Mataayo 6

1Kimwooy subak :Yēēsu kule, “Ōriib keey. -'Mēēyēyē ng'al chēē kāroomēch ām taayeetaab biiko, imāchē kule siitooku. Yoo 'keeyey kuu nyooto, ku māmii :kiy nyēē mākutuwēnēēniing' :Kōōn nyoo miitē Barak. 2“Yoo 'kēētoorēt banan, -meeng'alaalaatee ām wōloo tukul kuu wōloo yēytooy :kiblembechiisyek ām kooriikaab saayeet āk kēēlwookikaab too kule sukookaasta :biiko. Kāāmwoowook /kikēētuwēnēē bichoo kiy ake tukul nyēē māchāktōōs kunyōōr. 3Nteenee yoo iyēētyēēchinē chiito ake ku māchāktōōs iyēyē ām kēēlto nyēē wunyaat nyēē -mēēmuuchē mbo kukas :choorweeng'uung' nyoo lēēkitēēniing'. 4Iyēyē kuu nyooto simakas :chii. Nto yooto mākutuwēniing' :Kōōn nyoo kāsē kiy ake tukul nyēbo wung'aan.” 5Kitas taay :Yēēsu kumwooy kule, “Yoo ōsooyē -mōōyēyē kuu kiblembechiisyek choo kicham kusooyē kukātōōnōōn ām kooriikaab saayeet āk wōloo choong'ēch :biiko. Yēyē kuu nyooto kumāchē kule sukukas :biiko icheek. Kāāmwoowook kubooyiit man, /kisimkēētuwēn bichoo. 6Nto inyiing' yoo isooyē, ikērtooy keey kō ankiisaay Kōōn nyoo mātooku. Nto yooto ku mākutuwēniing' :Kōōn nyoo kāsē kiy ake tukul nyēē wunyaat.” 7Kitas taay :Yēēsu kumwooy kule, “Yoo ōsooyē, -mōōbōloobōlē kuu biiko choo -mēēnkētē Yēyiin. Yēyē :choo kuu nyooto kōōsōōtē kule yoo kāmwooy ng'aleek chēē chaang' /kēēkāsyinē. 8Māmāchāktōōs ōyēyē kuu bichoo kuuyu simkōōnkētē :Kōōn kiyēē -mōōboontē kumanoosaay. 9Kunyoo māchāktōōs ōsooyē kule: Baaba Yēyiin nyoo imiitē Barak, 10Kuyit :bāytooyiisyēēng'uung' 11Ikōōnēēch kiyēē kyoomē ām bēsyō ake tukul. 12Inyōōwēēch kaat ām choolwookātēēnyoo, 13Itiiyēēch /simakeekenteech, 14Yoo ōnyōōchinē kaat biiko alak choo choolwookēnchook, ku nyōōwook kaat :nkinee Kōōn nyoo mii Barak. 15Nto yoo -mōōyēyē kuu nyooto ku mānyōōwook kaat :Kōōn.” 16Kimwooy :Yēēsu subak kule, “Yoo *kirē :chii āmiisyēēt, ku māmāchāktōōs kōōyuung'u kuu kiblembechiisyek choo yēyē kuu nyooto kule sukukas :biiko. !Kāāmwoowook, /kiikēētuwēn bichoo kuyem. 17Nteenee yoo ōkirē āmiisyēēt, kumāchāktōōs ōwuunē mētēwookwook āk koonyek ankooyiil 18simēēnkētook :chii kule kōōkir āmiisyēēt. Nteenee Kōōn nkityō nyoo mākāsāksē :nyēē mākōōnkēt. Nto yooto ku mākutuwēniing' :Kōōn nyoo kāsē kiyēē /kēēyēyēē wung'aan.” 19Kitas taay :Yēēsu kumwoochi biiko kule, “-Mōōtukuulchi keey mokornoontiitaab kōōrooni kuuyu makunyeeree :kuutyek ānkutuuryo ānkumiitē :chōōriik chēē imuuchē kuchoor. 20Nteenee ōkōnōrchi keey mokornoontiit ām Kaab Yēyiin wōloo māmiitē :kiy nyēē makunyeeree āmāmii :chōōriin nyēē makuchoor. 21Wōloo miitē :bāytitaab chii ku wōlooto wōlēē tiiyēē :mētinyii. 22Koong'uung' nyēē ikoochinē bōōrng'uung' lēbkēēyyēēt. Yoo kāstooy :koong'uung' nyēē karaam, iboontē lēbkēēyyēēt. 23Nto yoo mākāstooy :koong'uung' nyēē karaam, imiitē mēēnān nyēē mā mining'. Kunyi, ii, yoo kāmis :lēbkēēyyēēt nyoo 'kēēboontē, imiitē mēēnānēēt kutukul! 24“Āmwooyē kuu nyooto, kuuyu māmii :chii nyēē imuuchē kōōmēlchiin kirōkōōn āyēēng'. Yoo kasyeem, kulāyē :ake. Kunyoo, mēēmuuchāktōōs /kiinoomcho yiisyēētaab Yēyiin āk muchastaab beesaan.” 25Kitas taay :Yēēsu kumwoochi bichoo kule, “Kunyoo, !kāāmwoowook, -mooyiimee keey wōlēē ōming'tooy ōsōōtē kiyēē ō-āmē āk kiyēē ōyyēē nto ku sirooy chēē ōloochē. Wōō, oob, :soboontaab chii kusiir āmit āk sirooy? 26Māchē ōkāsēē tāriitēk choo -mēēnkētē kule /kēēchoonsē kule nee /ānkēēkēsiisyē kule nee āmātinyē mbo chookēēn, nteenee bāyē :Kōōn nyoo miitē barak. Chāmook akweek, oob, :Yēyiin kusiir tāriitēchoo? 27Ng'oo ām akweek :nyēē imuuchē kutāsyi bēsyōōsyēk ām soboonnyii yoo keeyiimee keey ng'aleekaab kōōrooni? 28Ānkōōyiimēē keey sirooy nyēbo nee, ēē? Okas baa, wōlēē wuu :taabta ake tukul ām wuuyēēt! Māchiiryootē āmāyēchinē keey sirook. 29Kāāmwoowook! Ānkoo kiboonto :Sōlōmōōn bāytit nyēē tyaa, kimāboonto sirooy chēē kāroorānēch kuu toobtōōchu. 30Kāālē akweek chu -mōōkoosēēnoo keey kuyēm, ii, yoo yēyē :Yēyiin toobtōōy kulēēlcho raat nto nyēē ma tyaa kurarach, kucham nee wōlēē makoolaaktaak akweek? 31Kunyoo -mooyiim keey ōmwooyē kule ‘+Makyaam nee?’ Nto kule ‘Kēēyyēē nee?’ Nto mbo kule ‘Kiiloochē nee?’ 32Biiko choo -mēēnkētē Yēyiin :chēē imāymooyē tukuuchoo tukul, nto akweek kōōnkētē :Kōōn nyoo miitē barak kule māchāksē ōnyōōru tukuuchoo tukul. 33Ocheeng' kurook bāytooyiisyēētaab Yēyiin ākoo churtaayeet. Nto tukuuk chuut alak tukul ku mākukōōnook :Kōōn. 34Kunyoo, -mooyiimee keey ng'aleekaab tuun, kuuyu boonto :bēsyēētaab tuun kāāyiimuutēk cheechii nkityō chēē mākubooryēē.”

will be added

X\