1 Timoti 3

1Po ɗiisi ni azeen-nzeen nee, katɗang mee gurum ki̶ riɓet ɗee a bishop, ɓe gwar nii riɓet c`in a ɗak ɗiiret mmi̶ni hakyeng. 2Ni a ting ku bishop wuri ɗee a ngo ɗi ba gurum mon nki̶lak ki̶ katpo ɗiibuu nkaa wuri kas. Ni ret ku wuri a ngumat mi̶ndong ɓejee, ba a ngo ɗi wurin nki̶lak ki̶ langtughup kas. Ni ret ku wuri a ngo ɗi mi̶se fi̶ri ni ret, ngo ɗi gurum moo leyit nkaa wuri, ngukaat mi̶zep mo, ngukám ɗin ndi̶re. 3Ba a ngushwaa mwos kas, ba a nguki̶lak ki̶ lek kas, amma a ngo ɗi wurii c`in mbii mo ndi̶ghi̶n ɗyen, ba a ngo ɗiiki̶lak ki̶ c`in jighi̶r kas, ki̶ zak, ba a nguwal nshaghal kas. 4Ni a ting ku wuri man so ki̶ tulu fi̶ri ndi̶re-ndi̶re, ki̶ wurii kar jep fi̶ri mo ndi̶ghi̶n ar ɗiiret. 5Mpeeɗi katɗang ba gurum man so ki̶ tulu fi̶ri ndi̶re-ndi̶re kas, ɓe cirang ɗangɓe wurin mman tap ki̶ Eki̶lisya mu Naan ye? 6Ba ni ret ku wuri a ngo ɗi wuri tuwap a nteer ɗiisi mo kas, kasɓe wurin nyaa roghop, har wurin ntaa ndi̶ghi̶n jwaan kì̵ Shetan. 7Ki̶ zak, ni ret ku nyem ɗi ba mo a nyemso ndang Jesu mo kas, mo satpo ɗiiret nkaa wuri, kat ba ki̶si kas, ɓe mon ntoklong nwuri, ki̶ mon nsatpo ɗiibuu nkaa wuri, har meeɓe, wurin nyaghal taa ndi̶ghi̶n cip mu Shetan. 8Nyem ɗi mon nc`in ɓam ndi̶ghi̶n Eki̶lisya, ɓe ni a ting taji mo ɗee ntan kas, ki̶ ba a nyem ɗi moo satpo mo vul-vul kas. Ba a nyem ɗi mo ɗee a ki̶rom kì̵ mwos kas, ki̶ ba a nyemriɓet mbii mo mpee kat li̶ɓet kas. 9Ni a ting ku mo man jurung kì̵ zeen ɗi Naan wuri ten woo ni mmun agaak shi putughup mi̶ndong. 10Ni ret ku wu shee kyam mo aku, katɗang mɓwoon ɗi wuu kyam mo, ɗang wu naa mwaan furu ni mo ret, ɓe wu yit ku mo c`in ɗak kaa nyemɓam mo ndi̶ghi̶n Eki̶lisya ni. 11Ni aasi zak, taji mat mu nyem mi̶ni mo ɗee ntan kas. Taji mo wat sum ngurum kas, amma mo yaa sut ndi̶ghi̶n mbii mo jir, ki̶ mo ɗee a mat ɗin ndi̶re-ndi̶re mo ndi̶ghi̶n mbii mo jir. 12Ni a ting ku nyem ɗiisi ni mo, a nyem ɗi mo ki̶ mat a mi̶ndong-mi̶ndong, ki̶ zak, ni ret ku mo man so ki̶ tulu furu ki̶ jep furu mon ndi̶re-ndi̶re. 13Nyem ɗi mo c`in ɗak ɗi ni a mu ɓam ndi̶ghi̶n Eki̶lisya riret, ɓe mo le ku gurum mo ki̶ling mo, har ni cínpee mmo, mpeku mo satpo ɗi shiɓal nkaa cínzeen furu ndi̶ghi̶n Kristi Jesu. 14Wan ki̶n riɓet so pe wun ɗi ki̶lak, amma wan ki̶n ran mbii ɗiisi mo nwugha. 15Katɗang mee luk, taa yaa wan, ɓe wu man kiyeet kì̵ mwaan ɗi wun nc`in ndi̶ghi̶n lu kì̵ Naan, ɗi ni a Eki̶lisya mu Naan ɗi wurin mmeen, ɗi wuri a kuk mu ɓam ki̶ zeen. 16Ba mee gurum kyam cíipo kì̵ ɗiiɗes mu mbii ɗi ni a si̶sok ndi̶ghi̶n seyil nNaan kas: "Wuri j`i put ndi̶ghi̶n nan. Riin ni kám nee, wuri a ɗin ndi̶re. Nyemlop Naan mo naa wuri. Mo satpo nkaa wuri ndi̶ghi̶n yil mo shini-shini. Gurum mo ɗes mo cínzeen nwuri, ndi̶ghi̶n yil ni jir. Mo mang wuri kàa ki̶ wuri ndi̶ghi̶n ɗengnaan."

will be added

X\