Ng'oong'uutyēēt 9

1Kukuut :malayikeet nyēbo muut aryeembuut nyeenyii, akas kookeelyeet nyēē kikiikōōsuuwunēē barak kuchō kōōrēēt. /Kikiikoochi kookeelyaanaa yootēywoontēētaab nkōriit nyoo māng'ētē. 2Yu kayaat ng'ōmsiinoo, kuchiilta :yyētiit ām yēēto kuu yyētiit nyēē chiilunēē ma nyēē wōō miisin. Kituuyiit wōliin bo barak āk asiista ām yyētiinoo chōōnēē ng'ōmsiinoo. 3Kitēērēērunēē :taalamik yyētiinoo kukwa kōōrēēt chēē /kikiikoochi nkuruuk chēē wuu chēbo kēnēyiisyēk. 4/Kikēēmwoochi taalamichaa kumanyeeree suuswoo ake tukul nyēbo kōōrēēt, nto keet ake tukul, nteenee kunyeeree baateey biiko choo kimāboonto ng'oocheetaab Yēyiin ām tokoochikwaa. 5/Kimākēēmākyinē :taalamichaa kubakach bichoo, nteenee kooluuch bichooto ām ārook muut. Nto ng'wooninto nyēē kinyōōru :bichoo ku wuu nyoo yoo kāmwook :kēnēyoontēēt chiito. 6Makumach :biiko ām bēsyōōsyēchooto kule nto bēk, nteenee mābēku. Makucheeng' meet, nteenee mākumwēyēē icheek :meet. 7Kikerkeey :taalamichaa faraasiinek chēē chōbootiin kubo booryēēt. Kiiloochē tukuuk chēē wuu kuutwōōsyēk chēē /kikeeyeyee *ta-aabuut ankikerkeey :wōlēēb koonyek chēbo biiko. 8Kukerkeey :buutēēkwaa chēbo koor, nto keelekwaa kukerkeey chēbo ng'ētunyto. 9Kiwuu nyēē iyēēnootiin :tēkootikwaa ām karneet ānkibōlē :kebebaakwaa kuu kariinek chēē ichuutē :faraasiinek kulābātē kubēētii booryēēt. 10Boonto :taalamichaa saaruuraak chēē mwookē biich kuu kēnēyiisyēk, nto ām saaruuraakwaa kuboonto nkuruuk chēē imuuchē kōōnyāliilē biiko ām ārook muut. 11Boonto :taalamichaa bāytooyiintēēt nyēē malayikeetaab kāābkwoombiich. Kaayneetaab :malayikaanaa ām kuutiitaab Iburaneek ku Ābātōōn nto ām kuutiitaab Kirikiik ku Ābōōlyōōn nyēē ibooru kule kāāburyēētiintēēt. 12Kaakukeeyta :ng'wooninto nyēbo taayta. Mii :alake āyēēnku chēē makukwa. 13Kikuut :malayikeet nyēbo lo aryeembuut. Yooto, akas kuutiit nyēē kichōōnēē :kuuynook ang'wanu chēbo kisariinaa bo *ta-aabuut nyoo mii taayeetaab Yēyiin, 14kumwoochi malayikaanaa bo lo kule, “Ityaakte malayikaanichaa rātootiin ang'wan ām āynoonoo wōō bo Yuufraat.” 15/Kikiityaakta malayikaanichaa ki ang'wan. /Kikiikēēchōb kubo kēnyiiniitēnyi, araawaaniitēnyi, bēsyooniitēnyi āk āsiiswēchuutēchu kubakach ām kōōrēēt kumukuul ng'ooluutyēēt akeenke ām sōmōk nyēbo biiko. 16/Kikēēmwoowoo kule rarwoosyek bokolwookik āyēēng' :biikaab booryēēt chēē kēsēnē :faraasiinek. 17Ām ng'oong'uutyēēt nyēē kyāānyōōru kyaakas faraasiinechaa āk biiko chēē kakesen. Kiboonto kariichaa /kiiloochē ām teket, chēē ki ārroonēch kuu ma, chēē buusyēēnēch nto alak ku toolēēlyoonēch. Kikerkeey :mētēwookaab faraasiinechaa chēbo ng'ētuunyēk, nto kuutuweek kwoosu maat, yyētiit āk lēkēbēēt nyēē lāyē. 18Kibakach biiko ng'ooluutyēēt akeenke ām sōmōk ām kōōrēēt kumukuul :mēēyinwēchu kyoosunēē :kuutuweekaab faraasiinechaa sōmōk: maat, yyētiit ākoo lēkēboonoo kilayaat. 19Mii :kāāmuukēywēēkaab faraasiinechaa wōloo bo kuutuweekwaa āk saaruuraakwaa, kuuyu kerkeey :saaruuraakwaa ēērēēnōōy chēbo mētēwoy chēē yēyiisyēē kutōōrēē biiko. 20Nto biiko tukul choo king'ētunēē :mēēyinoo mānāāwēēchākiis. Kitas taay kukutunkyinē tāmirmirook chēē miyootēch āk tukuuk chēē kikiikuyeyee :icheek nkit *ta-aabuun, *feetaan, syaabaan, rwoontōōy āk keet, tukuuk buch, ōō, chēē mākāstooy nto kukāsē ng'al nto kubēēsyētē. 21Manaaweeksee rōkōsng'waa :bichooto kirumē biiko nto kuyēyē sookēyēēkwaa, martaayeeng'waa nto ku chōōrsēēng'waa.

will be added

X\