1 Teesaloonika 2

1Mbo ng'eetaabiya, ōnkētē :akweek kule kiyēyākiis :ng'aleek chēē kāroomēch miisin yoo kikēēruutoochook acheek. 2Ōnkētē wōlēē /kisimkēēwustēēch /ānkiintosuurtēēch ām *kiriinkēētaab Filiibi. Ānkoo /kikeekwiileech miisin, kikōōnēēch :Yēyiin nkuruuk kēēmwoowook lōkōōywēkyii chēē kāroomēch. 3Okas kule kimākyoomtooy ng'al chēbo ng'wiiynan nto kikiisōōtē ng'al chēē mā kāroomēch nto kikēēbērē kule kēēkēnwook. 4Kichamteech :Yēyiin ānkōōtōōrwēēch :lōkōōywēchu kāroomēch. Kunyi, mēēbērē kyoomtooy lōkōōywēchu kule sikiing'ereech biiko, nteenee kyoomtooy kule sikiing'ereech Yēyiin nyoo tyēmē kāāsōōtēywēēkyoo. 5Ōnkētē :akweek kuchurta kule mēēbērē kikeekwaante :acheek ng'aleek chēē kikiilēblēēbook nto kikeekwaante ng'al chēē iyēēlē kimooyēētyoonti nyēē kēēboontē. Nāmwēēch mbo :Yēyiin sira ām ng'aleechu. 6Manaakeesyeem kule nto kēēnyōōru okaasteech :akweek nto ku chii ake tukul, 7ānkoo kiyemaat kēēnyikiisyook :acheek kuu *lēbkēēyikaab Kiriistō. Nteenee yooto kēēboontē keey akweek kikēēyēku sikēn ām wōlēē ōmiitē kuu yoo ibuurtooy keey :cheebyoosya nyēē sikēn lōkōkyii kuriibē. 8Kikēēmāchē miisin kiibuurtē keey āk akweek nyēē mēēbērē kikēēkōōnook lōkōōywēkaab Yēyiin baateey, nteenee kikiiboorwook ng'aleek chēē rubtooy keey āk soboonwēkyoo, kuuyu kikeechamaak miisin. 9Mbo ng'eetaabiya, maanii ōnkētē wōlēē kikeeyeyte yiisyēēt āk wōlēē kikyoomtooy booryēēt! Yooto kikēēyēyiisyē bēēt āk kwēēmooy. Kikēēyēyē kuu nyooto simākiinyikiisyook yoo kikyoomwook lōkōōywēchoo bo Yēyiin. 10Yoo kikēēboontē keey akweek choo ōyēnchinē Kiriistō kyookas ankikas :nkinee Yēyiin kule acheek biich chēē kēēchurtootiin, chēbo man, āmākēēboontē lēēlis. 11Ōnkētē mbo kule kikēēyibook :acheek kuu wōloo yibtooy :booyoo lōkōkyii. 12Kikiititiirook keesaaysaayaak ankeetas taay kēēmwoowook ōyēyē ng'aleek chēē ing'ērēēchē Yēyiin nyoo kuurook bōōbuur tukul oyemte bāytooyiisyēēnyii ākoo wōōyinnyii. 13Kēēbirchinē Yēyiin subak kōōnkōy ākookoy, kuuyu yoo kikēēyibwook lōkōōywēkaab Yēyiin okas ankoocham ng'aleechaata, mēēbērē kuu lōkōōy chēbo chii buch, nteenee kuu chēbo Yēyiin. Man, yēyiisyēē :ng'ālyoontoonooto akweek choo ōyēnchinē Kiriistō. 14Kyōōnyōōru :akweek, mbo ng'eetaabiya, ng'aleek chēē kerkeey ākoo choo kinyōōru :biikaab Yēyiin choo mii Yuuteeya choo rubē Yēēsu Kiriistō. Kiinyaliilaak :biikwook kuu yoo kiinyāliilē icheek :Yuutayeek 15choo kibākāchē Mokoryoontēēt Yēēsu ākoo *ng'ālooltooyikaab Yēyiin ankukweteech acheek. -Mēēng'ērēēchē :bichoo Yēyiin ānkuyōng'ōōsēch :bichoo ām wōlēē mii :biiko tukul. 16Kisyeem mbo kule nto kerekteech ku -mākyoomchi lōkōōywēk biiko choo mā Yuutayeek, lōkōōy chēē kimakuyey /kiiraraach bichoo. Nteenee mii kutāsyinē :Yuutayeechaa ng'ōōkiswookik alak ām chooto boonto. Kunyoo, kōōkōōng'woonchi icheek :Yēyiin ng'aleek. 17Mbo ng'eetaabiya, kikeenereech miisin yooto kikēēbākooktooy keey kisich. Nteenee ānkoo kikēēlōōyiityiinē kikiisōōtook ākookoy. Kaakwaameech :yēēmootēēt miisin keekasaak subak. 18Kiyooto nyēē kiyeyeech keemach kiiyēēwu wōloo ōmiitē. Kyāāmāchē :anii Bāwulō nto āyēēwu wook chēē siirē akeenke, nteenee kikerekteech :Kibrōkōsyoontēēt. 19Mbo ng'oo :chēē kiikēnēē keey :acheek, ānku ng'oo :chēē kēēng'ērēchēē, nto ku ng'oo :chēē kēēng'āsēē keey yoo +/mākēētuwēnēēch ām taayeetaab Mokoryoontēēnyoo Yēēsu bēsyōōnoo iyēēwu? Ma akweek? 20Kubooyiit man, akweek chēē kēēng'āsēē keey ānkēēng'ērēēchēē.

will be added

X\