Yoowaana 13

1Yooto kikiikuriik :bēsyēēt nyēē /kyoomēē *Saakweetaab Keeytaayeet. Kiinkēt :Yēēsu kule kikiikuyityi :asiisnyii nyēē makung'eetee kōōrooni ānkuwo wōlēē mii :Kwaan. Kichāmē biikyii choo kiboonto keey kwaak ānkuchāmē ākoy tabanta. 2Kimii :Yēēsu kwoomiisyē āk rubiikyii kāsolēny. Kikiikuyey yooto :Kibrōkōsyoontēēt Yuuta Iskaryoot araab Simōōni kule kuchaamta Yēēsu. 3Kiinkēt :Yēēsu kule kikiikōōkoochi inee :Kwaan kāāmuukēywēēk nyēē kimii :kiy ake tukul āwunnyēkyii. Kiinkētē subak kule kichōōnēē :inee wōlēē mii :Yēyiin anki makooyeey wōlooto. 4King'eet :Yēēsu ām yooto kōōrēēk kāāliikēēnyii. Nto yityo, kusiriny sireenyii ake ankunam ankeet nyēē abuus kumootee keey. 5Nto mii yoo, kuroonkyi bēēko karaayiit ānkutoow kōōwuunoot kērēēnkōōkaab rubiikyii. Kimāsēē kērēēnkōōchoo ankaanaa kikimootee keey. 6Kiyeyaat :Yēēsu kuu nyooto nto yu kayit yēē kimii :Simōōni Bētērō, kumwoochi :nyoo Yēēsu kule, “So, Mokoryoontēēt! Imāchē iwuun kērēēnkōōkyuu?” 7Kuwālchi :Yēēsu kule, “-Mēēnkētē kiyēē āmiitē āyēyē kuu nyi, nteenee +mēēnkēt lētuunoo.” 8Kutāyiis :Bētērō kumwooy kule, “Acha! -'Mēēwuunwoo kērēēnkōōk mbo kisich.” Kumwoochi :Yēēsu Bētērō kule, “Yoo kāmāāwuunuung' kērēēnkōōkuuk mēēmuuchāktōōs tākiibuurtooy keey.” 9Kumwoochi :Bētērō kule, “Yoo wuu nyooto nanyuun, ii, Mokoryoontēēt, -'mēēwuun kērēēnkōōkyuu baateey, nteenee iwuunwoo nkinee mētit āk āwunnyēk.” 10Kuwālchi :Yēēsu Bētērō kule, “Chiito nyoo kāākōōwuun keey, ku tiliil :nyoo. Māchāktōōs baateey kōōwuun kērēēnkōōk. Ōtiliilēch :akweek tukul nteenee mii :akeenke ām akweek nyēē mā tiliil.” 11Kikiikōōnkēt :Yēēsu chiito nyēē ki makuchaamta inee. Kiyooto nyēē kimwooytēē kule, “Mii :akeenke ām akweek nyēē mā tiliil.” 12Yu keewaany :Yēēsu kōōwuun kērēēnkōōkaab rubiichoo, koolaach kāāliikoonoo ankooyeey wokōōbuur ng'wēny wokwoomiis. Ām yooto kumwoochi :Yēēsu rubiikyii kule, “Ara, kōōnkēt kiyēē kātāāyēyē? 13Ōkuuroo kule, ‘Kāānēētiintēēt’ nto kule ‘Mokoryoontēēt.’ Wuu nyooto kuuyu man āwuuyē nyooto. 14Nto ānkoo āwuuyē :anii Mokoryoontēēng'woong' āk kāānēētiintēēng'woong', kāāwuunwook kērēēnkōōk, kunyoo māchāktōōs :nkakweek ōwuunchinē keey kērēēnkōōk. 15Kaayey kiy nyēē kāāboorwook kiyēē sōōyēyē :nkakweek kuu yoo kātāāyēwook :anii. 16Kāāmwoowook manta, mā wōō :motwooriintō kusiir Mokoryoontēēnyii āmā wōō :kāāyookiintō kusiir chiito nyoo kēēyooktooy. 17Yoo ōkāsē ng'aleechu kātāāmwoowook, ku mākōōbēruurook :Yēyiin yoo kooyey! 18-Māāng'āloolēēnook akweek tukul, ānkētē choo kyaakwey. Nteenee māchāktōōs kuyityiin :siruutēkaab Yēyiin :yēē mwooyē kule, ‘Kiwēēkyoo keey :chiito nyoo kikyoomiisyē :tukwaay.’ 19Kāsimāmwoowook ng'aleechu ku mānāāyēyākiis, si yoo yēyāktōōs ku +mookaaseenaa keey kule anii nyooto. 20Kāmwoowook manta, nyoo toochē chiito nyoo āyooktooy, kutoochoo :chiichoo. Nto nyoo toochoo, kutoochē nkinee nyoo kiiyookwoo.” 21Yooto keewaany :Yēēsu kumwooy ng'aleechaata, kung'woonchi miisin ānkumwooy nyēē manaawuny kule, “Kāāmwoowook manta, mii :akeenke ām akweek nyēē makuchaamtaa.” 22Kukas keey :rubiik kukanam kuut ānkulē, “Ara ng'oo raat ām acheek nyooto /kēēmwooyē!” 23Kikitiing'to Yēēsu :rubiintoonoo kichāmē. 24Yooto kubutēē :Bētērō rubiintoonoo koong'ta kuteebee Yēēsu kule ki ng'oo :nyooto kimii :inee kung'āloolēē. 25Kōōnookyi :rubiintoonooto Yēēsu ankuteebee kule, “Ng'oo :nyooto, ōō, Mokoryoontēēt?” 26Kumwoochi :Yēēsu kule, “+Maalablaabte mukaatiit suutēēk. Nto chiito nyoo +māākoochi mukaatiinaa kwaam, ku chiito :nyooto.” Kunam :Yēēsu mukaatiinaa ankoolablaabta suutēēk nto yityo kōōyokoochi Yuuta Iskaryoot araab Simōōni. 27Yu kanam :Yuuta mukaatiinaa kuwēēchi :Kibrōkōsyoontēēt bakeenke. Kumwoochi :Yēēsu chiichoo kule, “Ānkiisārchi kiyēē imāchē iyey.” 28Kimēēnkēt :chii ām bichoo kyoomiisyē tukul kule ām nee sukumwoochi :Yēēsu Yuuta kuu nyooto. 29Kiisōōtē :rubiik alake kule kuuyu ki Yuuta :nyēē kikōnōrē beesaanik, tōōs kāmwoochi :Yēēsu inee wokwaal tukuukaab saakweet nto kule kōōkoochi biiko choo bānoon kiy. 30Yu kanam :Yuuta mukaatiinaa, kuchuyta bakeenke. Yooto kikiikuchō :mēēnānēēt. 31Yu kaakuchuyta :Yuuta, kumwooy :Yēēsu kule, “Tooku ra :wōōyintaab *Chiitaab Barak ānkutook :wōōyintaab Yēyiin kubununēē inee. 32Yoo kātook :wōōyintaab Yēyiin kubununēē Chiitaab Barak, mākōōkoochi :Yēyiin wōōyinto nyoo boonto ānkuyēyāktōōs :ng'aleechaa yooto bakeenke. 33Lēyyē, lōkōkyuu, -mēētākiibuurtooy keey akweek nyēē lōō. +Moocheeng'aa nteenee āmwoowook akweek kiyēē kikyāāmwoochi kāāntōōyichoo bo Yuutayeek kule, ‘-Mōōbēētii wōloo +māāwē.’ 34Mākuutyēēt nyēē lēēl nyēē +māākōōnook ku nyi: Ōchoomnyē. Kuu yoo kyāāchāmook :anii, ōchoomnyē :nkakweek kuu nyooto. 35Yoo ōchoomtōōsii, mākōōnkēt :biiko tukul kule ōwuuyē rubiikyuu.” 36Nto tēē yoo, kuteebee :Bētērō Yēēsu kule, “Imāchē iwē ānō, ōō, Mokoryoontēēt?” Kuwālchi :Yēēsu Bētērō kule, “-Mēērubwoo :inyiing' wōlēē +māāwē :anii kuu nyi, nteenee +meerubwaa lētuunoo.” 37Kuteebee :Bētērō Yēēsu kule, “Ām nee simaarubuung' raat, ōō, Mokoryoontēēt? Āchāmē ameey kubo inyiing'.” 38Ām yooto, kuwālchi :Yēēsu Bētērō kule, “'Keecham :inyiing' man imeey kubo anii? Kāāmwoowuung' manta, kutoombo kooturkuuch :kirkōōnkiit, +meetuuch keey areet sōmōk kule -'mēēnkētoo.”

will be added

X\