1 Kunyoo, ii, mbo ng'eetaabiya, kēēmāchē ōnkētē wōlēē tēē :bērurto nyēē kinyōōr :biikaab Yēyiin ām yēēmēētaab Maaketoonnya. 2 Ānkoo /kikeetyem /kiinyāliilē bichoo, king'ērēkootiin. Ānkoo ki bānoon :bichoo, kileelach moonikwaa nyēē kiikooytooy mbo beesaanik chēē chaang' miisin. 3 Kāāmwoowook kule kiinēmu :bichoo beesaanik chēē chaang' chēē kiimuuchē nto miisin kukeeytee chēē kiimuuchē. Māmii :chii nyēē kikērchinē koong' kōōnēmu beesaanichaa. 4 Kisaayeech kule nto nyōōr bārooyinto nyēē kayeyee :nkicheek yiisyooni /kiikoochinē beesaanik biikaab Yēyiin ām Yēērusālēēm. 5 Kiyey :bichoo kiy nyēē wōō nyēē kimākiisōōtyinē :acheek. Kiinēmchi keey :bichoo Mokoryoontēēt kurook, nto mii yoo, kōōnēmchēēch keey nkacheek kootyiich kiyēē māchē :Yēyiin. 6 Kunyi kēēmwoochi Tiitō nyoo kisimkutoowu kāāruruukiisyēēng'woong' kuyēētyēēchook owaang'te yiisyooni karaam bo chamateet. 7 Ōyēyē nyēē karaam tukuuk sōō ku tyaa: ōyēnchinē Yēyiin miisin, ōng'āloolē nyēē karaam, ōboontē kiirnātēēt, ōnēmchinē keey Yēyiin miisin, ānkōōchāmtēēch. Kunyi kurubta keey ng'aleechaa, ku māchāksē ōnēmchinē keey yiisyooni bo chamateet. 8 -Māāmiitē ākērchook koong', nteenee āmāchē atyem ānkēt wōlēē wuu :chamateeng'woong' yoo /kākiikuykuuchiin āk wōlēē chāmtooy :alake. 9 Ōnkētē wōlēē wuu :chamateetaab Mokoryoontēēnyoo Yēēsu Kiriistō. Ānkoo kitinyē :inee tukuuk kuyem, kucham kuyēk banan kubo akweek sukuyeyaak ōnyōōru tukuuk kuyem kubununēē bananta nyooto kinyōōru. 10 Wōlēē ākāstooy ng'ālyoontooni ām wōlēē ōmiitē :akweek kumiitē kule: Kaykay owaang'te yiisyēēt nyoo kwōōtoowu kēnyiitkoonye, kuuyu kwōōbooyē :akweek taay osoot kule ōkooytē tukuuchoo ānkwōōbooyē mbo taay subak oyey kuu nyooto. 11 Kunyi, otas taay ām yiisyoonoo sukuyityiin :wōlēē kyōōmāktooy kule oyeyte āk yoo koowaang'te yiisyoonoo kurubta keey āk wōlēē ōmuuktooy. 12 Yoo chāmē :chii kōōkoochi Yēyiin tukuukyii, kukāsē :Yēyiin kiyēē kēēkooyto kurubta keey āk kiyēē boonto :chiichooto mēēbērē kiyēē māboonto. 13 Wōlēē kēēmāktooy :acheek mēēbērē kule /kiityaakta alak ānkoo kānyikisyook akweek :ng'aleek, nteenee wōlēē kēēmāktooy ku kule kwooyēēch :biiko tukul. 14 Yoo ōboontē :akweek tukuuk chēē chaang' kuu nyiitēnyi, ōyēētyēēchinē chuut, nto bēsyēēt nyoo boonto :nkicheek tukuuk chēē chaang', kuyēētyēēchook nkakweek. Yooto mākwooyēēch :kiy ake tukul 15 kuu yoo /kikeesir kule: “Biiko choo kiiruruuch chēē chaang' mēēbērē kikēēytēē chēē kimāchē, nto choo kiiruruuch chēē ng'ēri mēēbērē kirārchi.” 16 Ābirchinē Yēyiin kōōnkōy nyoo kiikoochi Tiitō mooyēēt nyēē wuu nyeenyuu ām wōlēē ōmiitē :akweek. 17 Mēēbērē kicham baateey :Tiitō kiyēē kikēēmwoochi, nteenee miitē kuchōōnii wōloo ōmiitē ām ng'erekweek anku kacham :inee nkityōōniin. 18 Kēēmiitē kiiyooku kuchōōnto keey ng'eetaabiya ake nyēē siltooy :biikaab Yēyiin tukul kubo wōlēē yēytooy :inee yiisyēēnyii nyoo bo āmtooyiisyēētaab lōkōōywēk chēē kāroomēch. 19 Nto miisin kikwey inee :biikaab Yēyiin kule sikeebeete keey acheek sikēēriibē tukuuk chēē /kiiruruuchē. Kēēyēyē yiisyooni sikēēkoonyitēē Mokoryoontēēt ānkiiboorunēē muchasta nyēē kēēboontē kēēyēētyēēchi biiko. 20 Kēēmāchē keetayee keey kēēyēyē kiyēē imuuchē kuyey kōōng'unyng'uunyiis :biiko ām wōlēē kēēriibtooy kiyi /kēērōōbu. 21 Kyoomē booryēēt kēēyēyē kiyēē bo man āmēēbērē ām taayeetaab Mokoryoontēēt baateey nteenee mbo ām taayeetaab biiko. 22 Kēēmiitē kiiyooku ng'eetaabiya ake kuchōōnto keey mbo Tiitō. Kiikōōboorwēēch keey :ng'eetaabiyaanaata ām kēēlwookik chēē chaang' kule boontēē mooyēēt yiisyooni ānku raat miisin, kuuyu imoong'tēēnook keey :inee kuyem. 23 Tiitō ku choorweenyuu ānkēēyēchiintōōsii :tukwaay yiisyēēt ām wōlēē ōmiitē :akweek. Nto mbo ng'eetaabiya alak ku kikwey :biikaab Yēyiin kukwa ku biiko chēē koonyitē Kiriistō. 24 Kunyoo, ōng'ērēkyi bichoo, sukukas :biikaab Yēyiin tukul chamateeng'woong' ānkōōnkēt kule kikēētinyē man yoo kikēēsilook :acheek.
