langting fi̶ri ntoghom kì̵ Pontiyus Pailet. 14Wan ki̶n sat shi ɓal nee, a tap Waar ɗiisi mo ndi̶re-ndi̶re, ba ashak ki̶ lerap nkaa mo, koo po ɗiibish kas, har parpuus ɗi Daa funu Jesu Kristi wurin mbaaj`i ndi̶ghi̶n yil ɗiisi. 15A Naan wurin nle ɗang Jesu Kristi wurin mbaaj`i ntiit-ntiit ki̶ gam kì̵ pee ni, ki̶ ɗiiret, ki̶ ngutap ki̶ mbii mo jir. Mishkagham ɗi wuri ɗes met mmishkagham mo jir, Daa ɗi wuri ɗes met daa mo jir. 16A wuri mmi̶shin ɓejee, ɗi ba wuri kyam muut kas. Wurii tong a ndi̶ghi̶n mee peeɓang ɗiiɗes, ɗi ba mee gurum kyam so kus ki̶ ni kas. Ba mee gurum kyam naa wuri kas, ki̶ zak, ba mee gurum mmak yaghal kyam naa wuri kas. Ɗiiɗes ki̶ ɓal ɗiiso ngaa-ngaa mo ɗee a mu wuri, amin. 17A sat nyem ɗi mo ki̶ long mu yil ɗiisi mo nee, taji mo ɗiyeepkáa furu mo kas, ki̶ taji mo leyit furu mo a nkaa long mu yil ɗiisi ni kas, mpeeɗi ba mon ntong ɗi vit ndi̶ghi̶n yil ɗiisi ni kas. Amma ni ret ku mo leyit furu mo a nkaa Naan, ɗi wuri cín mbii mo mmun jir nzughum, shi putughup mi̶ndong, mpeku mo kat shang ɗi. 18Ni ret ku mo c`in mbii ɗiiret mo, ku mo ɗee ɗi a nyemlong mo ndi̶ghi̶n ɗak ɗiiret mo. Mo cín zughum shi putughup mi̶ndong, ki̶ mo ɗee a nyemwal ngurum mo, ki̶ katpo ki̶ mo zak. 19Katɗang mo c`in mbii mi̶ni mo, ɓe mo a nkaa ɗik kuk ɗiiɓal zam mpee mbii ɗi moo j`i a kiyeen, mpeku mo kat seen ɗi ni azeen-nzeen ɗi. 20Timoti, a tap ki̶ mbii ɗi mo le mo nsar fugha ni. Taji a ɓàlkáa fugha ki̶ nyemkatpo ɗiibuu mo, koo ki̶ nyemɓeetshik, ɗi ba ni ki̶ koghop ni kas, mbii ɗi pak gurum moo pet a man, amma shi zeen, ɓe ba ni a man kas. 21Pak mo sat nee, wuɗun ki̶ man mi̶ni, amma mpee kiyeet ki̶ man ɗiisi ni, ɓe ar cínzeen ni lagham pak gurum mo ɗes. Ɗiiret kì̵ Naan ni tong ashak ki̶ wun. Amin.

will be added

X\