1 Koronti 5

1Azeen-nzeen gurum moo sat nwan nee nyemc`in ngaa mo ɗi nnaar fuu, kiyeet kì̵ ngaa ɗi koo a nyemk`um mo, ɓe ba moo c`in mi̶ni kas. Mpeeɗi wan ki̶ling nee, làa ki̶ saam ki̶ mat kì̵ puun fi̶ri. 2Har ne, wuu c`in roghop ki̶ mi̶ni. Ba ɗi ni ret ku wu gam aa wat kì̵ putughup, ki̶ ɗi ni ret ku wu ceen kiyeet kì̵ nyem ɗi moo c`in mbii ɗiibish mi̶ni mo ndi̶ghi̶n tong ashak fuu kas aa? 3Koo ɗi ba wan ashak ki̶ wun mɓut nan kas, amma wan ɗi ashak ki̶ wun ndi̶ghi̶n Riin, ki̶ wan ki̶n ten canɗiyeel ɗiibish ngo ɗi wuri kì̵ c`in mbii ɗiibish mi̶ni, kaa wan ɗi ashak ki̶ wun si. 4Katɗang wu kuur ashak ndi̶ghi̶n sum ki̶ Daa Jesu, ɓe wan ɗi a shak ki̶ wun ndi̶ghi̶n riin, ki̶ iiko mu Daa funu Jesu ni ɗi ashak ki̶ mun. 5Wu cín nguc`in ngaa ni nsar kì̵ Shetan, mpeku shin fi̶ri ɗi ni a mu c`in shikbish ni muut ɗi, amma riin fi̶ri ni ɗee ɗi a ɗiiɓi̶ɓam parpuus mu Daa Jesu. 6Ba roghop fuu ni ret kas, koo diɓen. Ba wu man nee a rep yist lee ɓe nii fuk bred kas aa? 7Mpeemi̶ni ɓe wu pwat ki̶ yist ɗiisi̶ghi̶r mu shikbish ni ndi̶ghi̶n tong fuu mo aku mpeku wu ɗee ɗi a nyem ɗiiɓang mo. Gyet Jesu Kristi wuri muut a mpee shikbish funu mo, a wuri a Laatum mu retnyit kì̵ Canɗel funu, ɗi mo kì̵ ten cín wuri kaa mbii wus mbiizughum si. 8Mpeemi̶ni ɓe wu yit ku mu sekiyeen kì̵ c`in retnyit mu Canɗel funu, ba a shi bred ɗi nii yist ɗiisi̶ghi̶r mu shikbish ki̶ ɓutbish kas. Amma mu c`in retnyit mu Canɗel ni shi bred ɗi ba nii yist kas, bred ɗi ni a mu putughup mi̶ndong ki̶ zeen. 9Gyet wan ki̶n ran nwun ndi̶ghi̶n wasika fi̶na ne taji wu ɓàlkáa fuu ashak ki̶ nyemc`in ngaa mo kas. 10Ba gyet wan ki̶n satpo a nkaa nyemc`in ngaa ɗii mu yil ɗiisi mo, ki̶ nyemriɓet mbii mo, koo wat mo, koo nyem ɗi moo seyil nk`um mo kas. Katɗang wu riɓet ku taji mee mbii ɓàl wun ki̶ nyem ɗiisi mo kas, ɓe ni a ting ku wu pwat aku ndi̶ghi̶n yil ɗiisi ki̶n ndi̶ng-ndi̶ng mi̶ni. 11Amma wan ki̶n ran nwun, nee, taji wu ɓàlkáa fuu ki̶ ngo ɗi wuri kì̵ pet shin a nguso ndang Jesu, ɗangɓe wurii c`in ngaa, koo riɓet mbii, koo seyil nk`um, koo satpo ɗiibish nkaa gurum mo, koo shwaamwos, koo c`inwat kas. Ba ni ret ku wu se mbiise ashak ki̶ gwar mi̶ni kas. 12Ba ni a ɗak fi̶na mpeku wan tokɗiyeel nyem ɗi ba mo a nyemso ndang Jesu mo kas. Wan ki̶n tokɗiyeel a nyem ɗi mo ndi̶ghi̶n Eki̶lisya mo ɓejee. 13A Naan wurii tokɗiyeel nyem ɗi ba mo a nyemso ndang Jesu kas. Wan sat nee. "Wu ceen ngo ɗiibish put a ku mɓut wun."

will be added

X\