1 Ōbērbērēch :Kalaatyeek sōō nyēē tyaa! Keewarwaaraak :ng'oo, ēē? So! Ntēē /kikiiboorwook kutook kiyēē kibur sukumēēchi :Yēēsu murtooywoontēēt. 2 Lēyyē, ānkōōmwoowoo ng'ālyoontooni: kyōōnyōōru Tāmirmiryēētaab Yēyiin kuuyu kyoorub kiruutēkaab Yuutayeek, ēē, nto, kuuyu kyōōyēnchi kiyēē /kikyoomwook? 3 Ōbērbērēch nyēē -/mākyoomu. Ara, yu kyōōtoowunēē onam Tāmirmiryēētaab Yēyiin, nto yityo, neennyi ōmāchē kule boowaang'tee ōrubē kāāsōōtēywēēkaab biiko buch! 4 Ōmāchē ōmwoowoo kule kyōōnyāliilchē kubo tukuuk chēē tēē choo nyēbo buch? Kubooyiit man, kimābo buch. 5 Kikōōnook :Yēyiin Tāmirmiryēēnyii ankuyey tukuuk chēē /kiilātē ām wōlēē ōmiitē kubo kule kyōōyēnchi kiyēē /kikyoomwook. Mēēbērē kikōōnook kubo kule kyoorub wōlēē wuu :kiruutēkaab Yuutayeek. 6 Okasee baa Abraam nyoo kiiyēnchi Yēyiin. Yooto nanyuun kuchamta :Yēyiin Abraam kule ākoo ki chii nyēē churtaat. 7 Kunyi, māchāktōōs ōnkēt kule biiko choo iyēnchinē Yēyiin kuu Abraam ku biikaab Yēyiin :choo kuchurta. 8 Kisimkōōboor :siruutēkaab Yēyiin kule mākōōtiilchi :Yēyiin biiko choo ma Yuutayeek kule mākuyēk biich chēē churtootiin yoo kāākōōyēnchi inee. /Kikiiboorunēē yooto yoo kimwoochinē :Yēyiin Abraam kule “Mākōōbēruurākiis :biiko tukul chēē mii kōōrēēt kubununēē inyiing'.” 9 Kunyoo, kōōbēruurākiis :biiko tukul choo iyēnchinē Yēyiin kuu yoo kiiyēnchinē :Abraam. 10 Nteenee chubootiin :biiko tukul choo swēē kiruutēk. Āmwooyē kuu nyooto, kuuyu mwooyē :siruutēkaab Yēyiin kule, “Chuboot :chii ake tukul nyoo mātāsē taay kuyēyē tukuuk tukul kuu yoo /kikēēsirchi kitaabuutaab kiruutēk.” 11 Nteenee kubooyiit man, māmii :chii nyēē chāmtooy :Yēyiin kule churtaat kubo kule rubē kiruutēk. Āmwooyē kuu nyooto kuuyu mwooyē :siruutēk kule, “Nyōōru soboonto :chiito nyoo churtooy kukeekaasee keey Yēyiin.” 12 Yoo rubē :chii kiruutēk ku māmāchāksē :nyoo kōōkoosēē keey Yēyiin. Nteenee chiito nyēē kāswēē kiruutēchoo, ku mākōōtiiny nyoo :kiruutēk ākookoy. 13 Kiwālāng'wēēch :Kiriistō kēēng'ēētyēē chubiisyēētaab kiruutēk, yoo kichubāktōōs :inee kubo acheek. Āmwooyē kuu nyooto kuuyu mwooyē :siruutēk kule, “Kuchubākoy :chii nyoo /kākiikārtootyi keet.” 14 Yoo kiwālāng'wēēch :Kāārārookiintēēt Yēēsu /kiibēruur nkicheek biiko choo ma Yuutayeek kuu yoo /kikiibēruurē Abraam ām taay. /Kikeeyey kuu nyooto sikēēnyōōru Tāmirmiryēēt nyoo kikuurtoowēēch :Yēyiin yoo kiikoosēē keey inee. 15 Mbo ng'eetaabiya, okany, baa, āboorunēēnook ng'aleechu wōlēē kēētēbtooy kwaak: Yoo kāākuyēchiin :biiko āyēēnku kiirootyeet ām kiyēē kāākukāsyiin, ānkōōtiinkyi āwunnyēk ku māmii :chii nyēē imuuchē kwiiri. Kerkeey :yooto āk ng'aleechu. 16 Kikuurtoochi :Yēyiin Abraam kiy āk kesennyaanteenyii. Mēēbērē mwooyē :siruutēk kule keseniisyekyii ku wuu nyēē ibooru :yooto kule biiko chēē chaang'. Acha, nteenee ng'āloolēē chiito akeenke yoo mwooyē kule “kesennyaanteet” nto chiichooto ku Kiriistō. 17 Kiyēē āmiitē ābooru ku nyi: Kiyey :Yēyiin kiirootyeet āk Abraam. Kunyoo, -mēēmuuchē :kiruutēk choo /kibākēēyēyē ām kēnyiisyēk bokolwookik ang'wan āk sosom lētuunoo kuweechweech kiirootyaanaa. Kunyi, -mēēmuuchē kutilta :kiruutēkaab *Muusa kiyēē kiikukuurtoowēēch :Yēyiin. 18 Nto yoo kānyōōr :chii rōōbēywoontēēt kubo yu karub kiruutēk, nto mēēbērē /kiikoochinē kubo yu /kikēēkuurtoochi. Nteenee, kiikoochi :Yēyiin Abraam rōōbēywoontoonoo buch, kuuyu kikiikukuurtoochi. 19 Kibo nee naas :kiruutēk? Okany āmwoowook. /Kikēētās kiruutēk kuuyu choolwookēnē :biiko. Kimāchāktōōs kule kōōbuur :kiruutēchoo ākoy yoo kāākutook :kesennyaantaanaa kibo Abraam nyoo king'āloolēē :Yēyiin. Kiyey :Yēyiin kiruutēchoo ānkōōkoochi *ng'ālooltooyiintēēt kubununēē malayikaanik. 20 Boonto :ng'ālooltooyiintō kubo kwaak komoswookik āyēēng' chēē iyyoonkyinē. Nteenee akeenke :Yēyiin. 21 Ara kimii :Yēyiin kukwiilē keey nkit ām tukuuk chēē kikuurtoochi biiko yoo kikōōnu kiruutēk? Acha, māwuu nyoo mbo kisich! Nto /kikēēkōōnu kiruutēk sukukōōn *soboontaab kibchuulyo, nto kiimuuchē :chiito kutililiit kuchurta ām wōlēē mii :Yēyiin kubo kiruutēk. 22 Nteenee, iboorwēēch :siruutēk kule rātootiin biiko tukul ām choolwookātēēt. Kunyoo, mākōōkoochi :Yēyiin biiko choo ikoosēē keey Yēēsu Kiriistō kiyoo kiikukuurtoochi. 23 Kitākēērātootiin :tukul ām kiruutēk ānkuriibēēch :kiruutēchoo ākoy kuchō :Yēēsu nyoo kiikoosēē keey. 24 /Kikēēkōōnēēch kiruutēchoo kuriibootēēch sikēēyityi Yēēsu /sikiitiilwēēch kule kēēchurtootiin kubo kule kiikoosēē keey inee. 25 Kunyoo, yu kookiikaasee keey Kiriistō kōmēētākuriibootēēch :kiruutēk. 26 Kyōōyēku :tukul lōkōkaab Yēyiin kuuyu, ōkoosēē keey Kāārārookiintēēt Yēēsu. 27 Yu /kabakiibatisanaak ōbooyiitu Kiriistō, olaach ānkōōnoomyē āk inee. 28 Mātinyē kule ng'oo :ng'oo. Yoo ka Yuutayeek nto ku choo ma Yuutayeek nto choo motwoor āk choo mā motwoor, nto nyēē murēn nto nyēē koorko, ku māmii :tēērchinooyēēt nyēē miitē. Ōmiitē :tukul akeenke ām Yēēsu Kiriistō. 29 Kuu yoo ōbooyē Kiriistō, ōyēku lōkōkaab Abraam ānkunyoolu /kēērōōbwook bērurto nyoo kikuurtoochinē :Yēyiin Abraam.
