Yoowaana 4

1Nto mii yoo, kukas :Farisaayeek kule kimii :biiko kuwuuchinē Yēēsu ānkōōbātisānē biiko chēē chaang' kubiir Yoowaana. 2Kubooyiit man maneebatisan :Yēēsu chii, nteenee rubiikyii :chēē kiibātisāniisyē. 3Yu kēēnkēt :Yēēsu kule kaakukas :Farisaayeek ng'aleechaa, kung'eetee Yuuteeya ankooyeey Kalilaaya. 4Kumii kōōyēēyē, kumur kōōrēētaab Samaryaa. 5Yu kimurē Samaryaa kuyit yēē kibo kiriinkēēt ake nyēē /kikēēkuurēē Sikaar yēē kilēēkitēē mbaraanaa kiikoochinē :Yāākōbō wērinyii Yōōsēēf. 6Kimii :riibkēētaab Yāākōbō yooto. Kuyitē :Yēēsu riibkoonoo, kōōbuur ng'wēny, kuuyu kikiikuchaas. Kikiikuriikta :asiista taman āk āyēēng'. 7Yooto kuchō :koorkēēt ake nyēbo biikaab Samaryaa. Kumwoochi :Yēēsu koorkoonoo kule, "Ānkiikōōnoo bēēko ayyee." 8Kikiikuba :rubiikyii kiriinkoonoo bakwaal āmiik. 9Kuwālchi :koorkoonoo Yēēsu kule, "Ntēē anii cheebsamaryaa, ku inyiing' Yuutāyiin. Imuuchāktōōs kule nee iteebeenaa ākōōning' bēēko iyyee?" Kimwooy :koorkoonoo kuu nyooto kuuyu kimākāsyiintōōs :Yuutayeek āk Samaryeek. 10Ām yooto kuwālchi :Yēēsu kule, "Nto 'inkētē kiyēē imuuchē kukōōnu :Yēyiin, ānkiinkētē chiichi soomiing' bēēko kuyye, nto 'kēētēēbēē kukōōning' bēēko chēē kōōnu soboonto." 11Kumwoochi :koorkoonoo Yēēsu kule, "Boontēēt nto yu -mēēboontē terekyeet nyēē sāārāmunēēniing' ankukooy :riibkēēt. +Mēēnyōōrchi ānō :inyiing' bēēchooto kōōnu soboonto? 12Kuuko Yāākōbō nyēē kikōōnēēch riibkooni. Kiyyēē :Yāākōbō āk lōkōkyii kuboonto keey āk boroobikyii bēēkaab riibkooni. Imāchē iyib keey kule ibiirē :inyiing' Yāākōbō?" 13Yooto kuwālchi :Yēēsu koorkoonoo kule, "Matakwaam :melelta chii ake tukul nyēē yyēē bēēkaab riibkooni. 14Nto chii ake tukul nyēē kayye bēēko chēē kāākoochi :anii, mā-āmē nyoo :melelta subak. Ām chiichoo mākuyēk :bēēchoo +māākoochi :anii koong'ta nyēē kulkulunēē :bēēkaab soboonto ākookoy." 15Kumwoochi :koorkoonoo Yēēsu kule, "Lēyyē, ānkiikōōnoo bēēchooto, ōō, boontēēt, sima-ama :melelta subak, amatawaaram bēy." 16Yooto kumwoochi :Yēēsu koorkoonoo kule, "Wēēkuur saanteeng'uung' ānkiiyēēwu yu." 17Kuwālchi :koorkoonoo Yēēsu kule, "Ntēē -māāboontē saannyaa." Kuwālchi :Yēēsu koorkoonoo kule, "Imwooyē man. -Mēēboontē saannyaa. 18Kiikoomutiing' :murēnik muutu, nto chiito nyoo iboontē keey mēēbērē saanteeng'uung'. Man :kiyēē 'kēēmwoowoo." 19Ām yooto, kumwoochi :koorkoonoo Yēēsu kule, "Kaakas kule ākoo iwuuyē wōōrkooyoo. 20Kikutunkyinēē :mbo kuuko Yēyiin lekemaani nto akweek Yuutayeek ōmwooyē kule wōlēē yemaat /kēēkutunkyinēē Yēyiin ku Yēērusālēēm." 21Kimwoochi :Yēēsu koorkoonoo kule, "Kas kiyēē āmwooyē, mii :bēsyēēt nyēē mēēbērē mākukutunkyinēē :biiko Baaba Yēyiin lekemaani nto ku Yēērusālēēm. 22Ōkutunkyinē :akweek Samaryeek kiyēē -mōōnkētē, nto acheek kiinkētē kiyēē kēēkutunkyinē kuuyu chōōnēē :kaararaacheet wōlēē mii :Yuutayeek. 23Nteenee mii :bēsyēēt nyēē makuyit, ankookuyit mbo :bēsyoonooto, yēē mākukutunkyinē :biiko chēbo man Baaba ām Tāmirmiryēēt āk manta. Māchē :Baaba biiko chēē sooyē kuu nyooto. 24Yēyiin ku tāmirmir, kunyoo māchāktōōs :biiko chooto sooyē Yēyiin kukutunkyinē ām kēēltaab Tāmirmiryēēt āk manta." 25Yooto kumwooy :koorkoonoo kule, "Ānkētē kule mākuchō :Kāārārookiintēēt" (nyoo /kēēkuurē kule Kiriistō.) "Yoo kāchō :Kāārārookiintoonoo mākōōboorwēēch kiy ake tukul." 26Kuwālchi :Yēēsu kule, "Ntēē anii nyooto āmiitē āng'ālooluung'." 27Ām āsiiswēchooto kōōyēēw :rubiikaab Yēēsu. Yu kayit, koolat :rubiichoo miisin kukas Yēēsu kung'āloolē ākoo koorko. Nteenee māmii ām bichoo :nyēē kiteebee koorkoonoo kule, "Imāchē nee?" nto kuteebee Yēēsu kule, "Ām nee siing'alaal āk koorkooni?" 28Yooto kubakaakta :koorkoonoo tērēētaab bēēko ankooyeey areet akeenke ākoy kiriinkoonoo ānkumwoochi biiko ām wōlooto kule 29"Lēyyē, biikyoo okwaa bookas chii nyēē kāmwoowoo kiy ake tukul nyēē kyaayey! Kut ku mā Kāārārookiintēēt?" 30Ām yooto, kung'ēētyo :biiko ām kiriinkoonooto ānkutākyi keey wōlēē kimii :Yēēsu. 31Yooto kimii :rubiik kusooysooyē Yēēsu kumwoochinē kule "Kāānēētiintēēt, ānkii-āmiisyē." 32Nteenee kumwoochi :Yēēsu rubiichoo kule, "Āboontē āmnyoo nyēē -mōōnkētē :akweek." 33Yooto kuteebee keey :rubiik kule, "Ara mii sōō :chii nyēē kāākuyibchi āmnyoo." 34Kumwoochi :Yēēsu rubiichooto kule, "Āmnyoontēēnyuu ku ayey mākuutēkaab Baaba nyoo kiiyookwoo ānkāāwoong'u yiisyēēt nyēē kimākwoo chaayey. 35Ōmwooyē sōō nee kule, 'Kāākung'ēt :ārook ang'wanu /kēēkēsiis?' Kāāmwoowook kule, okas ānkōōrōōtootē mbareenichuut. Kaakuleelakiitu nyēē kaakuyem /keekes. 36Mii mbo raat kuu nyiitēnyi /kēētuwēnē kēsiintēēt ānkumii kukēsē āmnyoontēētaab soboontaab kibchuulyo sukung'eet kung'erech :nyoo choonsē āk nyoo kēsiisyē. 37Man ng'ālyoontoonoo /kēēmwooyē kule, 'Choonē ake, kukes :ake.' 38Kāāyooktook bōōkēsiisyē ām mbar nyēē manooyey yiisyō. Kitoowu :alake yiisyēēt nteenee boowaang'te :akweek." 39Kiikaasee keey Kāārārookiintēēt :biikaab Samaryaa chēē chaang' ām kiriinkoonoo, kuuyu kimwooy :koorkoonoo kule, "Kimwoowoo :Yēēsu kiy ake tukul nyēē kyaayey." 40Nto yu kabakukwa :bichoo bo Samaryaa yooto kimii :Yēēsu, kusaaysaay Yēēsu kōōbuurto keey icheek. Kuchām :Yēēsu kōōbuur wōlooto bēsyōōsyēk āyēēng'. 41Kiikaasee keey :biiko alake subak chēē chaang' inee kubo kiyēē kimwooy. 42Kimwoochi :bichoo koorkoonoo kule, "Mēēbērē kakiikaasee keey Yēēsu kuuyu 'kēēmwoowēēch, nteenee kuuyu kakeekas :acheek nkit kiyēē kāmwooyē. Kāākiinkēt kule inee ku Kāārārookiintēēt man nyēbo biiko tukul." 43Nto yu kāākōōbuur :Yēēsu wōlooto bēsyōōsyēchoo āyēēng', kung'eetee yooto ānkuwo ākoy Kalilaaya. 44(Kikiikumwooy :Yēēsu kule, -/mākēēkoonyitē ng'ālooltooyiintēētaab Yēyiin ām kōōrēēnyii.) 45Yu kāwokuyit :Yēēsu Kalilaaya kutorooch :biikaab wōlooto. Kiyey :bichoo kuu nyooto kuuyu yoo kibēētii bākwoomē saakwaanaa bo keeytaayeet ām Yēērusālēēm, kikiikukas :bichoo kiyēē kiyey :Yēēsu ām wōlooto. 46Ām yooto, kooyeey :Yēēsu kiriinkoonoo bo Kaana ām Kalilaaya wōloo kiwēēchēē bēēko kuyēk tifaayiik. Kimii :kāāntōōyiintō nyēbo yiisyēētaab bāytooyiisyēētaab kōōroonooto nyēē kiboonto wērinyii nyēē kimnyoonē ām kiriinkēētaab Kaabernaam. 47Yu kāwokukas :kāāntōōyiintoonoo kule kāākuchōōnēē :Yēēsu Yuuteeya kuchō Kalilaaya, kuwo wōlooto kimii :Yēēsu ankusaaysaay kuwo Kaabernaam wokōōsoobchi wērinyii nyēē kimnyoonē miisin kut kikiikuriik kume. 48Ām yooto, kumwooy :Yēēsu kule, "-Mōōyēnchinē :akweek, sōō, ng'al, ākoy /keeyey kiy nyēbo kwong'uut?" 49Kumwoochi :kāāntōōyiintoonoo Yēēsu kule, "Chōō keebe, ōō, boontēēt, kumanaame :leekweet." 50Yooto kuwālchi :Yēēsu kule, "Wē :inyiing'. Soboot :lekweng'uung'." Kiiyēnchi :chiichoo kiyēē kimwoochi :Yēēsu ānkuwo. 51Nto yēē kimii :kāāntōōyiintoonoo kēēltaab too, kutuuyēē motwoorikyii chēē kimwoochi kule, "Miitē wēring'uung' kusoboot." 52Kuteebee :kāāntōōyiintoonoo bichooto kule, "Kutyaa yēē kōkāykāyiitu :wēēriit?" /Kēēmwoochi nyoo kule, "Kōlēsē :bōōroo lang'at kāsolēny kumii :asiista akeenke." 53Ām yooto, koosoot :kwaaniitaab wēēroo kule ki āsiiswēchooto kimwoochinē inee :Yēēsu kule "Soboot :lekweng'uung'." Kiikaasee keey :chiichoo ākoo kanyii tukul Yēēsu. 54Ki baantaab āyēēng' :nyiitēnyi kuyēyē :Yēēsu ng'ālyoo nyēbo kwong'uut kuchakee kēēyēēwunēē Yuuteeya kuchō Kalilaaya.

will be added

X\