Yēyuutēk 20

1Yu kikiikubēk :taariiryeet ām wōlooto, kōōyookto :Bāwulō /bākēēkuurchi rubiik. Nto yu kikiikōōkiim moonikwaa, kubirchi chameetaab keey ānkuwēēchi keey :inee Maaketoonnya. 2Kiwēēsyētootēē komosaata kōōkiimootēē biiko ng'aleek chēē chaang'. Nto mii yoo, wokuyit yēēmēētaab Kiriki. 3Kiibuur wōlooto kut koowaany ārook sōmōk. Kumii kuyēytooy keey :Bāwulō kumāchē kuwēētēē mwēēnkēēt ākoy Siirya, kusēw kule kikiikuyey :Yuutayeek ruurumuut kule /keebakach. Kunyoo, koosoot kule kooyeey kumur Maaketoonnya. 4Kiwēēto keey chiito ake nyēē /kikēēkuurēē Sobaatiro araab Biirō nyēbo *kiriinkēētaab Bereeya. Kimii nkinee baanaa :ake nyēē /kikēēkuurēē Aristaarko āk Sēkuuntō chēē kibo :tukwaay Teesaloonika. Kimiitē :nkinee Kāyō nyēē kibo Tēērbē ākoo Tēmētēēwō. Kimii :nkinee Tukiikō ākoo Turōfiimō chēē kibo :tukwaay yēēmēētaab Eesya. 5Kisimkoonto :bichooto, ankubakukanyeech Turoowa. 6Yu kāākubēk :saakweet nyēē /kyoomēē mukaatiit nyēē makuutunaat, kēēng'ēētyēē :acheek Filiibi keebeetee mwēēnkēēt. Yu kakeeyta :bēsyōōsyēk muutu, kiiyoomē keey āk biiko chuut ām Turoowa ānkēēbēēnii wōlooto bēsyōōsyēk tisab. 7Ām bēsyēētaab taayta nyēbo wiikiit, keekwaa tukul yēēt akeenke sikeebetes mukaatiit. Ām yooto, kwoomchi :Bāwulō biiko ng'ālyoontēēt. Kuuyu kimāchē sukuwo yu kāyyēēkunēē, kwoomchi biiko ng'ālyoontēēt ākoy kwēēmooy kwēēn. 8Kilāytōōs :taariinek chēē chaang' ām kisēēnkēēt nyēē kimii barak wōli kikēētuuytōōsii. 9Kimii :āybēēryoontēēt ake nyēē /kikēēkuurēē Ēwutukō nyēē kimii kukēēbuur yēē kibo koong'taab mētēw. Kimii kunāmē āybēēryoontoonoo :rwoonik chēē nyikiisēch kumii :Bāwulō kutāsē taay kwoomu lōkōōywēk. Yu kikiikunam :rwoonik kutukul, kōōsuuwunēē kisēēnkēēt nyēē kibo sōmōk ānkukwēr ng'wēny kule “mbum.” Nto bērē kule /bakeenam, ku kaakume. 10Yooto kurēkto :Bāwulō ankuwokwaamut chiichooto ānkumwoochi biiko kule, “-Mōōmuuyē, nto yu tākusoboot.” 11Ām yooto, kooyeey :tukul kisēēnkoonoo kibo barak. Kubetes :Bāwulō mukaatiit ānkwoomiis ankutas taay kung'alaal kuyyeech. Nto yu kayyeech, kuwēēchi keey. 12Yooto, kiimut āybēēryoontoonoo kuwo kaa kukāākusob. Kibāybāyiitu :bichooto miisin. 13Nto mii yoo, keetas taay :acheek ākoy yēē kimii :mwēēnkēēt ankeebeetee kēētākyi keey wōlto ake wōlēē /kikēēkuurēē Aaso wōlēē kikēēmāchē subakeenyoorte Bāwulō sukulaany mwēēnkēēt ankeebeete. Kikiikuchōb :Bāwulō kuu nyooto, kuuyu kimāchē kuwēētēē kērēēnkōōk ākoy wōlooto. 14Yu kāwokunyōōrchēēch :Bāwulō Aaso, keenam ankeebeete ākoy Mituleen. 15Nto mii yu kāyyēēkunēē, kēēng'ēētyēē yooto ām mwēēnkēēt ankeebe ākoy Kiiyoos. Nto bēsyēēt nyēē kiikēērē, kyaay ākoy yēēt ake yēē /kikēēkuurēē Saamo. Nto yu kāyyēēkunēē subak, keeyit wōlēē /kikēēkuurē kule Milēētō. 16Kikiikootiil :Bāwulō kule kukeeyta kumur Ēfēēsō simēēboot āsiiswēk ām yēēmēētaab Eesya. Kiisoot kuu nyooto, kuuyu kimii kusārtooy keey kumāchē kule yoo /kiimuuk, kuyit Yēērusālēēm yēē bēsyēētaab *Bēēntēkōōst. 17Kumii :Bāwulō Milēētō, kōōyookto /bākēēkuurchi booyikaab biikaab Yēyiin ām Ēfēēsō. 18Yu kabakuyit :booyichooto, kumwoochi kule, “Ōnkētē wōlēē kyāābuurtooy āk akweek kuchakee kēēboontē keey bēsyēētaab taayta nyoo kyāāyitunēē yēēmēētaab Eesya. 19Kyāāyibē keey ng'wēny ānkāāmuytooy āyēchinē Mokoryoontēēt yiisyēēt, ānkoo kyāāriirē kubo ruurumuunēk chēē kiyēwoo :Yuutayeek. 20Ōnkētē mbo subak kule mēēbērē kyāāyēēyē lēt ku -māā-āmwook kiy nyēē mākuyēētyēēchook, ntēē kyāānēētē biiko tukul ām yēēt akeenke nto subak aneetaate ām koorin. 21Kyāāboorchi Yuutayeek āk Kirikiik kule māchāktōōs :icheek kuweek ām choolwookātēēng'waa ānkuyēēlchi komostaab Yēyiin ankookaasee keey Mokoryoontēēt Yēēsu. 22Ām yu raat, kāākukērchoo koong' :Tāmirmiryēētaab Yēyiin kule āwē Yēērusālēēm āmāānkētē kiyēē mawokuyeyakay ām wōlēē āmiitē, yoo kaayit wōlooto. 23Ānkētē kityō kule ām kiriing' ake tukul mwoowoo :Tāmirmiryēētaab Yēyiin kule kānyoonwoo :rātiisyēēt āk nyāliluutēk. 24Ānkoo kut kuwuu nyooto, ku buch :soboonnyuu ām wōlēē āmiitē, yoo āmuuchē baateey awaany labateetaab yiisyēēt nyoo kōōkukōōno :Mokoryoontēēt Yēēsu. Yiisyooni, ku ābooru lōkōōywēk chēē kāroomēch chēbo chamateetaab Yēyiin.” 25Kitas taay :Bāwulō kumwooy kule, “Ānkētē mbo raat kule māmii :chii ām akweek choo kookeebeetaate tukul kyoomtootē lōkōōywēk kurubta keey āk bāytooyiisyēētaab Yēyiin, nyēē mawokukasa subak. 26Kunyoo, āboorwook raat kule mariireenaa :chii ake tukul, yoo kēēboot soboonnyii. 27Āmwooyē kuu nyooto, kuuyu mēēbērē kyāāmuuny mbo bēsyēēt akeenke ku -māā-āmwook tukuuk tukul chēē māchē :Yēyiin kule oyey. 28Ōriib keey ānkōōriib mbo nkicheek biiko choo kiikukwēchook :Tāmirmiryēētaab Yēyiin kule ōriibē. Akweek chēē ō-ākooy biikaab Yēyiin choo kiwālāng'unēē korotiikaab Lekwenyii. 29Ānkētē kule yoo kāāwēēchi keey :anii, makukwa :suuyik chēē kōrōōmēch miisin chēē makusankatan kēēchiirēk nyēē māsooyēē. 30Makoobetyeenyee keey :alake wōlēē ōmiitē :akweek ānkōōbotboot ng'aleekaab man sukung'eet kōōsōrto biiko kurub icheek. 31Kunyoo, ōriib keey, wē, murēchu. Māchē mbo ōsōōtē kule ām kēnyiisyēk sōmōk choo kookukeeyta, kyāātāsē taay ānēētē chii ake tukul ām akweek bēēt āk kwēēmooy kut kutēwu :lōōkik. 32“Kunyoo, kāātōōrook āwunnyēkaab Yēyiin āk mbo wōlēē mii :ng'ālyoontēēt nyēbo chamateenyii. Mākōōtitiirook :ng'ālyoontoonoo ānkōōbēruurook tukul choo kiikootabaan :inee ōyēku cheechii. 33Manaamach mbo beesyaa nto sira nyēbo chii ake tukul. 34Ōnkētē :akweek kubooyiit man kule kyāāyēyēē āwunnyēkyuu kiy ake tukul nyēē kyāāmāchē āk mbo chēē kimāchē :chōōrōōnuutēkyuu. 35Ām kiy ake tukul nyēē kyāāyēyē, kyāāboorwook kule ām yiisyō nyēē kyāātitirchinē ām kēēliitēnyi, mākwēēch kēēyēētyēēchinē choo kuskusēch kiisōōtē ng'aleekaab Mokoryoontēēt Yēēsu choo kimwooyē kule, ‘Ibēruuroot :nyoo ikooytooy kusiir nyoo /kiikoochinē.’ ” 36Yu keewaany :Bāwulō kumwooy ng'aleechu, kukutuny āk bichoo tukul ankusaay. 37Yooto kumoot :icheek Bāwulō ānkuriirtōōs kutēē yooto tukul kubirchinē chameetaab keey. 38Kiyēē king'woonchi bichooto miisin ku yu kimwooyē :Bāwulō kule mēēbērē tābākukāsē :icheek inee subak. Ām yooto, kōōyoomiis ākoy yēē kimii :mwēēnkēēt.

will be added

X\