1 Pita 3

1Wuwun mat mo, ni ret ku wu sham ki̶ káa fuu mo nder kì̵ mish fuu mo, mpeku katɗang mee mish ɗi ba wuri cínzeen po kì̵ Naan kas, meeɓe wurin ntuwap, ku wuri cínzeen ɗi po kì̵ Naan, mpeeɗi mwaan kì̵ mat ni a ɗiiret, koo ɗi ba mat ni wuraa satpo Naan mmish ni shi po kas. 2Mpeeɗi mish fuu moo leyit, ku mo naa mwaan fuu mo ɗi, kyet mwaan fuu ni mo a ɗiiret aa, koo a ɗiibish ye. Ki̶ zak, moo naa kyet wuu c`in mbii ɗi Naan wuri sat ne wu c`in aa, koo wuu c`in kas ye? 3Taji wu ɗee wu pan a nkaa ar ɗi wun nlop lée mo nkaa suk fuu mo shidaar-shidaar kas, shii kì̵ mi̶ni, wu ɗee mpan jwat, kaa tepkáa, ki̶ lop mbiikom, ki̶ lop mbiitook mu zinariya mo si. Ki̶ zak, lop lée ɗiiki̶rim mo nkaa suk fuu mo. 4Amma wu yit ku ret fuu, ni put a ndi̶ghi̶n putughup fuu mo shidaar-shidaar. Wu gung mbii mo, ki̶ wu sham ki̶ káa fuu mo zak. Mpeeɗi kiyeet kì̵ ret mi̶ni, nii koghop ni zam pu Naan ɗi, kaa mbii ɗiiret si. 5Wu c`in pan nkaa mat ɗiiyam-yam mo, ɗi gyet moo leyit furu a nkaa Naan. Gyet shiimwaan furu mo, ni le ku mo ɗee a mat ɗi ret mo, mpeeɗi mo sham ki̶ káa furu mo nder kì̵ mish furu mo. 6Seera, wura ɗee a mee mbiikám. Gyet wuraa mwaan ndi̶ghi̶n ar mwaan ɗiiret, har wuraa pet Abraham a Daa fi̶ɗa. Katɗang wun wu mwaan ndi̶ghi̶n shiimwaan fi̶ra, ɓe wun a jep fi̶ra mo azeen. Wu gung. Taji wu riɓet ku mee mbii le ki̶i̶rmuut nwun kas. 7Wuwun mish mo, ni ret ku wu tong ki̶ mat fuu mo ndi̶ghi̶n ar ɗi ni ret, mpeeɗi wu man nee, ba mat mo ki̶ ɓal a kaa mish mo si kas. Mpeemi̶ni wu cín ɗiiɗes mmo, mpeeɗi wun ki̶ mo, wun ashak. Wun nkaa tap ki̶ seen ɗi Naan wuri cín nwun nzughum. Katɗang wu c`in mbii mo a ndi̶ghi̶n ar ɗiiret ɗiisi, ɓe ba mee mbii mmak le ku aduwa fuu mo ɗee a buu kas. 8Po fi̶na ɗii mu kyes nin nɗiisi, ni ret ku po fuu mo ɗee a ɗiimi̶ndong, ki̶ zak, wu naajeel ki̶ shak, wu walnshak, nyemso ndang Jesu mo, mpeeɗi wun a ɗyemni̶ghi̶nshak mo ndi̶ghi̶n Kristi. Wu fwangshak, ki̶ wu sham ki̶ káa fuu mo. 9Katɗang mee gurum c`in mbii ɗiibish nwun, ɓe taji wu kwat mi̶ni shi mbii ɗiibish zak kas. Katɗang mee ngo satpo ɗiibish nkaa wun, ɓe taji wu fulup gwar mi̶ni kas, amma ni ret ku wu le ɗiiret nkaa nyem mi̶ni mo, mpeeɗi mbii ɗi ni le ɗangɓe Naan wuri pi̶rep wun, ku wu ɗee a nyem fi̶ri mo, a mpeku wuri le ɗiiret ɗi nkaa wun. 10Mo kì̵ ran ndi̶ghi̶n takarda kì̵ Naan nee: "Katɗang mee ngo ki̶ riɓet tong shang-shang ndi̶ghi̶n seen ɗiiret, ɓe taji gwar mi̶ni kuɗi kì̵ katpo ɗiibish kas. Taji gwar mi̶ni c`in ɗung kas. 11Ni a ting, ɓe gwar mi̶ni yit c`in mbii ɗiibish mo jir. Amma ni ret ku gwar mi̶ni c`in a mbii ɗiiret mo ɓejee ɗak. Ni ret ku wuri sat a ntang tongriyang har wuri kat ni zak, mpeku wuri kat tongriyang ɗi pu Naan. 12Naan wurii tap ki̶ nyem ɗi moo c`in mbii ɗiiret mo, shidaar-shidaar, ki̶ Naan wurii ki̶ling aduwa furu mo. Amma nyem ɗi moo c`in mbii ɗiibish mo, ɓe Naan wurii kwar mo." 13Katɗang wun nkaa gung, mpee c`in mbii ɗiiret mo, ɓe a we mmak tuwaas wun ki̶ mbii ɗiibish ye? 14Amma katɗang wuu shwaajeel a mpeeɗi wuu c`in mbii ɗiiret, ɓe Naan wurin nle ɗiiret nkaa wun, mpeemi̶ni ɓe, taji wu ki̶i̶r nyem ɗi moo riɓet c`in mbii ɗiibish nwun kas. Taji wu an suk kas. 15Amma ni ret ku wu leyit a nkaa Kristi ɓejee. Wu yit ku wuri ɗee a mishkagham ndi̶ghi̶n putughup fuu mo, ki̶ ndi̶ghi̶n mbii ɗi wuu c`in mo jir. Wu tong shi ɗak suk, koo a pi̶rang ye, mpeku wu man mbii ɗi wun nsat ɗi. 16Wu sham ki̶ káa fuu mo nder kì̵ nyem ɗi moo c`in tal ɗiisi mo pe wun ɗi, ki̶ zak, wu c`in mbii ɗi wu naa ni ret ndi̶ghi̶n putughup fuu mo shidaar-shidaar. Mpeku katɗang gurum mo katpo ɗiibish nkaa mi̶se fuu ɗiiret mu nyemso ndang Jesu Kristi, ɓe yitluwaan yaa mo ɗi. 17Ni ret met mpeku gurum shwaajeel mpee c`in mbii ɗiiret, katɗang ni a shi riɓet kì̵ Naan, ni ret met nɗi gurum nshwaajeel a mpee ɗiibish ɗi wuri kì̵ c`in. 18Daa Jesu Kristi wuri shwaajeel a mpee shikbish funu mo yit mi̶ndong, ɓe wuri kyes ɗak mu vwang shikbish funu mo. Yit mi̶ndong ɓe ngo ɗin ndi̶re wuri muut mpee mun nyemshikbish mo, mpeku wuri j`i ki̶ mun ɗi kus ki̶ Naan. Gyet gurum mo tu wuri ndi̶ghi̶n nan, amma Naan le ku wuri yaghal a peemúut ki̶ seen. 19Kaaɗi Jesu wuri kuɗi ndi̶ghi̶n iiko mu riin fi̶ri, ɓe wuri so satpo Naan nriin ɗi mo a shishaghat, ɗi mo a peemúut mo. 20Riin ɗiisi mo a riin ɗi gyet mo kwar ki̶lingpo kì̵ Naan, kaaɗi gyet Nowa nkaa ɗak jirgi am ɗiiɗes. Jir ki̶si ɓe gyet Naan wurii sat a ngung ki̶ mo ɗak. Gyet mmi̶ni, ɓe gurum mo a kong ɓejee ɗak, ɗi mo ndi̶ghi̶n jirgi ni, har ba am tu mo kas. Gyet gurum ni mo a pokun ɓejee. 21Am ɗi gyet mo ɗel ndi̶ghi̶n ni, ni ɗee a koppee kì̵ baptisma. Mo ɓam wun mɓut shikbish fuu mo, a mpee baptisma, mpeeɗi gyet Daa Jesu Kristi wuri yaghal a peemúut. Sughup ɗi gyet mo sughup wun, kaaɗi gyet mo c`in baptisma nwun si, ba ni a mpeku wuri vwang putughup fuu mo ɗee ɗi a ɗiiɓang ɓejee kas. A mpee yaghal kì̵ Daa Jesu Kristi a peemúut, ɗang wu kat ɓam ndi̶ghi̶n shikbish fuu mo. 22Daa Jesu wuri kì̵ ten kàa ndi̶ghi̶n ɗengnaan. Yaksi ɓe wurii tong a nsarse kì̵ Naan. Wuri a mishkagham nkaa nyemlop kì̵ Naan mo, ki̶ mbii mo jir ɗi moo iiko.

will be added

X\