Yāākōbō 3

1Mbo ng'eetaabiya, -moocheeng' :chēē chaang' ām akweek kule nto ōyēku kāānēētikaab ng'ālyoontēētaab Yēyiin. Āmwooyē kuu nyooto kuuyu ōnkētē kule /kiikwēnyēēch miisin acheek choo kiinēētē ng'ālyoontēētaab Yēyiin, yoo /kiitiilchinē biiko ng'aleek. 2Kiichiwiitē :tukul ng'al ku chaang'. Nto yēē -mēēchiwiitē :chii ām ng'alaaleet, ku churtaat :chiichoo ānkōōmuuchē kuriib soboonnyii tukul. 3/Keemwa baa kule kēēboontē faraasiit. Yoo /kākiikoochi kiito ake kuutiit /ānkiitut kuweech keey :tyoonyoo. Yoo kaakeeyey kuu nyooto, ku kaakeebayte tyoonyoo tukul. 4Kerkeey mbo subak āk mwēēnkōōsyēk chēē wōōyēch ām araarayta. Yoo irēētootē :yoomeet nyēē nyikiis, ku mii :kiy nyēē mining' miisin nyēē wēēchwēēchootēē :chiito nyoo yibē sukutākyinootē wōlēē kāmāchē kule kuwo. 5Ām kēēlto nyēē wuu nyooto, kēēboontē ng'elyebta. Mining' miisin ānkung'āloolē ng'al chēē wōōyēch. Okas baa mbo subak kule imuuchē :maat nyēē mining' kubeel wōōkēēt nyēē tēē wōli āk wōliin! 6Kōrōōm :ng'elyebta nkinee kuu maata. Ām bōōrtaab chiito kumukuul, ng'elyebta :nyēē kiwung'ta keey rōkōs nyēē -/mākyoomu. Nyēērēē :ng'elyebta chiito kutukul ānkōōwuruurē :Kibrōkōsyoontēēt. 7Kiikuriiboon :biiko ānkutākuriibē tyoong'iik kunam wōlēē mii :tāriitēk alake, tyoong'iik choo ichuutēē keey ng'wēny āk alak choo mii wōloo bo araarayta. 8Nteenee māmii :chii mbo akeenke nyēē kiikoomuuch kut kuriib ng'elyebta. Kibrōkōsyoo :ng'elyebta ānku wayway ānkuboonto ng'woonēēt nyēē kōrōōm miisin. 9Kēēyēyiisyēē ng'elyebta kiikoostēē Mokoryoontēēt āk Baaba Yēyiin. Nto mii yoo subak, kēēyēyiisyēē ng'elyebiitēnyi kēēchubēē biiko choo kiyēyē :Yēyiin kookerkeeyee keey inee. 10Kunyoo, kuutiini akeenke nyēē kēēsiltēē Yēyiin nto yityo subak kēēchubiisyēē. Mbo ng'eetaabiya, māmāchāktōōs kuyeyakay kuu nyooto. 11Mēēmuuchāktōōs kukulkulunee :bēēko chēē kāroomēch āk chēē chāmu muunyeet yēē bo koong'ta akeenke. 12Nto, mbo subak, ii, mbo ng'eetaabiya, -mēēmuuchē :lāmāywēēt kuyey mbuuniik, āmāyēyē :kōmōōlwēēt lamayeek. Kunyi, -mēēmuuchē kukulkulunee :bēēko chēē kāroomēch yēē bo koong'ta nyēbo bēēko chēē chāmu muunyeet. 13Mii :chii ām akweek nyēē boonto kiirnātēēt ānkukāsē ng'al? Yoo miitē, ku māchāktōōs /kēēkāsēē kiirnātēēnyii kubununēē kiyēē yēyē ām ntusātēēt. 14Nteenee, yoo kawung'ta keey :chii tuuyin bo moo āk sooynān nyēē ng'waa nyēbo muchas, ku māmākyinē kung'āsē keey ānkuyēyootē ng'wiiynaneet kukwiilē ng'ālyoontēētaab manta. 15Bo :ng'aleek chēē wuu choo kōōrooni āmēēbērē kwoonēē kaab Yēyiin. Mārubtooy keey āk Tāmirmiryēētaab Yēyiin ānku bo Kibrōkōsyoontēēt. 16Biiko choo tuuyēch :mooni ānku soyiik kubo muchas, ku chuunchuuntōōs ānkuyēyē ng'al chēē miyootēch chēē choong'ēch. 17Nteenee tiliil :kiirnātēēt nyēē chōōnēē wōlēē mii :Yēyiin. Bo tāloosyo āk ntusātēēt. Kuyibē keey ng'wēny, kuriirēē biich ānkōōbooru tukuuk chēē kāroomēch chēē kwoonēē yēyuutēk. Mātinyē kweyateet āk lembech. 18Yoo kachaan :biikaab kaalyeet churtaayeet, /mākēēnyōōr churtaayeet.

will be added

X\