1 Ɗyemnaa mo, wun wu man shikáa fuu nee, j`i funu pe wun ɗi ba ni a buu kas. 2 Wu man kaaɗi mun kì̵ ten shwaajeel ki̶ fulup ndi̶ghi̶n yil nFilipi, akuɗang muu j`i pe wun ɗi nTasoloni. Koo ɗi gyet gurum mo ɗes mo kwar mun, amma Naan funu wuri cínɓal mmun mputughup, mpeku mu satpo fi̶ri ɗiiret ni ɗi nwun. 3 Po ɗi mu sat nwun ni, ba ni a ɗung koo pan ɗiibish kas. Ba gyet mu sat ni, a mpeku mu num a mee gurum ɗi kas. 4 Amma mpeeɗi Naan wuri kì̵ ten bi̶lip mun, ki̶ wuri kì̵ ten le po fi̶ri ni ndi̶ghi̶n sar funu. Muu c`in ku mu tong ɗyen ɗi a nNaan, ɗi wuri man putughup funu mo jir. Ba muu c`in ku mu tong ɗyen ɗi a ngurum kas. 5 Wu man nee, ba muu kyam j`i ki̶ mee po ɗiishang mmee gurum shi li̶po funu mo kas, mpeku mu num wun, ku mu kat shaghal ɗi pu wun kas. Naan wuri man ni aasi. 6 Ba muu kyam tang ɗiiɗes pe gurum mo ɗi kas, koo pu wun, koo pe nyemɗiici mo. Koo ɗi mun ki̶ pee mpee c`in ɗak ki̶ iiko funu kaa nyemlop kì̵ Kristi mo si. 7 Amma jir ki̶si, ɓe gyet muu fwang wun, a kaaɗi ni̶ghi̶n kwee wuraa fwang jep fi̶ra mo si. 8 Mpeeɗi mu wal nwun zam, har gyet muu riɓet mpeku mu cín seen funu mo mpee wun, ba a mpee po ɗiiret kì̵ Naan ɗi gyet mu sat nwun ɓejee kas. 9 Ɗyemnaa mo, taji wu mander nɗak ɗi gyet mun kì̵ c`in shiɓal pe wun kas. Gyet mun kì̵ c`in ɗak mpar ki̶ puus, mpeku taji mu lejeel nwun kas, nnaar ɗi gyet mun nkaa satpo ɗiiret mu Naan ni nwun. 10 Wun a langting funu, ki̶ Naan wuri man nee, mbii ɗi muu sat ni azeen zak. Gyet wu naa shi yit fuu, shiimwaan funu mo, kaaɗi gyet mun ashak ki̶ wun. Ɓe wu man nee, gyet mun a nyem ɗi sar funu mo, ki̶ shiimwaan funu mo a ɗin ndi̶re-ndi̶re, ba gyet mu c`in mee mbii ɗiibish nnaar fuu kas. 11 Wu man nee, mu tap ki̶ wun a kaaɗi puun ki̶ tap ki̶ jep fi̶ri mo si. 12 Muu caa wun, muu ɓam wun zak, ki̶ zak, mun kì̵ sat ni yit ɗes nee, ni ret ku wu mwaan a mwaan ɗi ni ret nNaan nyit. Naan ɗi wuri pi̶rep wun, mpeku wu ɗel ɗi ndi̶ghi̶n mulki fi̶ri, ki̶ mu tong ɗi ashak ki̶ wuri ndi̶ghi̶n ɗiiɗes fi̶ri. 13 Mee mbii ɗi nii le, ku mu pi̶lang Naan shidaar-shidaar zak, gyet mu shee satpo kì̵ Naan ni nwun, ɓe kaaɗi wu ki̶ling, ɓe wu lap ni, ba a kaa po kì̵ gurum si kas, amma wu lap ni a kaa po kì̵ Naan si, ɗi ni nkaa c`in ɗak ndi̶ghi̶n putughup fuu mo, wun nyem ɗi wu cínzeen. 14 Ɗyemnaa funu mo, wu mwaan ndi̶ghi̶n shiimwaan kì̵ nyemso ndang Naan ɗi mo a mu Kristi Jesu, ɗi mo ndi̶ghi̶n yil nJudiya. Wuu nshwaajeel nsar kì̵ nyemyil fuu mo, kaaɗi gyet mu shwaajeel nsar ki̶ nyem Yahudi mo si. 15 Gyet a nyem Yahudi ni mo tu Daa Jesu, ki̶ mo twa nyemsatpo kì̵ Naan mo. Mo ceen mun zak. Ba mbii ɗi mo c`in ni ret nNaan nyit kas koo diɓen. Ki̶ zak, mo a shaarlek kì̵ gurum mo jir. 16 Mpeeɗi moo tangpee, mpeku mo cíi satpo ɗiiret ni ɗi mmun, mpee nyem ɗi ba mo a nyem Yahudi mo kas, mpeku taji mumo kat seen ɗi zak. A ndi̶ghi̶n ar ɗiisi ɓe, mo gam shi ɓutbish furu ɗi moo naa nc`in ni, amma yaksi ɗiyeel kì̵ Naan nii taa nkaa mo jir. 17 Ɗyemnaa funu mo, kaaɗi gyet mu ɓàkshak ki̶ wun, mpee rep pee lee, yaksi ni daampee mmun, koo ɗi a yit funu mo ɓàkshak ɗak, ɓe putughup funu moo pan wun shidaar-shidaar. 18 Ɗyen mmun naa yit fuu mo zam. Muu fes mu riɓet baaso pe wun ɗi zam. Wan Pool, wan lepan fi̶na mpee baaso pe wun ɗi met nyitvul, amma Shetan ɗar ɗi a ar ni. 19 A me a mbii canciin funu, ki̶ retnyit funu, ɗi ni kám nee, muu se koghorong ye? A mpeku ni ret ɗi mmun nyit kì̵ Daa funu Jesu, parpuus ɗi wurin mbaaj`i? Ba a wun kas aa? 20 A wun a nyem ɗi wu le ku mu kat retnyit ki̶ nin nshang mmun parpuus ɗi mun nnaa Jesu Kristi.
