1 Joon 4

1Wun ɗi wan wal nwun, taji wu cínzeen koo a riin ɗiiɗang ye kas, amma wu kyam riin ni mo, ku wu man ɗi nee, kyet mo a mu Naan wa? Koo mo a mu Shetan ye? Mpeeɗi nyemsatpo kì̵ Naan mu ɗung mo ɗi, koo pee ɗiiɗang ye. 2Wun mman Riin ɗi ni a mu Naan ndi̶ghi̶n ar ɗiisi, koo a riin ɗiiɗang ye ɗi ni sat nee. Gyet Jesu Kristi wuri j`i ndi̶ghi̶n yil ɗiisi a ndi̶ghi̶n nan, ɓe riin mi̶ni a Riin kì̵ Naan. 3Amma koo riin ɗiiɗang ye, ɗi ni cíipo nee, ba gyet Jesu Kristi wuri j`i ndi̶ghi̶n yil ɗiisi ni a ndi̶ghi̶n nan kas, ɓe ba riin mi̶ni a mu Naan kas. Riin mi̶ni a riin ɗi nii kwar Kristi; ɗi jí wu ki̶ling ne, nin nɗung j`i. Amma yaksi ni kì̵ ten j`i wul ndi̶ghi̶n yil ni jee. 4Jep fi̶na ɗiiɗween mo, wun a mu Naan, wun kì̵ se koghorong nkaa riin ɗi mo kwar Jesu Kristi, mpeeɗi Riin kì̵ Naan ɗi ni ndi̶ghi̶n wun, ni ɓal met nriin ɗi mo kwar Jesu Kristi, ɗi mo ɗi ndi̶ghi̶n yil ni. 5Mo a mu yil ɗiisi, mpeemi̶ni, ɓe mbii ɗi moo sat jir, ni a mu yil ɗiisi, ki̶ yil ɗiisi nii ki̶ling mo. 6Amma wuwun, a mu Naan, koo a weye ɗi wuri man Naan, ɓe wurii lekom mpee ki̶ling mun. Ngo ɗi ba wuri man Naan kas, ɓe ba wurin nlekom mpee ki̶ling mun kas. A shi ɗiisi, ɗangɓe mu man riin ɗi ni azeen ki̶ riin ɗi ni a mu ɗung. 7Wun ɗi wan wal nwun, wu yit ku mu walnshak, mpeeɗi wal ni put a pe Naan ɗi. Koo weye ɗi wuri wal ngurum mo, ɓe wuri a ngo kì̵ Naan, ki̶ wuri man Naan zak. 8Ngo ɗi ba wuri wal ngurum mo kas, ɓe ba ngo mi̶ni man Naan kas, mpeeɗi Naan wuri a wal. 9Naan wuri kám wal fi̶ri ni mmun, a ndi̶ghi̶n ar ɗiisi. Wuri lop Làa fi̶ri ɗiimi̶ndong sham ndi̶ghi̶n yil ɗiisi, mpeku mu kat seen ɗi ndi̶ghi̶n sum fi̶ri. 10A wal ni nɗiisi nee, ba a mun shee wal nNaan kas, amma a Naan wuri shee wal mmun, har wuri lop Làa fi̶ri sham ndi̶ghi̶n yil ɗiisi, mpeku wuri ɗee ɗi a ar ɗi Naan nfwo shikbish funu mo ɗi mmun. 11Wun ɗi wan wal nwun, katɗang Naan wuri fes wal mmun aasi, ɓe ni ret ku mu walnshak aasi zak. 12Ba mee gurum kì̵ kyam naa Naan kas, amma katɗang mu walnshak, ɓe Naan ki̶ tong ndi̶ghi̶n mun, ki̶ wal fi̶ri ni ɗee a ɗin ndi̶re ndi̶ghi̶n mun zak. 13Mpeeɗi Naan wuri kì̵ cín Riin fi̶ri mmun, ɓe yaksi mu man nee, muu tong a ndi̶ghi̶n wuri zak. 14Ki̶ zak, muu ten mu naa, ki̶ mu c`in langting ni nee, puun wuri kì̵ ten lop Làa fi̶ri sham, ku wuri ɗee ɗi a Nguɓam mu yil ɗiisi. 15Koo a weye ɗi wuri wangpo ku wuri sat ɗi nee, Jesu a Làa kì̵ Naan, ɓe Naan ndi̶ghi̶n ngo mi̶ni, ki̶ ngo mi̶ni ndi̶ghi̶n Naan zak. 16Mun shikáa funu mu man, ki̶ mu cínzeen nwal ɗi Naan wuri ki̶ ni mpee mun. Naan wuri a wal, koo a weye ɗi wurii mwaan a ndi̶ghi̶n wal fi̶ri shidaar-shidaar, ɓe gwar mi̶nii tong a ndi̶ghi̶n Naan, ki̶ Naan ki̶ tong ndi̶ghi̶n putughup kì̵ gwar mi̶ni zak. 17Wal ni ɗee ndi̶ghi̶n mun, a mpeku taji mu kat naashoop parpuus tokɗiyeel ni kas, mpeeɗi muu mwaan a ndi̶ghi̶n shiimwaan kì̵ Daa Jesu ndi̶ghi̶n yil ɗiisi. 18Ba mee ki̶i̶rmuut ɗi ndi̶ghi̶n wal kas. Wal ɗi ni azeen, nii ceen ki̶i̶rmuut jir. Ki̶i̶rmuut ki̶ j`i, a mpee kwat ɗiibish, mpee mbii ɗiibish ɗi gurum kì̵ c`in. Ngo ɗi wuri ki̶i̶rmuut, ɓe ba wal ni ɗar ndi̶re-ndi̶re ndi̶ghi̶n wuri kas. 19Muu wal Naan, a mpeeɗi Naan wuri shee wal mmun. 20Katɗang mee gurum sat nee, wuɗi wal nNaan, amma wurii kwar ɗyemni̶ghi̶n fi̶ri, ɓe gwar mi̶ni a nguɗung. Mpeeɗi katɗang ba gurum wal nɗyemni̶ghi̶n fi̶ri, ɗi wurii naa shi yit shidaar-shidaar kas, ɓe ba gwar mi̶ni mmak wal nNaan, ɗi ba wuri kì̵ kyam naa wuri kas. 21A Waar ɗi mu lap pe Naan ɗi nɗiisi, nee gwar ɗi wuri wal nNaan, ɓe ni a ting ku gwar mi̶ni wal nɗyemni̶ghi̶n fi̶ri zak.

will be added

X\