1 Koronti 11

1Wu mwaan ndi̶ghi̶n shiimwaan fi̶na, kaaɗi wan ki̶n mwaan ndi̶ghi̶n shiimwaan mu Kristi si. 2Wan kwoop wun, mpeeɗi wuu pan wan ndi̶ghi̶n mbii mo jir, ki̶ wuu mwaan ndi̶ghi̶n kám ɗi jí wan kám mo nwun zak. 3Amma wan riɓet ku wu man nee, a Kristi wuri a káa kì̵ koo a mish ɗiiɗang ye, ki̶ a mish wuri a káa kì̵ mat fi̶ri, ki̶ Naan wuri a káa kì̵ Kristi. 4Mpeemi̶ni koo mish ɗiiɗang ye ɗi wuri c`in aduwa, ki̶ satpo kì̵ Naan ndi̶ghi̶n ɗuu kì̵ gurum mo ki̶ káa fi̶ri a pi̶paa, ɓe wurii j`i ki̶ nashoop nkaa Kristi ɗi a wuri a káa fi̶ri mmi̶ni. 5Koo mat ɗiiɗang ye ɗi wura c`in aduwa, ki̶ satpo kì̵ Naan ɗi ba wura paakáa fi̶ra kas, ɓe wuraa j`i ki̶ nashoop nkaa mish fi̶ra. Ɗi a wuri a káa fi̶ra, ki̶ zak, ɓe wura ɗee a kaa mat ɗi mo sak káa nwura ngau si mmi̶ni. 6Katɗang ba mee mat paakáa fi̶ra kas, ɓe ni ret ku wura saa shoopkáa fi̶ra. Amma katɗang saa shoopkáa koo sak shoopkáa nin nj`i ki̶ nashoop mmat, ɓe ni ret ku wura paakáa fi̶ra. 7Ba ni ret ku ngumish paakáa fi̶ri kas, mpeeɗi Naan ɗak mish a kaa shin si, ki̶ wurii kám a ɗiiɗes kì̵ Naan. Amma mat wura ki̶ kám a ɗiiɗes mu mish. 8Ba gyet Naan ɗak mish a shi sat mu mat kas, amma gyet wuri ɗak mat a shi shin mu mish. 9Ki̶ zak, ba gyet Naan wuri le mish a mpee mat kas, amma gyet wuri le mat a mpee mish. 10Mpeemi̶ni, ɓe ni ret ku mat paakáa fi̶ra, ku ni kám ɗi nee, wura a nder kì̵ mish fi̶ra, ki̶ mpee nyemlop kì̵ Naan mo zak. 11Jir ki̶si, ɓe seen funu ɗi mun ki̶ ni ndi̶ghi̶n Daa, ɓe ba mat wura ɗik kì̵ mish fi̶ra kas, ki̶ ba mish wuri ɗik ki̶ mat fi̶ri kas zak. 12Mpeeɗi gyet Naan wuri ɗak mat a shi mee ɗyes kì̵ mish, ki̶ ni aasi zak, yaksi ɓe a mat wura kì̵ làa mish. Mbii moo pwat a pe Naan ɗi jir. 13Wun shikáa fuu, wu ɓeetpo ɗiisi ni, kyet nin ndi̶re mpeku mat wura c`in aduwa nNaan ndi̶ghi̶n kuur kì̵ gurum mo, ɗi ba wura paakáa fi̶ra kas wa? 14Koo a shi ɗyen, ɓe ni kám nwun kas aa? Nee ni a mbii nashoop ku mish wuri ɗyel shoopkáa shwal-shwal. 15Amma katɗang ɓe mat wura ɗyel shoopkáa ɗiishwal-shwal, ɓe mi̶ni a mbii jwat nwura kas aa? Mpeeɗi mo cín shoopkáa ɗiishwal-shwal ni nwura, a mpeku wura paakáa fi̶ra ɗi. 16Amma katɗang mee ngo ki̶ riɓet ɓeetshik nkaa po ɗiisi, ɓe ba mumun, koo Eki̶lisya mu Naan mo, ɓe ba mu loghot ki̶ mee ar ɗi ni a mu seyil nNaan ɗi ni ɗik ki̶ mi̶ni kas. 17Ndi̶ghi̶n waar ɗiisi, ɓe ba wan kwoop wun kas, mpeeɗi kuur fuu ni ba nii koghop ni kas. Mpeeɗi katɗang wu j`i wu kaat ndi̶ghi̶n kuur fuu, ɓe mbii ɗi wuu c`in ni mo, ɓe ba mo ret kas. Nii waa wuwat gurum mo met aku ɗi nin mɓam mo. 18To, ɗin nshee ni, katɗang wu kuur, kaa Eki̶lisya si, mpee seyil nNaan, ɓe ba po fuu moo so ndangshak kas, har kaaɗi jí wan ki̶lingpo mi̶ni, ɓe wan ɗoghom cínzeen nni. 19Ba ni ki̶ mee kyetwa kas, ni a ting, ku mo kat ɓàkshak ɗi ndi̶ghi̶n wun, mpeku mo man nyemso ndang Naan ɗin ndi̶re ni mo ɗi azeen-nzeen. 20Katɗang wu j`i wu kaat ashak, ɓe ba wuu se a Tong Ashak mu Daa ni kas. 21Mpeeɗi katɗang wu ɗoghom se ni, ɓe koo weye wurii yaa se mbiise ɗi wuri j`i ki̶ni, har wuu le ku neenláa mpak mo, ku pak moo shwaayughur ɗi. 22Kai! ba wun ki̶ tulu ɗi wun nse ki̶ shwaa ɗi kas aa? A me le ɗang wuu toklong nkuur mu Eki̶lisya ki̶ Daa ye? Ki̶ a me le ɗang wuu cín nashoop nyem ɗi ba mo ki̶ mee mbii kas ye? Wan nsat a me nwun mpee mbii kaa ɗiisi si ye? Wan nkwoop wun aa? Waash, ba wan nkwoop wun kas koo diɓen. 23Wan lap kám ɗiisi ni a pe Daa ɗi, ɗi wan ki̶n cín nwun si zak. Nee, mpar ɗi gyet mo seet Daa Jesu ɗi, ɓe Daa Jesu wuri mang bred. 24Aɓwoon ɗi wuri ki̶ c`in aduwa mu pi̶lang Naan nkaa bred ni, ɓe wuri yilang ni, wuri sat nee: "Ɗiisi ni a san fi̶na, ɗi wan ki̶n cín ni mpee wun. Wu naa nc`in aasi, mpeku taji wu mander nwan kas." 25Ni aasi zak, ɓe aɓwoon ɗi mo se mbiise, ɓe wuri mang laaɗaa, ɓe wuri sat nee, "Laaɗaa ɗiisi ni a ɓi̶lemcuk shi toghom kì̵ Naan ɗiipoo, ɗi ni ndi̶ghi̶n toghom fi̶na. Katɗang koo a pi̶rang ye ɗi wun nshwaa am anab ndi̶ghi̶n laaɗaa ni, ɓe wuu shwaa ni a mpeku taji wu mander wan kas." 26Shii ki̶ ɗiisi ni a nee, koo a pi̶rang ye ɗi wuu se bred ni, ki̶ wu shwaa am anab ndi̶ghi̶n laaɗaa ni, ɓe wuu c`in a langting nkaa muut kì̵ Daa Jesu, har parɗi wurin mbaa j`i. 27Katɗang mee ngo kì̵ se bred ni ki̶ shwaa am anab ndi̶ghi̶n laaɗaa mu Daa ni, ba a ndi̶ghi̶n ar ɗin ndi̶re kas, ɓe ngo mi̶ni kì̵ c`in a shikbish nkaa shin mu Jesu ki̶ toghom fi̶ri mmi̶ni. 28Ni ret ku gurum shee kyamshin fi̶ri akuɗang wurii se bred, ki̶ shwaa am anab ɗi nin ndi̶ghi̶n laaɗaa mu Daa ni. 29Mpeeɗi katɗang ba gurum manshii kì̵ shin mu Daa Jesu ki̶ toghom fi̶ri ni kas, ɗangɓe wuri ki̶ se bred ki̶ shwaa am anab ɗi ni ndi̶ghi̶n laaɗaa mu Daa ni, ɓe gwar mi̶ni ki̶ j`i aa ɗiyeel nkaa shin fi̶ri mmi̶ni. 30A nii le, ɗangɓe pak fuu mo a gok, ki̶ ba pak mo ki̶ ɓal kas, har pak fuu mo ɗes, mo kì̵ murap. 31Amma katɗang mu kyamsun funu mo azeen-nzeen, ki̶ mu c`in mbii mon ndi̶re-ndi̶re ɓe ba Naan tokɗiyeel mmun kas. 32Amma Naan wurii tokɗiyeel mmun, ki̶ wurii kar mun, a mpeku taji wurin ncanɗiyeel ɗiibish mmun ashak ki̶ gurum ɗiibish, ɗi mo ndi̶ghi̶n yil ɗiisi, parkyes kì̵ yil ni kas. 33Mpeemi̶ni, ɗyemnaa mo, katɗang wu kuur ashak mpee se Tong Ashak mu Daa, ɓe ni ret ku wu kúmshak. 34Katɗang neenláa mmemee fuu, ɓe ni ret ku gwar mi̶ni sese ntulu fi̶ri akuɗang wurii j`i kuur ni. Mpeku taji Naan wuri canɗiyeel ɗiibish nkaa wun jir, a peekuur fuu ni. Po nkaa kaghar mbii ɗi mo ɗee ɗi, ɓe see parɗi wan wul pe wun ɗi, ɗangɓe wan nsatpo nwun nkaa mo jir.

will be added

X\