Yoowaana 3

1Kimii :kāāntōōyiintēēt ake nyēē ki *Fārisooyiin nyēē kibo kōōkwēētaab Yuutayeek nyēē /kikēēkuurēē Nikōtēēmō. 2King'eet bēsyēēt ake kwēēmooy kuwo :chiichoo wōlēē kimii :Yēēsu ānkumwoochi kule, “Boontēēt, kiinkētē kule inyiing' kāānēētiintēēt nyēē kiiyookuung' :Yēyiin. Āmwooyē kuu nyooto, kuuyu māmii :chii nyēē imuuchē kuyey ng'al chēbo kwong'uut kuu yoo 'kēēyēyē :inyiing', yoo mēēbērē boonto :chiichoo kāāmuukēywēēkaab :Yēyiin.” 3Ām yooto, kuwāl :Yēēsu kule, “Āmwoowuung' manta kule, māmii :chii nyēē makukas bāytooyiisyēētaab kaab Yēyiin yoo /mānāākēēsich subak.” 4Yooto kumwooy :Nikōtēēmō kule, “So, imuuchāktōōs kule nee /kēēsich chii subak nyēē kiikuwōōyiit? Ābērē mēēmuuchāktōōs kōōwut :chii mooyēētaab kaamet /ānkēēsich subak.” 5Kuwālchi :Yēēsu kule, “Āmwoowuung' manta kule, māmii :chii nyēē iwutē kaab Yēyiin yoo /mānāākēēsich ām bēēko āk nkinee Tāmirmiryēētaab Yēyiin. 6Sichē chiito :kwaan āk kaamet, nteenee yoo sukubooyiit :chiichoo Yēyiin ku māchāktōōs /kēēsichēē chiichoo Tāmirmiryēētaab Yēyiin. 7-Meelat yoo kāāmwoowuung' kule ‘Māchāktōōs /kēēsichook subak.’ 8Kāsē :chiito kuwusē :yoomeet āmēēnkētē wōlēē chōōnēē nto wōlēē wēētii. Wuu yooto wōlēē siktooy :Tāmirmiryēētaab Yēyiin chiito.” 9Ām yooto kuteeb :Nikōtēēmō kule, “Yēyāktōōs :yooto kule nee?” 10Kuwāl :Yēēsu kule, “Ntēē inyiing' kāānēētiintēēt nyēē wōō ām kōōrēētaab *Isirāyēēl, -'mēēnkētē ng'aleechu? 11Āmwoowuung' manta kule, āmwooyē kiyēē ānkētē, ānkāārāru kiyēē kyaakas. Ānkoo ku wuu nyooto, -mōōchāmē kiyēē āmwooyē. 12Kwāāmwoowook ng'aleekaab kōōrooni, āmōōyēnwoo. Kunyi, ii, ōmuuchē raat kule nee ōyēnchi ng'aleek chēē +māāmwoowook chēē kwoonēē Kaab Yēyiin? 13Māmii :chii ām kōōrooni nyēē kiikuwo Kaab Yēyiin, nteenee *Chiitaab Barak nkit nyēē kichōōnēē wōlooto. 14Kunyoo, kuu yoo kiitōrōōrchinē barak *:Muusa eereenaanaa ām kōōroonoo ki surkwēēn, ām kēēlto nyēē wuu nyooto, +/mākiitōrōōr Chiitaab Barak, 15sukung'eet :chii nyēē keekaaseenaa keey kunyōōr *soboontaab kibchuulyo.” 16Kicham :Yēyiin kōōrooni miisin kut kukōōn lekwenyii nyooto akeenke baateey sukung'eet :chii ake tukul nyoo ikoosēē keey lakwanaa mēēbērē mākubot, nteenee mākunyōōr *soboontaab kibchuulyo. 17Mēēbērē kiiyooku :Yēyiin lekwenyii sichakooruusta biiko, nteenee kiiyooku kule sichakooraraach. 18-/Mākiiruustooy chiito nyoo keekaasee keey lakwanaa. Nteenee iruustaat nyoo -mēēkoosēē keey, kuuyu manaakookaasee keey lakwanaa bo Yēyiin nyoo akeenke baateey. 19Wuu nyi :wōlēē +/makeeyeyta kaaruustaayaanaa. Kiikuchō :lēbkēēyyēēt kōōrēēt, nteenee kucham :biiko mēēnānēēt yoo kātāchāmē lēbkēēyyēēt. Kiyey :bichoo kuu nyooto, kuuyu ng'ōōkisto :kiyēē kiyēyē. 20Chii ake tukul nyoo yēyē ng'ōōkisto kuwēchē lēbkēēyyēēt kuuyu māmāchē kuchō wōlēē mii :lēbkēēyyēēt kuuyu imuuchē kutook :ng'ōōkisnyii. 21Nteenee chiito nyoo yēyē ng'aleekaab manta, kuchōōnii wōlēē mii :lēbkēēyyēēt sukung'eet kōōboor :lēbkēēyyoonoo kule kiyēē yēyē :chiichoo ku kiy nyēbo koonyit ām wōlēē mii :Yēyiin. 22Yu kāākuyityo, kung'eetee :Yēēsu ākoo rubiikyii Yēērusālēēm, ānkubēēni yēēmēētaab Yuuteeya bēsyōōsyēk chēē ng'ēri kōōbātisāniisyē. 23Kimii :nkinee Yoowaana kōōbātisāniisyē ām yēē /kikēēkuurēē Aynoon yēē kimālōō ām yēē /kikēēkuurēē Sālim. Kiibātisāniisyēē yooto kuuyu kichaang' :bēēko ām wōlooto. Kibēētii :biiko kwaak wōlooto /bākiibātisānē. 24(Kiyēyāktōōs :ng'aleechu kutoombo /keekerta Yoowaana kāābrātiisyō.) 25Kikwiilē keey :rubiik alake chēbo Yoowaana ākoo Yuutāyiintēēt ake kubo ntāsimuutēkaab kāātiliilēēt kurubta keey ākoo ātēbuutēkaab Yuutayeek. 26Kunyoo, kubēēchi :rubiichooto Yoowaana ānkumwoochi kule, “Kāānēētiintēēt, tēēsōōtē chiichoo kyōōboontē keey ām biitēēt ake nyēbo āynēētaab Yoortaan, chiichoo 'kiing'āloolēē? Mii :chiichooto kōōbātisāniisyē kuu nyiitēnyi, ānkāākōōwuuy :biiko tukul.” 27Ām yooto, kuwālchi :Yoowaana kule, “Māmii :chii nyēē nyōōru kiy yoo mānāākōōkoochi :Yēyiin. 28Kyōōkāsē :akweek nkityō āmwooyē kule ‘Ma anii *Kāārārookiintēēt, nteenee /kisimkiiyookwoo āntōōwunēē Kāārārookiintoonoo.’ 29Ām saakweetaab kooyēēyto, bo :chēēbto kāāmutiintēēt. Nteenee kānyiisyē :choorweetaab kāāmutiintoonoo ām kaab kooyēēy nto yoo kāsē kung'ālooloonu :kāāmutiintoonoo kung'ērēchē. Kunyi kaakuchurta :ng'erekweekyuu. 30Māchāktōōs kutōrōriit :Kāārārookiintēēt ankaachuchuku :anii.” 31Boonto :chiichoo chōōnēē Barak kāāmuukēywēēk kubiir chii ake tukul. Nto chii nyoo bo ng'wēny kubo :nyoo ng'wēnyuuni, ānkung'āloolē ng'aleek chēē rubtooy keey āk ng'wēnyuuni. Wōō :chiichoo chōōnēē Barak kubiir chii ake tukul. 32Mwoowu :chiichoo kiyēē kiikukas ām koonyekyii āk yiitiikyii, āmāmii :chii nyēē kāsyinē ng'aleechaata. 33Nteenee chiito nyoo chāmē ng'aleechaata, kuchāmchiintōōs kule bo man :Yēyiin. 34Mwoowu :chiichoo kiiyooku :Yēyiin ng'aleekaab Yēyiin, kuuyu ikoochinē :Yēyiin Tāmirmiryēēnyii kuyem. 35Chāmē :Yēyiin lekwenyii ānkiikōōtōōrchi kiy ake tukul āwunnyēkaab lakwanaa. 36Chii nyoo ikoosēē keey lakwanaa kunyōōru *soboontaab kibchuulyo. Nto chii nyoo mēēbērē chāmē kiyēē mwooyē :lakwanaa mānyōōru soboonoo, nteenee mākōōng'woonchi :Yēyiin chiichoo.

will be added

X\