Yēyuutēk 23

1Yooto, kōōrōōtoot :Bāwulō booyichooto ānkumwoochi kule, “Mbo ng'eetaabiya, ānkētē kule kyaayey :anii yiisyēēnyuu kuyitita kuu wōlēē māktooy :Yēyiin ākoy ku ra.” 2Yu kāmwooy :Bāwulō kuu nyooto, kumwoochi :Ananiiya, *Bēēliintēētaab kōrōsēēk nyēē Wōō, biiko chēē kilēēkitēē Bāwulō kule, “Orabaach kuutiit.” 3Yooto, kumwoochi :nkinee Bāwulō kule, “Makoorabaachiing' nkinyiing' :Yēyiin nyoo iyibē keey kule itiliil ām wōlēēb saang'. Itēbchēē yooto itiilchoo ng'al kurubta keey āk wōlēē wuu kiruutēkaab Yēyiin, nteenee imiitē i-iryēē kiruutēchoo, yoo imwooyē kule /kiirabaachaa.” 4Kumwoochi :biiko chēē kimii yooto Bāwulō kule, “-Mēēmuyē mbo intosuur Bēēliintēētaab kōrōsēēk nyēē Wōō nyēbo Yēyiin?” 5Kukētyi :Bāwulō kule, “Mbo ng'eetaabiya, -māānkētē mbo kule ākoo ka Bēēliintēētaab kōrōsēēk nyēē Wōō kuu yoo mwooyē :siruutēkaab Yēyiin kule, ‘-Meeng'alaal ng'ālyoo nyēē miyaat ām wōlēē mii :bāytooyikaab biikwook.’ ” 6Kiinkētē :Bāwulō kule kiiliinyootiin :bichoo. Ki *Satukaayeek :alake, nto alak ku *Farisaayeek. Ām yooto, kukuur ām kōōk kule, “Mbo ng'eetaabiya, anii Fārisooyiin ānkāāsālu Farisaayeek. Āmiitē raat yu /kiikuumwoo, kuuyu ātinyē mooyēēt kule ng'ēētyēē :biiko meet choo kiikubēk.” 7Yu kāmwooy :Bāwulō kuu nyooto, kuchuunchuun :Farisaayeechaa āk *Satukaayeek. Yooto mbo subak kubuntēē keey :kōōkwēēt. 8(Mwooyē *:Satukaayeek kule yoo kaakume :chiito ku kaakume kutukul. Nto subak, māmii :malayikaanik ākoo tāmirmirook. Nto Farisaayeek, kōōyēnchinē :choo kule mii :ng'aleechaa tukul.) 9Kichēy :taariiryeet nyēē wōō kut kung'ēētyo :kāānēētikaab kiruutēk alake chēē ki Farisaayeek ānkukwiilso nyēē kōrōōm miisin. Kimwooy kule, “Nto yu ākoo māboonto :chiichi lēēlis. Inkētē :ng'oo, nto nyuun kāng'āloolchi inee :tāmirmiryēēt nto ku *malayikeet.” 10Kichuunchuun :biiko miisin kut kuyēk wōōrōōryēēt. Kinam kuut :ng'aleechaa nyēē wōō nyēbo lukēēt kule tōōs sānkātānē ra :biiko Bāwulō kule tōng'! Yu kakas :kāāntōōyiintoonoo bo lukēēt kuu nyoo, kōōyookto biikyii alak chēbo lukēēt kurēkto bākukēwētunēē bichoo Bāwulō ānkukwēryoot kuwo kiyēnkuung'waa. 11Nto mii kwēēmooy, kōōnookyi :Mokoryoontēēt Bāwulō ānkulēēnchi, “Bāwulō, ikiil, -mēēmuy. Kuu yoo 'kwēē-āmchi biiko ām Yēērusālēēm kurubta keey āk anii, +maweeyey kuu nyooto ām Rooma.” 12Nto mii bēsyēēt nyēē kiikēērē, kōōruruuch keey :Yuutayeek ankuyey ruurumuut. Kyaam muumeek kule mākoy kwaam nto kuyye kiy kut kukas kurook kule kaakume :Bāwulō. 13Kikēēytēē artam :biiko chēē kiyēyē ruurumuunoo. 14Kiba :bichooto ākoy wōlēē kimii :bēēliikaab kōrōsēēk chēē wōōyēch āk booyikaab kōōk anku bākumwooy kule, “Kaakyaam :acheek muumeek nyēē -mākiiyēēyē lēt kule -mākyoomē āmnyoo ake tukul nto keeyyee kiy ake tukul ākoy kut keekas kule kaakeebakach Bāwulō. 15Koong'eet :akweek āk booyikaab kōōk ōyookyi nyēē wōō nyēbo lukēēt kuutiit kule /kēēkwēryoon chiichi kuchō taayeeng'woong' ōmāchē kule tōōnyōōru ng'aleek chēē yēmootiin kurubta keey āk ng'aleekyii. Kēēyēytootiin :acheek keebakach chiichi kumanaayit yuutēyu!” 16Nteenee, yu kāwokukas :wēritaab chēēbto nyēbo Bāwulō ruurumuunoo, kuwo ākoy kiyēnkuutaab lukēētaab booryēēt anku wokuchiilchi Bāwulō ng'aleechaa. 17Kukuur :Bāwulō kāāyyoong'iintēēt ake nyēbo lukēēt ānkumwoochi kule, “Kwēryootē, baa, wēēri kuwo wōlēē mii :nyēē wōō nyēbo lukēēt. Ākāsē kule boonto ng'ālyoo nyēē māchē kule kumwoochi.” 18Ām yooto, /kēēkwēryoot wēritkēy ākoy wōlēē mii :nyēē wōō nyēbo lukēēt. Yu kayit, kumwoochi :chiichoo kibo lukēēt nyiin kiwōō kule, “Kēēyookwoo :kibratyaantaanaa /kēēbērē Bāwulō kuut. Nto āyitē yēē kāmii, kusoomo kule amutu wēēri kuchō wōlēē imiitē, kuuyu boonto ng'ālyoo nyēē māchē kule kumwoowuung'.” 19Yooto, kunam :nyēē wōō nyēbo lukēēt wēēroo āwut ānkuwēēto komos sukwaamee lōkōōy. Kiteebee kule, “'Kēēbērē nee?” 20Kumwoochi :wēritkēy kule, “Kāākuchāmchiin :Yuutayeek kule ikwēryootē Bāwulō tuun /bākiiyyoong'tēē taayeetaab kōōkwēēt /sitākēēbēēr ng'aleek chēē yēmootiin kurubta keey āk inee. 21Kunyi, ii, boontēēt, -mēē-āsyi keey bichoo, kuuyu mii :alake chēē kēēytēē artam chēē māchē kule kuwuny keey sukutuchi Bāwulō ankubakach. Kaakwaam :bichoo muumeek kule mākoy kwaam āmnyoo nto kuyye kiy mbo kisich, nteenee ākoy kukas kurook kule kaakubakach Bāwulō. Yēytooyootiin mbo kuu nyiitēnyi kumāchē kukas kuutiing'uung' ām ng'ālyoontoonoo māchē kusoomiing'.” 22Yu keewaany :wēēroo ng'aleechaa, kumwoochi :nyēē wōō nyēbo lukēēt kule kuwēēchi keey, nteenee kiikāloonchi kule -māwokumwoochi chii ake tukul kule kāākumwoochi :inee ng'aleechaa. 23Nto mii yoo, kukuur :nyēē wōō nyēbo lukēēt kāāyyoong'ikyii āyēēng' chēbo lukēēt ānkumwoochi kule, “Obchey lukēēt nyēbo biiko chēē yitē bokolwookik āyēēng' kuyeyta keey kuba Kayisareeya. Ankooyeyte nkinee lukēēt nyēē bēētēē faraasiinek nyēbo biiko chēē yitē tāmānwookik tisab āk lukēēt nyēbo ng'ōtwēēk nyēbo biiko chēē yitē bokolwookik āyēēng' kuba :tukul Kayisareeya kwēēmowuuni ku asiistaab sōmōk. 24Ōyēytoochi nkinee Bāwulō faraasiinek cheechii chēē sukuwēētēē sukuyitita nyēē karaam wōlēē mii :bāytooyiintēētaab wōlooto, mokoryoontēēt Fēēliis.” 25Kisirta :nyēē wōō nyēbo lukēēt barweet nyēē kibeeta bichooto. Kisir kule, 26“Anii nyoo *Kilaawutiya Lusiya. Kuyityiing' :barwaani inyiing' boontēēt nyēē wōō nyēē /kēēkoonyitē, Fēēliis. Subay. 27“Āmāchē ābooruung' kule kinam :Yuutayeek chiichoo, nto yu kikiikuriik kubakach, āwē :anii āk biikyuu bo lukēēt anku bakiiraraach, kuuyu kyaakas kule ki chii nyēbo kōōrēētaab Rooma. 28Kuuyu kyāāmāchē ānkēt kule ām nee sukōōtēēyiis :bichoo miisin kurubta keey āk chiichoo, ākwēryootē ākoy kōōkwēētaab booyikwaa. 29Yooto ānkēt kule ākoo kirubtooy keey :riirikwaa āk ng'ālyoo nyēē nāmē keey āk kiruutēkwaa, nteenee ākoo kimāmii mbo :lēēlis nyēē kiyemaat nyēē kiyēyē inee /kiitiilchi kule /keebakach nto /keerat. 30Yu /kābākēēmwoowoo kule /kēēmiitē /kēēyēchinē ruurumuut kule /keebakach, ākōōnu :anii areet akeenke kuchō wōlooto imiitē. Kyāāmwoochi biiko choo ing'unyng'uung'tōōs kubo inee kule kuyibuung' riirikwaa.” 31Kikoonyit :lukoonoo bo booryēēt ng'aleekaab nyēē wōō. Kinam :Bāwulō kwēēmowuunooto ankubeeta ākoy wōlēē /kikēēkuurēē Antibaatri. 32Yu kayyeech, /kēēmwoochi lukēēt nyoo kibo choo bo faraasiinek kule kutas taay āk Bāwulō. Yooto, kooyeey :chuut kiyēnkuung'waa. 33Nto yu kabakuyit :choo Kayisareeya, kōōkoochi bāytooyiintoonoo kibo wōlooto barwaanaa ānkōōyokoochi nkinee Bāwulō āwunnyēkyii. 34Kisuman :bāytooyiintoonoo barwaanaa ankuteeb kule, “Bo :Bāwulō yēēmēēt nkōnō?” Yu kakas kule ākoo kibo Kiliikya, 35kumwoochi kule, “+Maakas ng'aleekuuk, yoo kaakuyit :biikuuk choo riirtōōs.” Nto mii yoo, kumwaayta :bāytooyiintoonoo /kēēkwēryoot Bāwulō /bākiimiiny kaab *Ērōōtē /ānkēēriib.

will be added

X\