Luuka 21

1Kutākumii :Yēēsu *Kōōtaab Yēyiin, kukas wōlēē kiikoochintooy :biiko chēē ki mokorēēn beesaanik loolēēt nyēē /kikiiruruukyinē beesaanik kubo yiisyēētaab Yēyiin. 2Ām yooto, kuchō :cheebyoosya nyēē ki musuk anki banan. Kōōnēm :nyoo beesaanik chēē ng'ēri. 3Kumwooy :Yēēsu kule, “!Kāāmwoowook, cheebyoosyaani musuk nyēē kēēnēm beesaanik laatit nyēē wōō kusiir chuut tukul. 4Kāng'ōmōrē :bichoo mokorēēn laatit nyoo kēēkooytooy ām chēē boonto, nteenee kēēnēm :cheebyoosyaanaa cheechii tukul chēē kōriibēē keey.” 5Ām yooto, kutoow :rubiik kung'alaalee *Kōōtaab Yēyiin. Kimwooyē kule, “Kāroorānēch nyēē tyaa :rwoontōōchu /kikeeteechee Kōyi bo Yēyiin! Kāroorānēch mbo nkicheek nyēē tyaa :tukuuk chu /kikēēkōōnu /kiikaraaranee kōyi!” Nteenee, kumwoochi :Yēēsu rubiichoo kule, 6“Mii :bēsyēēt nyēē +/mākiiturbuub tukuuchoo tukul choo ōmiitē ōchōrōkyinē. +/Mākiiturbuub nyēē māmii :rwaa mbo akeenke nyēē mākung'ēt ku keekemeer keey ake.” 7Yu kāmwooy :Yēēsu kuu nyooto, kuteebee :rubiik kule, “Mokoryoontēēt, yēyāktōōs āyu :ng'ālyoontoonoo ānku nee :nyēē +makeekasee yoo makuyeyakay?” 8Kukētyi :Yēēsu kule, “Ōriib keey. -Mookany /kiiberbeeraak. Choong'ēch :biiko chēē makukwaanaat ankuyey keey :ake tukul kule inee ku kāārārookiintēēt. Mākumwoowook :alake kule, ‘Kaakuriik :Mokoryoontēēt.’ Yoo kookas bichoo, -mōōyēnchi kiyēē mwooyē. 9+Mookas kubārē keey :biiko ām kōōrēēt ānkukwiilē :alake bāytooyiisyēētaab kōōrēēng'waa, nteenee -mōōmuuyē. Ākoy kuyēyākiis :tukuuchoo kurook, māsimkuyitu :tabantaab kōōrēēt.” 10Kitas taay :Yēēsu kumwooy kule, “Mākubooryo :bōrōryēēt ake āk ake, kubooryo :kōōrēēt ake āk ake. 11Mākutookunootēē :kibring'ring'yēēt kōōrēēt. Mākutookunootē :kēmēwuut nyēē wōō komoswookik chēē chaang' ām kōōrēēt ankukwaanaat mbo :bōōrwoonik chēē miyootēch. Mākutook :tukuuk alake ām wōliin bo barak chēē -/mākyoomu. 12Nteenee, kutākutoombo kut kuyēyāktōōs :ng'aleechaa tukul, +/mākēēwusook /ānkiiyyoong'tēēnook kōōk ām kooriikaab saayeet /ankeekertaak kō kubo anii. Nto subak, +/mākiiyyoong'tēēnook taayeetaab bāytooyik kubo anii. 13Bārooyinto :nyooto nyēē +mōōmwoochinēē bichooto kiyēē ōyēnchinē. 14Kunyoo, -mookany kwaamaak mēt kule bōōmwooyē nee ām wōlooto bo kōōkwōōsyēchooto ōyēētēē keey. 15+Māāboorwook kiyēē ōmiitē bōōmwooyē nyēē māmii :chii nyēē mākukētwook ng'ālyoo mbo kisich nto kulē, ‘Māwuu nyoo.’ 16“Makuchaamtaak mbo :sikiikwook, tuubchōōsyēkwook, tilyōōnuutēkwook ākoo chōōrōōnuutēkwook kuyey alak ām akweek /keenam /ankeerat, nto alak, +/makeebakach. 17“Mākuwēchook :biiko, kuuyu ōyēnwoo. 18Ānkoo kāwēchook kuu nyooto, mēēbērē mākuwuutyēēnook :Yēyiin mbo kisich! 19Yoo kōōmuytoochi ng'aleechaa, +mōōnyōōru soboonto nyēbo man ām lētuunoo.” 20Kimwoochi :Yēēsu subak kule, “Yoo ōkāsē kōōkwēnkwēēnē :buunik Yēērusālēēm, ōnkēt kule kaakuriik :bēsyēēt nyēē sērwētēē :Yēērusālēēm. 21Māchāktōōs :biikaab Yuuteeya kumwēy kuba lekem barak. Māchāktōōs mbo nkicheek :biiko choo mii Yēērusālēēm kumwēy. Nto choo kanyoorta :ng'aleechu kumii saang', kumeeyeey Yēērusālēēm. 22Bēsyōōsyēchuutēchu chēē mākōōng'woonchinēē :Yēyiin biiko choo kiikuchoolwookēn kuu wōloo mwooytooy :siruutēk. 23Lēyyē, mākuwuuyiityi sōō kule nee ām bēsyōōsyēchooto kooruuk choo kōōyootiin āk choo irēēriisyē! Mākuchō :ng'wooninto nyēē wōō kōōrēēt ānku mākōōng'woonchi :Yēyiin biiko choo mārubē ng'aleekyii. 24+/Makeebakach alak, /ankeenam alak bākuyēkunoot motwoor ām kōōrōōsyēk tukul. Mākuminy :biikaab kōōrēēt ake Yēērusālēēm ākoy yēē kābēkunēē :bēsyōōsyēkwaa.” 25Kimwoochi subak :Yēēsu rubiikyii kule, “+/Makeekasee mēēyintaab kōōrēēt wōlēē mākōōbuurto :asiista, araaweet āk kookeelik. Mākōōbuur :biiko ām kōōrēēt nyēē kāmuuyo. Makunam biiko :tonkoy ām wōlēē mākutākyi keey kumwēyēē kaaruumeetaab bēēkaab araarayta. 26Mākumuuyo :biiko chēē chaang' kut wuu nyēē mākubēk ām kiyēē mii wokuyēyāktōōs ām kōōrēēt. Mākōōtimtiimākoy :wōliin bo barak. 27“Ām yooto, makukas :biiko āyēēwu anii, *Chiitaab Barak, ām boolteet ām kāāmuukēywēēk āk lēbkēēyyēētaab Yēyiin. 28Yoo ōkāsē kutoowu keey :tukuuchoo tukul, ōng'ērēēkiisyē, kuuyu, ōmiitē bōōbēētii kōōrēēt nyēē lēēl.” 29Ām yooto subak, kumwoochi :Yēēsu rubiikyii tyoonkōōchēēt ake kule, “Māchē ōkāsēē *mutiiniit āk keetiik alak. 30Yoo ōkāsē kōōnkātu :sākēēkaab keetiichoo, ōnkēt kule kaakuriik kumusēs. 31Ām kēēlto nyēē wuu nyooto, yoo ōkāsē kuyēyāktōōs :tukuuchoo, ōnkēt kule kaakuriik :Bāytooyiisyēētaab Yēyiin. 32“Kunyoo, !kāāmwoowook, mābootōōs :biikyuu choo kyaakwey ānkoo kāyēyākiis :tukuuchoo tukul. 33Mākubot :barak āk ng'wēny, nteenee mābotē :ng'ālyoontēēnyuu.” 34Kitas taay :Yēēsu kumwoochi rubiikyii kule, “Ōriib keey! -Mookany ānyōōrwook ōbēng'tēē sookwoonuutēk ōyyēēsyē. -Mookany mbo kōōbootook :kāāsōōtēywēēk chēbo wōlēē +moonyoorte mokornoontiit. Yoo kooyey kuu nyooto, makucheeraak :bēsyoonoo āyēēwunēē. 35Makucheer :ng'aleechu biiko ām wōlto ake tukul. 36Māchē ōriibē keey kwaak. Ōsooyē sōōtitir omuuch ōbununēē ng'aleechaa ānkubōōyyoong'ēē taayeetaab *Chiitaab Barak.” 37Kiinēētiisyē :Yēēsu ām *Kōōtaab Yēyiin yoo bo bēēt, nto mii kwēēmooy kuwēēchinē keey Lekemeetaab *Musēytuuniinēk wokurwēē wōlooto. 38Kuyyēēchē :kōōrēēt, kōōyēēyē Kōōtaab Yēyiin wokōōnēētiisyē. Kimustooy :nkicheek biiko chēē chaang' bākukāsē kiyēē kiinēētē :Yēēsu.

will be added

X\