1 Joon 5

1Koo ngo ɗiiɗang ye ɗi wuri cínzeen nee, Jesu wuri a Kristi ɗi Naan lop, ɓe ngo mi̶ni a gwar kì̵ Naan, ki̶ koo ngo ɗiiɗang ye ɗi wuri wal mpuun, ɓe ngo mi̶ni wal nLàa ni zak. 2Katɗang mu wal nNaan ki̶ mu tap waar fi̶ri mo, ɓe mu man nee, muu wal nyem kì̵ Naan mo zak. 3A wal funu ni pe Naan nɗiisi, mu tap ki̶ waar fi̶ri mo. Ba waar kì̵ Naan ni mo met mmun mɓal kas, 4mpeeɗi koo a ngo kì̵ Naan ɗiiɗang ye, wurii mak se koghorong nkaa yil ɗiisi ni. Muu se koghorong nkaa yil ɗiisi ni, a mpeeɗi mu cínzeen nNaan. 5A we mak se koghorong nkaa yil ni ye? See a ngo ɗi wuri cínzeen nee, Jesu wuri a Làa kì̵ Naan. 6Jesu Kristi wuri a ngo ɗi gyet wuri j`i, ɓe mo c`in baptisma wuri shi am, ki̶ gyet wuri ɓeer toghom fi̶ri, kaaɗi gyet mo pwas wuri nkaa shiyeepyoghom si. Ba gyet mo c`in baptisma wuri a shi am ɓejee ɗak kas. Amma gyet wuri ɓeer toghom fi̶ri, 7ki̶ Riin Ɗiiɓang wuri a langting kì̵ mi̶ni, ki̶ zak, Riin Ɗiiɓang wuri azeen. 8Langting mo ɗi kun, Riin, ki̶ am, ki̶ toghom mo jir kun mo c`in langting a nkaa mbii ɗiimi̶ndong. 9Muu lap langting ɗi gurum mo sat, amma langting kì̵ Naan ni nɗiisi. Naan wuri c`in langting nee, "Jesu Kristi wuri a Làa fi̶ri" 10Mpeemi̶ni; koo a weye ɗi wuri cínzeen nLàa kì̵ Naan, ɓe gwar mi̶ni ki̶ langting kì̵ Naan ndi̶ghi̶n putughup fi̶ri. Amma ngo ɗi ba wuri cínzeen nNaan kas, ɓe gwar mi̶ni le Naan a nguɗung, mpeeɗi ba gwar mi̶ni ncínzeen ndi̶ghi̶n langting ɗi Naan c`in nkaa Làa fi̶ri kas. 11A langting ni nɗiisi, nee, Naan wuri cín seen ɗiiso ngaa-ngaa mmun, seen ɗiisi ni a ndi̶ghi̶n Làa fi̶ri. 12Ngo ɗi wuri ki̶ Làa kì̵ Naan, ɓe ngo mi̶ni ki̶ seen, amma ngo ɗi ba wuri ki̶ Làa kì̵ Naan kas, ɓe ba ngo mi̶ni ki̶ seen kas. 13Wan ran po ɗiisi mo nwun, a mpeku wu man ɗi nee, wun ɗi wu cínzeen nLàa kì̵ Naan, ɓe wu kat seen ɗiiso ngaa-ngaa. 14Ba mun ki̶ mee naashoop ntoghom kì̵ Naan kas, mpeeɗi mu cínzeen nee, wurii ki̶ling mun, katɗang mu ɗang mee mbii pu wuri, ɗi nin ntiit-ntiit ki̶ ɗyen fi̶ri. 15Katɗang mu man nee, wurii ki̶ling mun, ndi̶ghi̶n koo meye ɗi mu ɗang pu wuri, ɓe mu man nee, wuri kì̵ ten c`in mun mbii ɗi mu ɗang pu wuri ni. 16Katɗang mee ngo naa mee ɗyemni̶ghi̶n nkaa c`in mee shikbish ɗi ba nin nso ki̶ wuri a peemúut kas, ɓe gwar mi̶ni c`in aduwa nNaan, mpeku Naan cín seen ɗi ngo ɗi wuri kì̵ ten c`in shikbish ni. Muu sat ɗiisi ni a mpee shikbish ɗi ba ni wul ki̶ mo a peemúut kas. Mee shikbish ni ɗi, ɗi nin nso ki̶ gurum a peemúut, ba wan ki̶n sat nee, ɗi mee gurum nc`in aduwa a mpee mi̶ni kas. 17Ɗak ɗiibish mo jir a shikbish, amma mee shikbish ɗi, ɗi ba ni mak so ki̶ gurum a peemúut kas. 18Mu man nee, ngo ɗi wuri a gwar kì̵ Naan, ba wurin nsat a nc`in shikbish vit kas. Mpeeɗi Jesu Làa kì̵ Naan wurii tap fwang ngo mi̶ni, ki̶ ba Shetan mak cínjeel wuri kas. 19Mu man nee, mun a mu Naan, koo ɗi yil ɗiisi ni a nder kì̵ Shetan. 20Mu man nee, Làa kì̵ Naan wuri kì̵ ten j`i, ki̶ wuri jí cín man mmun zak, mpeku mu man Naan ɗi wuri azeen ɗi. Mun a ndi̶ghi̶n wuri, ɗi wuri azeen, ndi̶ghi̶n Làa fi̶ri Jesu Kristi. A wuri a Naan ɗi azeen, ki̶ seen ɗiiso ngaa-ngaa. 21Jep ɗiiɗween mo, taji wu ɓàlkáa fuu mo ashak ki̶ k`um kas.

will be added

X\