1 Tēmētēēwō 2

1Ng'ālyoontēēt nyēē bichiiy miisin ku āmwoowuung' kule imwoochinē kusōōchinē keey. Nto subak kusooyē Yēyiin kuriiree icheek ānkubirchinē kōōnkōy kubo biiko tukul. 2Māchāktōōs /kēēsoochi bāytooyik āk kāāntōōyik sikēēming'iisyē ām kaalyeet āk tāloosyēēt ānkiinēmchi keey Yēyiin ānkēēminy ām ming'ātēēt nyēē /kēēkoonyitēēch. 3Yoo kakeeyey kuu nyooto, ku karaam ānkōōng'ērēēchē Yēyiin nyoo Kāārārookiintēēnyoo 4nyēē māchē kule /kiiraraach biiko tukul ānkōōnkēt ng'ālyoontēētaab manta. 5Āmwooyē kuu nyooto kuuyu Yēyiintēēt ku akeenke nkit, ānkumii subak :chiito akeenke nkit nyēē ichoomnyēēch āk Yēyiin. Nto nyooto ku Yēēsu Kiriistō. 6Kiikooyto :Yēēsu soboonnyii sukuwālāng'unēē biiko tukul. Kiyityiin :ng'ālyoontooni ām āsiiswēk chēē yēmootiin. 7Kunyi, /kikeekweya anii a-amte ng'aleechaa kuu lēbkēēyiintēēt. Kiyēē āmwooyē ku man āmēēbērē bo ng'wiiynan. Ānēētē biiko chēē ma Yuutayeek ākoosēē keey Yēyiin ānkāāmwooyē ng'al chēbo man. 8Mākyiintōōs :murēnik ām yēēt ake tukul kōōtōrōōrē āwunnyēkwaa chēē tiliilēch ānkusooyē Yēyiin nyēē kāmēēkunyēērchinē keey āmēēkuwookuutōōs. 9Mākyiintōōs :kooruuk kōōloochē keey nyēē karaam. Kōōloochē sirook chēbo koonyit ānkuboonto ātēbuutēk chēē kāroomēch. Māmāchāktōōs kōōlēētē buutēēk ām kēēlto ake nyēē māchē kule /sikēēchōrōkyinē. Māmāchāktōōs mbo subak kōōloochē chobosaak, tukuukaab kaat āk sirooy chēē ālē beesaan chēē chaang'. 10Nteenee, māchāktōōs kuboonto ātēbuutēk chēē kāroomēch chēē mākyiintōōs kuyēyē :kooruuk choo kiikōōnēmchi keey Yēyiin. 11Māchāktōōs kōōnēētē keey :koorko ake tukul ng'aleek ām kēēlto nyēē intusoot ānkōōywēyiisyē. 12-Māāchāmchinē koorko kuyēk kāānēētiintēētaab ng'ālyoontēētaab Yēyiin nto mbo kule kubayta saanteenyii. Māchāktōōs kusiisyinē keey. 13Āmwooyē kuu nyooto, kuuyu Atam nyēē kisimkuyey :Yēyiin kurook, nto mii yoo, chakuyey Aawa. 14Nto mbo subak, mēēbērē ki Atam nyēē /kikeekenta, nteenee ki koorkēēt nyēē /kikeekenta kut kuyey ng'ōōkisto. 15Māchāktōōs :koorko ake tukul kuriibē kōōnyii āk lōkōkyii ām kēēlto nyēē karaam. Yoo kamuyta ankookaasee keey Yēyiin ānkutinyē chamateet ānkutiliil ānkuriibē keey, ku mākutēbto soboontaab kibchuulyo ākookoy.


Copyright
Learn More

will be added

X\