1 Koronti 6

1Katɗang memee ndi̶ghi̶n wun ki̶ mee po nkaa ɗyemni̶ghi̶n fi̶ri, ɓe wu naa ni ret ku wuri mang po ni, so ki̶ ni ntoghom ki̶ nguɗiyeel ɗi ba wuri a ngucínzeen kas aa? Ba ni ret ku a nyem kì̵ Naan mo ɓeetpo mi̶ni kas aa? 2Ba wu man nee, a nyem Jesu mon ntokɗiyeel nyil ni kas aa? Katɗang a wun nyaghal wu tokɗiyeel nyil ni, ɓe baa, wu mak ɓeet rep jep po ɗiilee-lee mo kas aa? 3Ba wu man nee, parmeeci ɓe a mun ntokɗiyeel nyemlop kì̵ Naan mo kas aa? Katɗang ni aasi, ɓe a me le ɗang ba mu mak ɓeet ɗiyeel ɗii mu yil ɗiisi kas ye? 4Katɗang wun ki̶ ɗiyeel mo, ɓe a me le ɗang wuu so ki̶ ɗiyeel ni a ntoghom ki̶ nyem ɗi ba mo a mee mbii pe Eki̶lisya mo ɗi kas ye? 5Wan sat ɗiisi ni a mpeku ni shoop wun ɗi. A ni le ɗang ki̶n sat nwun nee, ba wun ki̶ mee gurum ɗiiseen ndi̶ghi̶n wun, ɗi wurin mmak ɓeet ɗiyeel mi̶ni mo nwun nyemso ndang Jesu mo kas aa? 6Kyet ni ret ku nguso ndang Jesu mang ɗyemni̶ghi̶n fi̶ri ngu so ndang Jesu zak, so ki̶ wuri nluɗiyeel, mpeku wuri ɗar ɗi ntoghom kì̵ nguɗiyeel ɗi ba wuri a ngucínzeen kas wa? 7Katɗang wuu mangshak wu so ki̶ ni nluɗiyeel, ɓe ni kám nee, wuu taa wu ɗee ki̶n ndi̶ng-ndi̶ng mmi̶ni. Gyal ɗeesi ɓe wu yit ku ɗyemni̶ghi̶n fuu mo wat putughup wun met aku ɗi wun so ki̶ shak nluɗiyeel. Gyal ɗee si ɓe wu yit ku mo seen a wun kas aa? 8Amma wun shikáa fuu, wuu wat putughup nshak, ki̶ wuu seen ashak zak. Koo ɗi wun a ɗyemni̶ghi̶n ɗiimi̶ndong ndi̶ghi̶n Kristi. 9Ba wu man kas aa? Nee, ba nyemɗiibish mon nɗel mmulki kì̵ Daa Naan kas. Taji wu numkáa fuu kas. Ba nyemc`in mbii ɗiibish mo, koo nyemseyil nk`um mo, koo nyemc`in ngaa mo, koo mish ɗi moo teer ki̶ shak, koo mat ɗi moo teer ki̶shak, koo wat mo, koo nyemriɓet mbii mo, koo nyemshwaa mwos mo, koo nyemsatpo ɗiibish nkaa gurum mo. Koo nyemseen aki̶ gurum mo. 10Ba mon mmak ɗel ndi̶ghi̶n mulki kì̵ Naan kas. 11Gyet yam ɓe pak fuu mo kì̵ c`in mbii ɗiisi mo, amma mo kì̵ vwang wun mɓut shikbish. Yaksi mo kì̵ le ku wu ɗee a nyem kì̵ Naan. Yaksi ɓe Daa Jesu Kristi, ki̶ Riin kì̵ Naan funu, wuri ki̶ le ku wu ɗee a nyem ɗin ndi̶re mo nyit kì̵ Naan. 12Meeɓe mee gurum sat nee. "Ba mee mbii ɗi ni cíi c`in ɗi kas." Ii, azeen, amma ba a mbii mo jir ɗi mo ki̶ koghop ni kas. "Pe wan ɗi, ɓe ni azeen-nzeen nee, ba mee mbii ɗi ni cíi c`in ɗi wan kas." Amma ba wan riɓet ɗee a ki̶rom kì̵ mee mbii kas. 13Mee ngo tal nee, "Mbiise ni a mpee ɓut, ki̶ ɓut a mpee mbiise." Ni azeen, amma Naan wurin nshirip mo weet. Ba mo leshin kì̵ gurum, a mpee c`in mbii ɗiibish mo kaa ngaa si kas. Amma mo leshin kì̵ gurum a mpeku ni c`in ɗak ɗi Daa, ki̶ a Daa wurii tap kì̵ shin kì̵ gurum ni zak. 14Naan wuri yaghal kì̵ Daa a peemúut, ɓe wurin nyaghal ki̶ mun a peemúut shi iiko fi̶ri aasi zak. 15Ba wu man nee, suk fuu ni mo, a ɓeep kì̵ Kristi kas aa? Cirang ɗangɓe wan mmang mee ɓeep kì̵ Kristi, ku wan ɓal ni ashak ki̶ ɓeep mu mat ngaa ye? Ba mi̶ni mmak c`in kas koo diɓen! 16Ba wu man nee, ngo ɗi wuri ɓàlshin fi̶ri ki̶ mat ngaa, ɓe wuri ɗee a nan ɗiimi̶ndong ki̶ mat ngaa ni kas aa? Mpeeɗi mo kì̵ ten ran ndi̶ghi̶n takarda kì̵ Naan nee, "Mo vul, mon nɗee a nan ɗiimi̶ndong." 17Amma ngo ɗi wuri ɓal shin ki̶ Daa, ɓe mo ɗee a ɗiimi̶ndong ndi̶ghi̶n Riin. 18Wu swa wu baa aku pe mbii ɗiibish mo, kaa ngaa si. Koo a shikbish ɗiiɗang ye, ɗi gurum kì̵ c`in ni, ɓe wuri kì̵ c`in ni a ki̶ɓwoon ki̶ shin fi̶ri. Amma ngo ɗi wuri ki̶ c`in ngaa, ɓe wuri ki̶ c`in shikbish a nkaa shin fi̶ri. 19Ba wu man nee, suk fuu ni a lu Riin kì̵ Naan ɗi wurii tong ndi̶ghi̶n wun kas aa? A Naan wuri cín Riin mi̶ni wun ki̶ ba wun a mukáa fuu kas. 20Jesu wuri kì̵ seet wun shi mbii ɗiiki̶rim, mpeemi̶ni, ɓe ni a ting, ku wu c`in ɗiiɗes nNaan shi suk fuu mo.

will be added

X\