1 Timoti 2

1Mbii ɗin nshee ni, ɓe wan sat nwugha nee, wu ɗang, ki̶ c`in aduwa, ki̶ pi̶lang Naan mpee gurum mo jir. 2Mpee mishkagham mo, ki̶ mpee nyem ɗiinan-nan mo jir, mpeku mu katpee tongriyang ɗi ndi̶ghi̶n seen ɗiisi jir, ki̶ ki̶i̶r Naan, ki̶ mwaan ɗin ndi̶re zak. 3Ɗiisi ni ret, ki̶ ni ɗee a mbii ɗiili̶lap nyit kì̵ Naan Nguɓam funu. 4Wuri ɗi wuri riɓet ku gurum mo jir mo kat ɓam, ki̶ mo man zeen ni ɗi zak. 5Mpeeɗi Naan wuri a mi̶ndong ɓejee, ki̶ nguar a mi̶ndong, nnaar kì̵ Naan ki̶ gurum mo ɓejee, gwar ɗiisi a Kristi Jesu. 6Ɗi wuri cín shin fi̶ri a koppee funu gurum jir. Langting ɗiisi ni tap j`i ntiit-ntiit ki̶ gam kì̵ pee ni. 7A mpee langting ɗiisi ni, ɓe Naan wuri bi̶lip wan, ki̶ wuri lop wan kaa laalop ki̶ ngukám pee nyem ɗi ba mo a nyem Yahudi mo kas si. Wan ki̶n sat ni azeen-nzeen, ba wan ki̶n sat a ɗung kas. Wan a ngukám mu nyem ɗi ba mo a nyem Yahudi mo kas ndi̶ghi̶n cínzeen ɗi ni azeen-nzeen. 8Wan ki̶n riɓet ku, katɗang wu kuur mpee seyil nNaan, ɓe wan riɓet ku mish mo c`in aduwa, mo ɗiyeep sar furu ɗiiɓang mo, ba ashak ki̶ tughup koo jighi̶r kas. 9Ki̶ zak, ni ret ku mat mo c`in jwat shi lee ɗiiret mo, ɗi mon mpaa sut furu mo ndi̶re-ndi̶re. Taji mo c`in jwat ni shi tepkáa ɗiiret mo, koo leejwat ɗii mu azurfa mo, koo loplee ɗiiki̶rim mo ɓejee kas. 10Amma ni ret ku ɗak furu ɗiiret mo, tap ɗee ɗi kaa mat so ndang Naan mo si. 11Ni ret ku mat kám mbii mo, wura ɗee a puɗok, ki̶ wura sham ki̶ kaa fi̶ra zak. 12Ba wan cínpee mmee mat ku wura kám, koo ɗee a ɗiiɗes nkaa mish mo kas, ni a ting wura ɗok titik. 13Gyet Naan shee ɗak a Adam, akuɗang wurii le Iif. 14Ki̶ zak, ba gyet mo num a Adam kas, amma gyet mo num a mat ni, har wura tep Waar kì̵ Naan, wura ɗee a mat shikbish. 15Amma wura kat ɓam a mpee làa ɗi wura làa mo, katɗang wura sekiyeen ndi̶ghi̶n cínzeen, ki̶ wal, ki̶ tong a ɗiiɓang ndi̶ghi̶n ɗyen ɗiiret.

will be added

X\