1 Bētērō 3

1Māchāktōōs :nkakweek kooruuk ōkoonyitē saanikwook, si yoo maneekaasee keey :icheek ng'ālyoontēētaab Yēyiin, makuyey :ātēbuutēkwook choo kāroomēch kookaasee keey Yēyiin ānkoo -mōōng'āloolē kiy, 2kuuyu makukas kule ōkoonyitootiin :akweek ānkōōywēyē Yēyiin. 3-Mōōmoong'tēē keey tukuuk chēē yēyook kule ōkāroorāniitu, kuu yoo ōyēytooy buutēēkwook nto ku ōloochē sinkiliinēk nto sirook chēē kāroorān. 4Nto cheebyoosya nyoo baybay ānkōōntusoot ku karaaran. Karaaranat nyēē wuu nyi nyēē mābēku ānkuchāmē :Yēyiin miisin. 5Kiikāroorānē keey :kooruuk chēē tiliilēch choo kibo taay choo kiimoong'tēē keey Yēyiin ām kēēlto nyēē wuu nyooto. Kikoonyitē saanikwaa, 6kuu yoo kikoonyitē :Saara Abraam ānkiikuurē kule mokoryoontēēnyii. Ōwuuyē :akweek tibikaab Saara, yoo ōyēyē ng'aleek chēē kāroomēch āmōōnyōkōriitu. 7Nto akweek saanik, ōbuurtooy chēēbyōōsōōkwook ām kēēlto nyēē intusoot ānkōōkoonyitē kuu biich chēē ānyoosēch, kuuyu mākutuwēnook :Yēyiin tukwaay, murēn nto koorko, ōnyōōru soboonto nyēē lēēl. Ōyēyē kuu nyooto simakerekta :kiy soowuutēkwook. 8Māchāktōōs nanyuun ōboontē :akweek tukul kāāsōōtēywēēk chēē kerkeey ānkōōkāsyinē keey kiisayta. Ōchoomtōōsii kuu biich chēē tuubcho, ōriirēē ake ānkōōyibē keey ng'wēny. 9-Mooyaakte kiyēē miyaat kubo miyootyēēt nyēē /kākēēyēwook, āmōōnchuruuriisyē yoo /kākiinchuruurook. Nteenee ōsoomchinē bichooto yēwook nyēē miyaat bēruur, kuuyu mwoowook :Yēyiin kule ōyēyē kuu nyooto sōōnyōōru bēruur. 10Mwooyē :siruutēk kule, “Chii nyoo māchē kōōbuurtooy ng'erekweek ankukas bēsyōōsyēk chēē kāroomēch, kukerekta ng'elyebnyii kung'alaal miyootyēēt āmā-āsyi kuutiinyii kumwooy bēērbēēryēēt. 11Kuweeksee :chiichooto miyootyēēt, ānkuyēyē ng'al chēē kāroomēch. Kucheeng' :inee kaalyeet kuchēēng'ē nyēē kōrōōm. 12Rubē koonyekaab Yēyiin choo churtootiin, ānkukāsyinē soowuutēkaab bichooto, nteenee ituukyinē batay choo yēyē rōkōs.” 13Ara ng'oo nyēē ing'woonchinē chii nyēē yēyē ng'al chēē kāroomēch? 14Yoo koonyalil kubo kiyēē karaam nyēē kooyey, ōnyōōru bēruur. -Mōōnyōkōriitu āmōōmuytōōsii. 15Ōywēyē Kiriistō kuu Mokoryoontēēng'woong'. Māchāktōōs ōchōbootiin ākookoy, sōōmuuchē ōwālchi chii ake tukul nyēē kateebeenaak kurubta keey kiyēē ōkēnēē keey. 16Nto yoo ōyēyē kuu nyooto, ōyibē keey ng'wēny ānkōōkoonyitiisyē. Ōbuurē nyēē chuulootiin :kāāsōōtēywēēkwook, sukuchōlyo :bichoo ng'āloolēēnook nyēē miyaat ām kiyēē karaam nyoo ōyēyē :akweek kuu biikaab Kiriistō. 17Yoo chāmtooy :Yēyiin /kiinyaliilaak, kaykay yoo kooyey kiyēē karaam kusiir yoo kooyey nyēē miyaat. 18Āmwooyē kuu nyooto kuuyu, ānkoo kichurtaat :Kāārārookiintēēt, kime kubo biiko chēē mā churtootiin, sukōōnkēt :bichoo Yēyiin. Kime :inee wook akeenke kubo ng'ōōkiswookikaab biiko tukul. /Kikeebakach bōōrnyii, nteenee /kiikiisoobēē tāmirmiryēēt 19ānkuwokwoomchi lōkōōywēk tāmirmirook chēē rātootiin. 20Ki tāmirmirook :chu choo kimānāākoonyit Yēyiin, yoo kimuytooy ām bēsyōōsyēchoo kitēēchē :Noowa mwēēnkēēt. /Kiikiiraraach biiko chēē ng'ēri chēē kimii mwēēnkoonoo kubununēē bēēko anki sisiit :bichooto baateey. 21Kerkeey :bēēchoo bēēkaab kāābātisāniisyēēt, kuuyu /kiirāroochē biiko bēsyōōsyēchu kubununēē kaabatisaneet. -Mēēwuunē :kaabatisaneet sumtaab bōōrto nyēbo chii, nteenee mwoochinē Yēyiin :chiichoo kule kumāchē kuyey kiyēē inkētē kule churtaat kubununēē ng'eeteetaab meet nyēbo Yēēsu Kiriistō. 22Kiikuwo :Yēēsu Kaab Yēyiin ānkumii āwutaab taay nyēbo Yēyiin kubāytooy malayikaanik tukul āk choo bāytooyiisyē āk choo bo kāāmuukēywēēk.

will be added

X\