1 Koronti 10

1Ɗyemnaa mo, wan riɓet ku wu man nee, gyet puun funu mo jir, mo a nder kì̵ nluu, ki̶ gyet mo jir mo can am bahar ɗiinaat mo ɗel riyang ndang Mosis zak. 2Gyet mo c`in baptisma mmo jir a ndi̶ghi̶n nluu, ki̶ ndi̶ghi̶n am bahar kaaɗi gyet mo so ndang Mosis si. 3Gyet mo jir, mo se mbiise ɗi gyet Naan cín mmo ɗi ni a mu Riin. 4Gyet mo jir mo shwaa am ɗi Naan cín mmo. Mpeeɗi gyet mo shwaa am ɗi gyet ni j`i put mɓut jwak. Gyet jwak ɗiisi ni mwaan ndang mo. Gyet jwak ɗiisi a Kristi shikáa fi̶ri. 5Jir ki̶si, ɓe ba gyet Naan wuri kat retnyit ki̶ pak mo kas. Mpeemi̶ni ɓe mo murap ɗes a naar yil. 6Yaksi, ɓe mbii ɗiisi mo jir, mo ɗee a mbiikám mumun. Mo gwak mun, mpeku taji mu kyaghar mbii ɗiibish mo, kaaɗi gyet mo c`in si kas. 7Taji wu ɗee a nyemk`um mo, kaaɗi gyet pak mo ndi̶ghi̶n mo, mo c`in si kas, kaaɗi mo kì̵ ten ran ndi̶ghi̶n takarda kì̵ Naan si nee: "Gurum ni mo tong nyil, mpeku mo se gwom k`um, ki̶ shwaa yughur, ki̶ mo yaghal a ting mpee c`in kook." 8Taji mu c`in ngaa kas, kaaɗi gyet pak mo ndi̶ghi̶n mo, mo c`in si, har gurum mo duɓu laarvul baakun, mo murap parpuus mi̶ndong. 9Taji mu kyam Daa kas, kaaɗi gyet pak mo ndi̶ghi̶n mo, mo c`in si, ɓe har gyet nw`oo mo, twa mo. 10Taji mu kyakpo nɗagham-nɗagham kas, kaaɗi gyet pak mo ndi̶ghi̶n mo, mo c`in si, har mo murap nsar ki̶ ngulop mu muut. 11Mbii ɗi gyet ni kat mo, ni ɗee a mbiikám pe mun ɗi. Mo kì̵ ten ran mo, a mpeku mo gwak mun ɗi, mun ɗi peekyes ki̶ ɓit ni mo kì̵ j`i a nkaa mun. 12Mpeemi̶ni, ɓe koo a weye, ɗi wuri ki̶ pan ne wuɗi ki̶ ɗar ɓal-ɓal, ɓe wuri tap, taji wuri pal kas. 13Ba mee jwaan ɗi nin nkat wun ɗi kas, see a ɗi nin nkat kaghar gurum mo jir zak. Naan wuri a nguzeen, ba wurin nyit ku mee jwaan kat wun, ɗi nin mmet mɓal fuu kas. Amma a shi jwaan ni, ɓe wurin nle ar put ni ɗi zak, mpeku wu mak gung jwaan ni ɗi. 14Mpeemi̶ni ɗyemnaa mo, taji wu seyil nk`um mo kas. 15Wan ki̶n katpo wun, a kaa nyem ɗi Naan wuri kì̵ ten kám ar ni wun si. Mpeemi̶ni, ɓe wu ɓeet ki̶ suk, nkaa mbii ɗi wan ki̶n sat ni. 16Katɗang mu mang laaɗaa mu Tong Ashak ɗi muu pi̶lang Naan mpee ni, ɓe ba wu man nee, muu ɓàl a káa funu mo ashak ki̶ Kristi ndi̶ghi̶n toghom fi̶ri kas aa? Bred ɗi muu yilang si, ɓe ba wu man nee, muu ɓàl a káa funu ndi̶ghi̶n shin kì̵ Kristi kas aa? 17Mpeeɗi bred ni a mi̶ndong, ɗi muu yilang ni mu se ashak. Ni aasi zak, mun ɗi ɗes, amma mun a nan ɗiimi̶ndong, mpeeɗi muu se a bred ɗiimi̶ndong. 18Wu pan nkaa nyem Yahudi mo ndi̶ghi̶n nan, nyem ɗi moo se ndi̶ghi̶n mbiizughum ɗi mo wus ni, ɓe moo ɓal a káa furu kì̵ Naan ɗi moo c`in ni nwuri. 19Wan ki̶n riɓet sat a meye? Kyet mbiise ɗi moo c`in nk`um, mi̶ni a mee mbii me? Koo a k`um ni a mee mbii ye? 20Waash, wan ki̶n sat a nee, mbii ɗi nyemk`um moo fet mpee c`in zughum, ɓe moo c`in ni a riin ɗiibish mo, ba moo cín zughum ni a nNaan kas. Ba wan riɓet ku wu ɓàlkáa fuu mo ashak ki̶ riin ɗiibish mo kas. 21Ba wun mmak shwaa mɓut laaɗaa mu Daa, ki̶ wu waa wu shwaa mɓut laaɗaa mu riin ɗiibish mo zak kas. 22Taji mu c`in mee mbii ɗi nin nle ku Naan wuri c`in tughup kas. Kyet mun, mu ɓal met wuri wa? 23Gurum mo sat nee, "Mu mak c`in koo meye, ɗi mu riɓet." Ni azeen, amma ba a mbii mo jir ɗi mo mak ɗik wun koo moo koghop ni mpee gurum kas. 24Taji mee gurum tang mbii ɗi mo a mukáa fi̶ri kas. Amma ni ret ku wuri tang a mbii ɗi mo ret mpee niyee mo. 25Wu se mbii ɗi moo si̶rep mo ndi̶ghi̶n kasuwa mu luwa mo. Taji wu talpo kas, mpee pan ɗi ni ndi̶ghi̶n putughup. 26Mpeeɗi mo kì̵ ten ran ndi̶ghi̶n takarda kì̵ Naan nee. "Yil ɗiisi ni a mu Daa, ki̶ mbii ɗi mo ndi̶ghi̶n ni jir." 27Katɗang mee gwar ɗi ba wuri kì̵ cínzeen nDaa Jesu kas, wuri pet wun mpee sese ashak ki̶ wuri. Katɗang wuu lap ii, ne wunn nso, ɓe wu se mbii ɗi wurin nle a kiyeen fuu. Taji wu tal kas, mpee pan ɗi ni ndi̶ghi̶n putughup fuu. 28Amma katɗang mee ngo kì̵ ten sat nwun nee, "Mo kì̵ ten cín luwa ɗiisi ni nk`um." Ɓe taji wu se luwa ni kas, mpee gwar ɗi wuri satpo mi̶ni nwun, ki̶ mpee pan ɗi ni ndi̶ghi̶n putughup. 29Ba a mpee pan muu mo kas, amma a mpee pan kì̵ gwar ni. Mpeme ɗang pan ki̶ mee gurum nin ncíi nwan, mpee katpee ɗi wan ki̶ ni, mpee c`in mbii ɗi wan ki̶n riɓet ye? 30Katɗang wan pi̶lang Naan mpee mbiise fi̶na. Ɓe cirang ɗangɓe gurum moo katpo ɗiibuu nkaa wan, mpee mbiise ɗi wan ki̶n ten pi̶lang Naan nkaa ni ye? 31Mpeemi̶ni, ɓe koo a mbii ɗiiɗang ye ɗi wuu c`in, koo a se mbiise, koo a shwaa mbiishwaa, ɓe wu c`in mbii mo jir mpee le Naan a ɗiiɗes. 32Taji wu le ku mee gurum canshii kas. Koo ɗi ngo ni a ngu Yahudi kas, koo ɗi a Eki̶lisya mu Naan. 33Kaaɗi wan ki̶n gung mpeku wan c`in mbii ɗi mo shang ɗi ngurum mo jir. Ba wan ki̶n tang a ɗiiret mukáa fi̶na kas, amma wan ki̶n tang a ɗiiret mu gurum mo ɗes, mpeku mo kat ɓam ɗi.

will be added

X\