1 Timoti 5

1Taji a gwak ngunan shiɓal kas, amma a tap a fwang wuri kaaɗi wugha fwang puun fugha si. A tap ki̶ mish ɗiiɗween mo, kaa ɗyemni̶ghi̶n fugha mo si. 2A tap ki̶ ni̶ghi̶nmat mo kaa ni̶ghi̶n fugha mo si, ki̶ a tap ki̶ mat ɗiiɗween mo kaa ɗyemni̶ghi̶n fugha ɗiimat mo si, shi tong ɗiiɓang. 3A cín ɗiiɗes mmatkáa ɗi mon mmusut azeen-nzeen. 4Katɗang mee matkáa wura ki̶ jep mo, koo jep kì̵ làa fi̶ra mo, ɓe mbii ɗin nshee ni nɗiisi, a kám mmo, kám ɗii mu nyem so ndang Naan mo, kaa ɓam tulu furu, ki̶ ɓam puun furu mo, ki̶ puunkaam furu mo, mpeeɗi ɓam ɗiisi mo, mo shang nNaan nyit zam. 5Matkáa ɗi wura mmi̶sat azeen-nzeen, ɓe wura leyit fi̶ra a nkaa Naan, ki̶ wura sekiyeen ki̶ c`in aduwa ki̶ ɗang, par ki̶ puus, mpeku Naan ɓam wura ɗi. 6Amma matkáa ɗi wura cín sat fi̶ra mmish mo, ɓe wura ki̶ ɗee a ɗiimumuut, koo ɗi wura kuɗi ki̶ seen ndi̶ghi̶n yil ɗiisi. 7A kam-kam ɗiisi mmo, mpeku taji mee gurum kat mbii ɗiibish mpee sat ɗi nkaa mo kas. 8Amma katɗang mee gurum kwar ɓam nyem fi̶ri mo, met jir ni a nyemtulu fi̶ri mo, ɓe gwar mi̶ni cíipo cínzeen ni har ɓe wuri bish met ngo ɗi ba wuri cínzeen kas. 9Katɗang matkáa ɗi ba ɓit fi̶ra ni wul laarpeemee kas, ɓe taji a lesum fi̶ra ndi̶ghi̶n sum kì̵ matkáa mo kas. Ki̶ zak, ni a ting ku jí wura kì̵ c`in ɗik a yit mi̶ndong ɓejee ɗak. 10Ni ret ku, gurum moo kwoop wura mpee ɗak c`in fi̶ra ɗiiret mo. Matkáa ɗi wura kiyeer jep mo ndi̶ghi̶n ar ɗiiret, ki̶ wuraa lap mi̶zep mo. Wuraa vwang shii mu nyemso nɗang Naan mo, ki̶ wuraa ɓam nyem ɗi mo ndi̶ghi̶n jeel mo, ki̶ wura fes cínkáa fi̶ra mpee c`in ɗak ɗiiret mo ɓejee ɗak. 11Amma taji a ran sum ki̶ matkáa ɗiiɗween mo ndi̶ghi̶n takarda mu sum kì̵ matkáa mo kas, mpeeɗi katɗang kyaghar mu nan ni daampee mmo, ɓe mon nyit ɗak mu Kristi ɗi, mpeku mo c`in ɗik ɗi. 12Katɗang mo c`in ɗik, ɓe mo teppo ɗi mo kì̵ ten tuwoor ni nee, wuɗun nc`in a ɗak mu Kristi ɓejee. 13Ki̶ zak, mo kám tong buu, ki̶ sar ɗin fii, har mo mwaan so shilu-shilu mpee c`in mwaanaa, ki̶ tokpee. Moo sat mbii ɗi ba ni ret ku mo sat kas koo ɗiɓen. 14Mpeemi̶ni, ɓe wan ki̶n sat nee, ni ret ku matkáa ɗiiɗween mo c`in ɗik, ku mo làa-làa mo ɗi. Ki̶ mo tap ɗi ki̶ tulu furu mo, mpeku taji mo cínpee nshaarlek ku wuri katpo ɗiibish ɗi nkaa mun kas. 15Pak matkáa ni mo kì̵ ten ɗee a mu Shetan. 16Amma katɗang mee mat so ndang Naan, wura ki̶ matkáa mo ntulu fi̶ra, ɓe ni ret ku wura tap ki̶ mo. Taji wura le toghon kì̵ mo ni nkaa Eki̶lisya ni kas, mpeku Eki̶lisya ni katpee mpee ɓam matkáa ɗi mo a mmusut azeen-nzeen ɗi. 17Nyemnan ɗi moo tap ki̶ gurum mo ndi̶ghi̶n ar ɗiiret azeen-nzeen, ɓe ni ret ku wu cín ɗiiɗes mmo yit vul, met jir ni, a nyem ɗi ɗak furu ni a satpo kì̵ Naan ni, ki̶ nyemkám po kì̵ Naan ni mo zak. 18Mpeeɗi po kì̵ Naan ni sat nee, "Taji a dughur po nrandong, kaaɗi ni nkaa ti̶reng ɗiɓen kas." Ki̶ zak, "ni ret ku nguɗak wuri lap kwat fi̶ri." 19Taji a ki̶ling mee mwaanaa nkaa mee ngunan kas, see katɗang a ki̶ling ni a mpo kì̵ langting mo vul koo kun, akuɗang a ɓeetpo ni. 20A gwak nyem ɗi moo sat a nsekiyeen ndi̶ghi̶n shikbish nyit kì̵ gurum mo jir, mpeku ni ɗee a mbiikám ɗi nkaghar ni mo. 21Ndi̶ghi̶n sum kì̵ Naan ki̶ Kristi Jesu, ki̶ pe nyemlop kì̵ Naan ɗi wuri bi̶lip mo, wan ki̶n sat nee, a tap ki̶ Waar ɗiisi mo, ba ashak ki̶ shwatnyit kas. 22A bi̶lip shiimwaan kì̵ gurum ndi̶re-ndi̶re hakyeng, akuɗang aa lesar fugha nkaa wuri. Taji a lesar fugha ndi̶ghi̶n shikbish kì̵ mee gurum kas. A tap ki̶ káa fugha, ku a tong ɗi a ɗiiɓang. 23Taji a sat a nshwaa am ɗong ɗak kas, amma a shwaa rep am anab lee; mpee ɓut fugha, ki̶ mpee shwal ɗi nii naa nc`in wugha si. 24Shikbish kì̵ pak gurum mo ni agaak, har nii sekiyeen so a pee ɗiyeel, amma shikbish ki̶ pak mo, ɓe nii kàa put agaak aɓwoon. 25Ni aasi zak, ɓe ɗak ɗiiret mo agaak, ki̶ koo ɗi ba mo put agaak yaksi kas, ɓe lang ɗiilee ɓe mon mput agaak.

will be added

X\