1 Koronti 1

1Po ɗiisi ni put a nsar kì̵ Pool, ɗi shi ɗom kì̵ Naan, ɓe Naan pet wuri ku wuri ɗee a laalop mu Kristi Jesu, ki̶ ɗyemni̶ghi̶n funu Sosfenes. 2Wan ki̶n lop po ɗiisi ni so pe Eki̶lisya mu Naan ɗi ni nyil nKoronti. Nyem ɗi Naan wuri kì̵ ten bi̶lip mo le, mpeku mo ɗee ɗi a nyem fi̶ri mo ndi̶ghi̶n Jesu Kristi, ki̶ mpee nyem ɗi koo a neye, ɓe moo pet sum kì̵ Daa funu Jesu Kristi ɗi wuri a Daa furu ki̶ Daa funu zak. 3Ɗiiret kì̵ Naan ki̶ tongriyang ɗi ni put a pe Naan puun ki̶ Daa funu Jesu Kristi ni tong ashak ki̶ wun. 4Wan pi̶lang Naan shidaar-shidaar mpee wun, mpeeɗi Naan wuri kì̵ naajeel fuu ndi̶ghi̶n Kristi Jesu. 5Ndi̶ghi̶n Jesu Kristi, ɓe Naan wuri ki̶ cín man mbii mo wun, ki̶ man katpo riret ɗes hakyeng. 6Mpeeɗi langting funu nkaa Kristi ni ɗee azeen-nzeen ndi̶ghi̶n wun. 7Mpeemi̶ni, ɓe ba wu nook kat mee zughum ɗi ni a mu Riin kì̵ Naan kas, kaaɗi wuu kyaghar mpee kum parpuus ɗi Daa funu Jesu Kristi wurin nj`i put agaak. 8Wurin ncín ɓal nwun har peekyes ni, mpeku wu ɗee ɗi a ɗin ndi̶re-ndi̶re parpuus mu Daa funu Jesu Kristi. 9Naan ɗi wuri kì̵ ten pi̶rep wun, ku wu ɗee ɗi a nyemtong ashak ki̶ Làa fi̶ri Jesu Kristi, Daa funu, wuri a nguzeen. 10Ɗyemnaa mo, wan ɗang pe wun, ndi̶ghi̶n sum kì̵ Daa funu Jesu Kristi, nee, ni ret ku po fuu mo so ndangshak, mpeku taji mee ɓàkshak yaghal nnaar fuu kas. Amma ni ret ku wu ɗee a ɗiimi̶ndong ndi̶ghi̶n pan fuu mo ki̶ ndi̶ghi̶n mbii ɗi wu riɓet c`in mo. 11Ɗyemnaa mo, nyemtulu kì̵ Klo mo j`i sat nwan nee, bi̶lep kì̵ yaghal nnaar fuu. 12Mbii ɗi mo sat ni a nee, koo a weye ndi̶ghi̶n wun, ɓe wurii sat mbii mo shini-shini, pak moo sat nee, "Wan a mu Pool," koo "wan a mu Apolos," koo, "wan a mu Kefas," koo, "wan a mu Kristi." 13Kristi wuri ɗee a ɗiiɓi̶ɓak me? Gyet mo pwas a Pool nkaa shiyeepyoghom mpee wun aa? Aa koo gyet mo c`in baptisma nwun a ndi̶ghi̶n sum kì̵ Pool ye? 14Wan pi̶lang Naan, mpeeɗi ba gyet wan c`in baptisma mmee ngo kas, see a Krispus ki̶ Gayus ɓejee ɗak. 15Mpeemi̶ni ɓe ba mee ngo mmak sat nee, gyet mo c`in baptisma wuɗi a ndi̶ghi̶n sum fi̶na kas. 16(Amma gyet wan c`in baptisma nyemtulu ki̶ Stifanas mo. Katɗang ba a mo kas, ɓe ba wan pan nee, gyet wan c`in baptisma mmee ngo kas.) 17Ba gyet Kristi wuri lop wan a mpeku wan c`in baptisma ɗi kas, amma gyet wuri lop wan, a mpeku wan satpo ɗiiret ni ɗi, ba a shi mee seen mu man satpo kas. Mpeku taji mo leɓal mu shiyeepmúut ki̶ Kristi ni ɗee a ɗiibuu kas. 18Pe nyem ɗi mo nkaa lagham, ɓe po nkaa shiyeep ni a po ɗiibuu pe mo ɗi. Amma pe mun, nyem ɗi muu kat seen, ɓe shiyeep ni a iiko kì̵ Naan. 19Mpeeɗi mo kì̵ ten ran ndi̶ghi̶n takarda kì̵ Naan nee: "Wan nshirip seen kì̵ nyemseen mo, ki̶ wann mmang man ki̶ nyemman mo nle mmee koghop akuɗang." 20Katɗang ni aasi, ɓe nguseen ni a neye? Ɓe nguman mbii a neye? Ɓe nguɓeetshik mɓut mɓít ɗiisi a neye? Naan wuri kì̵ ten cighi̶r kì̵ nyemseen mu yil ɗiisi ni ɗee a mwen mo. 21Mpeeɗi ndi̶ghi̶n seen kì̵ Naan, ɓe yil ni shi seen ki̶ ni, ba ni man Naan kas. Amma ni ret Naan nyit mpee po ɗiiret ɗi mu sat ni, ɗi pak nyemki̶lingpo ni mo, ɓe moo sat nee, ni a po mu mwen mo. Amma ni a ɓam mpee nyem ɗi mo cínzeen. 22Nyem Yahudi moo tang mbii aapo mo, ki̶ nyem Heleni moo tang a seen. 23Amma mun, muu sat a po nkaa Kristi ɗi mo pwas wuri nkaa shiyeepyoghom. Ɗiisi ni ɗee a mbii canshii nyem Yahudi mo, ki̶ ni ɗee a po mwen pe nyem ɗi ba mo a nyem Yahudi mo kas. 24Amma pe nyem ɗi Naan kì̵ ten pi̶rep mo, koo a nyem Yahudi mo, koo a nyem Heleni mo, ɓe Kristi wuri a iiko mu Naan kì̵ seen fi̶ri zak. 25Mpeeɗi mwen kì̵ Naan ni met nseen kì̵ gurum mo, ki̶ ɓwaar kì̵ Naan ni ki̶ ɓal met ɓal mu gurum mo. 26Ɗyemnaa mo, wu pan kaaɗi Naan wuri pi̶rep wun si. Ba gyet wuri pi̶rep a nyem ɗi moo seen mu yil ɗiisi ɗes kas, ki̶ ba gyet a nyem ɗi mo ki̶ iiko ɗes kas. Ba a nyem ɗi gyet mo làa mo mɓut ndang mu nyemlong mo ɗes kas. 27Amma Naan wuri bi̶lip a mbii ɗiimwen mu yil ni mo, mpeku wuri cín yitluwaan ɗi nyemseen mu yil ni mo. Naan wuri bi̶lip mbii ɗi ba mo ki̶ ɓal ndi̶ghi̶n yil ni kas, mpeku mo shoop mbii ɗi moo ɓal mo ɗi. 28Naan wuri bi̶lip a mbii ɗi yil ni ɓees, ki̶ yil nii naa mo a kaa mbii ɗiibuu mo si, har kaa mbii ɗi ba mo ɗi kas si, mpeku ni twa mbii ɗi yil nii naa mo, a kaa mbii ɗi moo koghop ni si ɗi. 29Mpeku taji mee ngo canjagham nyit kì̵ Naan kas. 30Amma Naan wuri j`i ki̶ wun ndi̶ghi̶n Kristi Jesu, ki̶ wuri le Jesu Kristi a seen funu, ki̶ ɗiiret funu, ki̶ a mpee wuri ɗangɓe wu mak ɗee a ɗiiɓang nyit kì̵ Naan, ki̶ a wuri ang mun mɓut shikbish funu mo zak. 31Ni a kaa ɗi mo kì̵ ten ran ndi̶ghi̶n takarda kì̵ Naan si nee: "Koo a weye ɗi wurii canjagham, ɓe ni ret ku wuri canjagham ni ndi̶ghi̶n Daa Naan."

will be added

X\