Mataayo 14

1Nto ām bēsyōōsyēchooto, kukas :Bāytooyiintēēt *Ērōōtē /kyoomtooy Yēēsu. 2Ām yooto kumwoochi motwoorikyii kule, “Kāābātisāniintēēt Yoowaana :nyooto nyēē kookung'eetee meet! Kiyooto nyi ōkāsē kuyēyiisyēē kāāmuukēywēēchoo bo kwong'uut.” 3Kimiitē yēē kikiikunam :Ērōōtē Yoowaana ankukerta kōōtaab kibratiisyek. Kiyey kuu nyooto kubo Erootya koorkēētaab ng'eetaab kaamet nyēē /kikēēkuurēē Filibō 4kuuyu kicham kumwoochinē :Yoowaana Ērōōtē kule, “Makaraam 'intii ng'eetaab koomēt kusobē.” 5Kimāchē yooto :Ērōōtē kubakach Yoowaana nteenee kiiywey biiko, kuuyu kichāmtooy :bichoo kule *ng'ālooltooyiintēēt :Yoowaana. 6Nto miitē yēē /kikyoomē saakweet nyēē king'ērēkyinēē :Ērōōtē bēsyēēt nyēē /kikēēsichēē, kutuumēē :chēēbtaab Erootya taayeetaab biiko. Yooto kung'erech :Ērōōtē kut 7kōōwoolchi keey chēēbooto kumwoochi kule mākōōkoochi kiyēē kateeb. 8Kung'alaal :chēēboo āk kaamet nto tēē yoo kumwoochi Ērōōtē kule, “Āmāchē ikōōnēēnoo kibseesweet mētitaab Yoowaana ām yuutēyu!” 9Yooto kwoorookēn :Bāytooyiintēēt, nteenee kuuyu kikiikōōwoolchi keey chēēboo ām taayeetaab tāyēēkyii, kumwaayta /kēēyēchi chēēboo kiyooto kimāchē. 10Kunyoo /kibakeechwenta mētitaab Yoowaana ām kōōtaab kibratiisyek. 11Nto yityo /kēēyibchi chēēbkēy mētitaab Yoowaana ām kibseesweet. Kunam :chēēboo mētoo ānkuyibchi kaamet. 12Yooto bakumuy Yoowaana :rubiikyii. Nto kāākuyityo, bākumwoochi Yēēsu. 13Yu /kābākyoomchi Yēēsu ng'aleechaa, kung'ēētyēē wōlooto kimii ankubeetee mwēēnkēēt ākoy wōlēē kimālēēkitēē :chii. Kukāsē :biiko chēē kichaang' kuu nyoo, kung'ēētyēē soong'wēkwaa ānkubēētēē kērēēnkōōk kurub Yēēsu lēt. 14Nto yu kārēkunēē :Yēēsu mwēēng', ankukas biiko chēē kichaang' miisin, kukāsyi bichoo kiisayta ānkōōsoobchi bōōrwēk. 15Nto yu mii kwiimēnē :kōōrēēt, kōōnookyi Yēēsu :rubiikyii ānkumwoochi kule, “Kāākwiimēn :kōōrēēt ānku surkwēēn :wōli! Mwoochi bichu kubēēchi keey nto kubeetaat soong'wēk kwaalaat āmiik chēē sukwaam.” 16Ām yooto kuwāl :Yēēsu kule, “Mēērook kuba. Ōkoochi :akweek kiyēē kaam.” 17Kukētyi :rubiik Yēēsu kule, “Kēēboontē ām yu mukaatiinek muut āk *burburiinēk āyēēng' baateey.” 18Yooto kumwoochi :Yēēsu rubiikyii kule, “Ōyibwoo baa āmiichooto.” 19Ām yooto kumwooy :Yēēsu kule kōōbuur :biiko ng'wēny wōlēē bo saatyeet. Nto miitē yoo kunam mukaatiinekēy muut āk burburiinēkēy āyēēng' ankukas barak kubirchi Yēyiin kōōnkōy. Nto yityo kubcheyaabchey mukaatiinek. Yooto kōōkoochi rubiikyii mukaatiinechaa kubchēchinoot biiko. 20Kyoomiis :bichoo tukul ānkōōbiyoong'iis. Nto yu kēēruruuchoot :rubiik āmiik chēē kiituuchaat :bichoo kunyiy :āmiichoo kērēboonik taman āk āyēēng'. 21Kyaam āmiichu :murēnik chēē kiyitē kisyēērōōk muut /kumānāākiiyiit chēēbyōōsōōk āk lēēkōōk. 22Yooto bakeenke, kōōsimchi :Yēēsu rubiikyii kulaany mwēēnkēēt simkoontooyee inee kwaay tōōliilēēt, ānkōōyoomiis :inee biiko. 23Nto yu kāākōōyoomiis bichoo, kulaang'ta :inee nkityō lekemeet ake barak wokusaay. Kwiimēnē :kōōrēēt ku miitē :inee wōlooto nkityō. 24Kikiikuwo yooto :mwēēnkēēt wōlēē lōō kung'eetee sakaramteet ānkimiitē kōōsooyēnē :yoomeet āk bēēko. 25Nto yu kāng'ēēyēn :kōōrēēt ku makuyyeech, kuwēēsyētēē :Yēēsu bēēko barak ākoy wōlēē kimii :rubiikyii. 26Nto bērē kukas :rubiikyii kuwēēsyētoonunēē tōōliilēēt, kumuuyo miisin ānkumwooy kule, “Chii, ēē, nto kiy nee, ōō, lēyyē!” Kumwooyē kuu nyooto kōōnchōōytōōs bakeenke chēē kāākumuuyo. 27Yooto kumwoochi :Yēēsu areet akeenke rubiichoo kule, “-Mōōmuuyē ōkāng'u! Nto yu anii nyoo.” 28Kukāsē :rubiintēētaab Yēēsu nyoo /kikēēkuurēē Bētērō kuu nyoo, kumwooyē kule, “Yoo inyiing' ii, Mokoryoontēēt, imwoowoo āwēēsyētēē bēēko barak āchōō wōloo imiitē.” 29Kuwālchi :Yēēsu Bētērō kule, “Chōō naas.” Ām yooto kurēkunēē :Bētērō mwēēng' ānkuwēēsyētēē bēēko barak kutākyi keey Yēēsu. 30Nteenee yu kakas wōlēē wuu :wusōōnēēt, kunyokoriit. Kutoow kuling'ta, ānkōōnchō kukuurso kule, “Ānkiisārwoo, ōō, Mokoryoontēēt.” 31Ām yooto kōōyokooyto :Yēēsu āwut ankunam Bētērō. Nto tēē yoo kumwoochi kule, “So, ntēē iyābē? -'Mēēkoosēēnoo keey?” 32Nto yu kaakulaany mwēēnkēēt, kuteeman :wusōōnēēt. 33Yooto nanyuun kukutunkyi Yēēsu :biiko choo kimiitē mwēēng' kumwooyē kule, “Kubooyiit man, inyiing' Lekwetaab Yēyiin.” 34Nto yu kaakwaay, bākōōyyoong'ēē yēē /kikēēkuurēē Keneesaret. 35Nto yu kēēnkēt :biikaab wōlooto Yēēsu, kōōyookyi kuut soong'wēk tukul chēē kilēēkitēch. Yooto kōōmutyi :biiko Yēēsu biiko tukul chēē kimnyoontōōs 36ānkusoom Yēēsu kuchāmchi bichooto kimnyoontōōs kutiiny buch maaseek chēē kimii kātootōōkaab sireenyii. Kisob :chii ake tukul nyēē kitiiny maaseechaa.

will be added

X\