Luuka 12

1Kikwa :biiko ānkōōruruukyi keey yēē kimii :Yēēsu kut kukuunykuuny :mētēwook. Ām yooto, kung'āloolchi :Yēēsu kurook rubiikyii kule, “Ōriibēē keey *muumareekaab Farisaayeek, kuuyu yēyē keey :bichu kule kāroomēch, nteenee mā wuu nyoo. 2Kiy nyēē iyēēnoot +/mākiiboor, nto kiy nyēē wunyaat ākoy kutook :nyoo bēsyēēt ake. 3Kiy nto ng'ālyoo ake tukul nyēē mwooyē :chiito kōōsōōtē kule tōōs mēēbērē /makeekas, /kēēsyooru ng'ālyoontoonoo bēsyēēt ake. Nto yoo kāchoomchi :chii chiito ake ng'al kumiitē kōōto nyēē maalaat, +/mākēēkāsunēē ng'aleechaa saang'.” 4Kutas taay :Yēēsu kumwoochi rubiikyii kule, “Biikyuu, -mōōmuyēē biiko choo boonto kāāmuukēywēēk kubakach bōōrwoonikwook, nteenee māboonto kāāmuukēywēēk kusiir nyooto. 5Mii :nyēē māchāktōōs ōmuyēē! Boonto :nyooto kāāmuukēywēēk kutōōrchook wōlēē bo maataab kibchuulyo, yoo kōōbēku. 6“/Kyooltēē, oob, kāātiitiiyēēnik muut beesaan chēē ma bo laat? Ānkoo ku wuu nyooto, mēēbērē mākuwuutyēē :Yēyiin ake tukul. 7Ntēē inkētē mbo :Yēyiin wōlēē tēē :buutēēk ām mētitaab chiito. Kunyoo, -mōōmuuyē, kuuyu isōōtook akweek :Yēyiin miisin kusiir kāātiitiiyēēn chēē chaang'.” 8Kutas taay :Yēēsu kumwoochi rubiichoo kule, “Yoo kachamta :chii ām taayeetaab biiko kule chāmoo, +maacham :nkanii, *Chiitaab Barak, chiichoo ām taayeetaab *malayikaanikaab Yēyiin kule chiinyuu. 9Nteenee, nyoo kataya ām taayeetaab biiko tukul, +maatay :nkanii ām taayeetaab malayikaanichaa. 10“+/Mākēēnyōōchi kaat biiko choo ng'āloolēēnoo nyēē miyaat, nteenee -/mākēēnyōōchinē kaat biiko choo chubē Tāmirmiryēētaab Yēyiin.” 11Kumwoochi :Yēēsu subak rubiikyii kule, “Yoo /kākiiyyoong'tēēnook kōōk ām kōōkwōōsyēkaab Yuutayeek āk chēbo bāytooyik alak, -mookany kooyiimaak mēt :kiyēē +moomwaay nyēē ōtuuchēē keey. 12Mākukōōnook yooto :Tāmirmiryēētaab Yēyiin ng'aleek chēē +moomwaay.” 13Yu keewaany :Yēēsu ng'aleechaa, kumwooy :chiito ake ām biiko kwēēn kule, “Mokoryoontēēt, mwoochinoowoo baa ng'eetaabiya kubchēwoo tukuukaab baaba.” 14Kukētyi :Yēēsu chiichoo kule, “Mānāmoo :ng'ala chēē wuu choo, ēē, wē.” 15Ām yooto, kumwoochi :Yēēsu biiko kule, “Ōriib keey! Māmāchāktōōs ōtukuulchinē keey tukuuk ām kōōrooni. Āmwoowook kuu nyooto, kuuyu soboonto nyēbo man mēēbērē rubtooy keey āk bāytit nyēē boonto :chii.” 16Kutas taay :Yēēsu kurār tyoonkōōchēēt ake kule, “Kimii :chiito ake nyēē kiboonto mbareenyii nyēē wōō. Kiyey :āmiik ām mbaraanaa miisin. 17Ām yooto, koosoot :chiichoo ankuteebee keey kule, ‘+Maayey kule nee? Ākōnōrēē ānō āmiichu tēē chu tukul?’ 18Yu keesoot kuu nyooto, kumwooy kule, ‘Kiito nyēē miitē, +maaburyeet chookēēnik choo kō bo kwaak ankaateech chēē wōōyēch. Mākukōōno :chooto bārooyinto wōlēē +maakonoree āmiikyuu tukul āk tukuukyuu tukul. 19Yoo kaayey kuu nyooto, ābērē -mēēwokwoomoo :kēmēy bēsyēēt ake, kuuyu kaakonor āmiik chēē yēmoo a-am ām kēnyiisyēk chēē chaang' choo kwoonii. Mēēkumii :kiyēē tāāsōōtē, nteenee kiyēē miitē baateey ku ābuur ng'wēny ānkāā-āmiisyē, ānkāāyyēēsyē ankaang'erech.’ 20Nteenee kimwoochi :Yēyiin chiichoo kule, ‘Iwuu berber sōō kule nee! Mii /bākiinēmunēēniing' soboonng'uung' ām kwēēmowuuni. Kunyi, mākubooyiit ng'oo :tukuuchoo 'kēēkōnōrchi keey?’ 21“Kunyoo, berber :chii nyoo itukuulchinē keey mokornoontiit ām kōōrooni āmātinyē mokornoontiitaab Kaab Yēyiin.” 22Ām yooto, kumwoochi :Yēēsu rubiikyii kule, “Kunyoo, !kāāmwoowook, -mooyiimee keey wōlēē ōming'tooy ōsōōtē kiyēē ō-āmē, nto ku sirooy chēē ōloochē. 23Wōō :soboon kusiir āmit nto sirooy. 24Māchē ōkāsēē tāriitēk choo -mēēnkētē kule /kēēchoonsē kule nee /ānkēēkēsiisyē kule nee āmātinyē mbo chookēēn, nteenee bāyē :Yēyiin. Chāmook akweek :Yēyiin kusiir tāriitēk! 25Ng'oo ām akweek :nyēē imuuchē kutāsyi bēsyōōsyēk ām soboonnyii yoo keeyiimee keey ng'aleekaab kōōrooni? 26Nto yēē ākoo -mēēmuuchē :kāāsōōtēywēēchoo kuyēētyēēchook kiy mbo kisich, ii, nyēbo nee naas kooyiimaak :tukuuk alake mētēwoy.” 27Kutas taay :Yēēsu tākumwooy kule, “Okas baa wōlēē wuu :taabta ake tukul ām wuuyēēt. Māchiiryootē āmāyēchinē keey sirooy. !Kāāmwoowook, ānkoo kiboonto :Sōlōmōōn bāytit nyēē tyaa, kimāboonto sirooy chēē kāroorānēch kuu :toobtōōchoo. 28Kāālē akweek chu -mōōkoosēēnoo keey kuyēm, ii, yoo yēyē :Yēyiin toobtōōy kulēēlcho raat nto nyēē ma tyaa kurarach, kucham nee wōlēē makoolaaktaak akweek? 29“-Mooyiimee keey ng'aleekaab āmiik nto ng'al alak tukul. 30Biiko choo -mēēnkētē Yēyiin chēē imāymooyē tukuuchoo tukul, nto :akweek kōōnkētē :Kōōn kule ōmāchē tukuuchoo. 31Kiito nyēē wōō miisin ku kuchamta :chii bāytooyiisyēētaab Yēyiin. Nto tukuuk chuut alak ku mākukōōnook :Kōōn. 32“-Mōōmuuyē :akweek, biikyuu choo ōng'ērinēch, kuuyu kōōkuchāmwook :Yēyiin kule ōwut Bāytooyiisyēēnyii. 33-Mōōyēētyi keey tukuuk chēē ōboontē, nteenee ōyēētyēēchinēē choo boonto nyalilta. Yoo kooyey kuu nyooto, +mōōnyōōru mokornoontiit nyēē mābēku ām Kaab Yēyiin. Māmii wōlooto :chōōriin nyēē makuchoor, āmāmii :kuutya nyēē makunyeeree. 34Wōloo miitē :bāytitaab chii ku wōlooto wōlēē tiiyēē :mētinyii.” 35Kutas taay :Yēēsu subak kumwooy kule, “Oyeyte keey nyēē karaam ankoobakaakte taariinek kulāytōōs. 36Okerkeyiitu motwoorik chēē mii kukānyē mokoryoontēēng'waa kōōyēēwunēē kaab saakweetaab kooyēēy. Yoo kooyeyte keey kuu nyooto, +mōōyootyi mokoryoontēēt kurkeet areet akeenke, yoo kēēng'ēētiis. 37+/Mākiibēruur motwoorik choo /kākēēnyōōr kukāsu. !Kāāmwoowook, mākuyēytoochi :mokoryoontēēt motwoorichoo ātēbto nyēē karaam ankubay :inee nkityō motwoorichoo. 38“Imuuchē :mokoryoontēēt kuyit ām āsiiswēk alak tukul. Imuuchē ku kwēēmooy kwēēn nto ku mānēērir :kōōrēēt. Nteenee, ām asiista ake tukul nyēē kayit, +/mākiibēruur motwoorik choo mākunyōōr ku kaakuyeyta keey. 39“Māchāktōōs ōrōōtootē ng'ālyoontooni: Nto inkētē :chii āsiiswēk chēē chōōnēē :chōōriin kanyii, nto mā-āstooy /kēēbut kayta. 40Kunyoo, ōchōbē keey :nkakweek, kuuyu makucheeraak *:Chiitaab Barak.” 41Ām yooto, kuteebee :Bētērō Yēēsu kule, “Mokoryoontēēt, acheek nkit chēē imiitē imwoowēēch ng'aleechu, nto imiitē imwoochinē chii ake tukul kukas?” 42Yu kateeb :Bētērō kuu nyooto, kukētyi :Yēēsu kule, “Motwooriin ng'oo nyēē ikoochinē :mokoryoontēēnyii kōōyyoonkyi chuut? Nyēē /kiikoochinē kāāmuukēywēēchoo ku nyēē /kiikoosēē keey ānku ng'oom. 43!Kāāmwoowook, yoo kayey :motwooriintoonoo kuu wōloo kāmwooytoochinē :mokoryoontēēnyii, +/mākiibēruur /ankiilaang'tee kōōyyoonkyi tukuuk tukul chēbo kayta. 45“Nteenee, yoo keesoot :motwooriintoonoo kule lōō yēē wokōōyēēwunēē :mokoryoontēēt ānkubirsēēt motwoorik chuut kusiir yēē kātānāmē nyēē karaam, ānkōōbootyi āsiiswēkyii āmiisyēēt āk bōōkitēēt, 46imuuchē kuyit :mokoryoontēēt ku -mēēnkētē :motwooriintoonoo. Nto yoo /kākēēnyōōr kumiitē kuyēyē kuu nyooto, +/mākēēlālchi /ānkēēwēēkyi komosta nyoo bo choo -/mākiikoosēē keey. 47Ām yooto, +/mākiing'woonchi chiichoo miisin, kuuyu kēēnkētē kiyēē /kākēēmākyinē kule kuyey āmēēbērē kayey kuu nyooto. 48Nteenee, chii ake tukul nyēē -mēēnkētē kiyēē /kēēmākyinē kule kuyey āmēēbērē kayey, mēēbērē mākunyōōr :nyoo ng'wooninto nyēē wōō kuu nyoo inkētē. Chii nyoo /kākiikoochi bārooyinto nyēē wōō kuyeyee kiito ake, +/mākēēmākyi kuyey kiy nyēē wōō. Nto yoo /kākiikoochi ake kāāmuukēywēēk kusiir chēbo ake, /kēēmākyinē kuyey kiy nyēē wōō kusiir nyēbo nyiin.” 49Kumwooy :Yēēsu subak kule, “Kichāātoowu maata nyēē mākōōtiliil biiko ām kōōrēēt. Lēyyē, ābērē nto kaakulay :mayi kuwōōyiit. 50Nteenee, +/mākiibuuntēēnoo nyāliluutēk ām bēsyōōsyēk choo kwoonii, ānkumii kōōkiichoo :ng'aleechu ākoy bēsyēēt nyoo mākubēkunēē. 51“Ōsōōtē akweek kule āchōōntooy tāloosyēēt kōōrooni? Acha! Āyibu nyalilta ākoo bcheyateet. 52Makubchey keey :biikaab kayta ake. Yoo kā muut :bichoo, makuchama :sōmōku ankutaya :chuut āyēēnku, nto mā nyoo, kuchama :āyēēnku ankutaya :sōmōku. 53Makuchama :wēēriit ankutaya :kwaan, nto makutaya :wēēriit kuchama :kwaan. Mākuchuunchuun :chēēbto āk kaamet. Mākuyil :koonyitātēēt nyēē kōboontēē keey :koorkēētaab wēēriit āk cheebyoosyeetaab yuukooy.” 54Ām yooto, kuwēēkyi keey :Yēēsu biiko ānkumwoochi kule, “Yoo kookas boolteet kuloong'unēē tinkeey, +moomwaay kule ‘mākurōōbēn ra,’ kuyeyakay kuu nyooto. 55Nto yoo kāwusunēē :yoomeet komostaab sōōy, +moomwaay kule ‘makulay ra :asiista,’ kuyeyakay kuu nyooto. 56Ōwuuyē kiblembechiis! Ōyēyē keey kule ōnkētē chēē chaang'. Ōnkētē kiyēē ibooru :wōliin bo barak āk ng'wēny, nteenee -mōōnkētē kiyēē mii kuyēyāktōōs bēsyōōsyēchu. 57“Ām nee yu simōōnkētē :akweek kiyēē bo man nyēē māchāktōōs ōyēyē :tukul? 58Yoo imiitē iwēētooy keey chii nyēē mii wokōōyyoong'tēēniing' kōōk, ku māchāktōōs isyeem ām nkuruukuuk simōkāsyiinē āk chiichoo ām ng'aleekwook kutoombo kut ōyitē kōōk. Yoo kameeyey kuu nyooto, imuuchē :chiichoo wokurating'. 59Nto yoo /kaakeerating', mēēbērē /makiityaaktiing' ākoy yoo 'keekwey tukuuk tukul choo /kākēēmākēēniing'.”

will be added

X\