1 Kōōriintō 7

1Nto kurubta keey āk ng'aleek choo kyōōsirwoo, karaam kumātiiny :chii koorko. 2Nteenee kuuyu wōō :martaayeet kōōrēēt, ku māchāktōōs kuboonto :murēno koorkēēnyii ānkuboonto :koorko saanteenyii. 3Māchāktōōs :saanteet kuchāmchiintōōs āk wōlēē māktooy :koorkēēnyii. Nto nkinee koorkēēt kumāchāktōōs kuchāmchiin āk wōlēē māktooy :saanteet. 4Mābāwu :koorkēēt bōōrnyii nkit nteenee bāwu saanteenyii. Nto nkinee saanteet mābāwu bōōrnyii nkit, nteenee bāwu :koorkēēnyii. 5Matay :chii chii nteenee ākoy yoo kōōkāsyiinē :tukwaay ām bārooyinto nyēē kisich ōnēmchi keey saayeet. Nto mii yoo, otas taay ōbuur kuu wōlēē wuu :biich chēē kiikoomut keey. Oyey kuu nyooto sukung'eet -mōō-āsyi keey kukentaak :Kibrōkōsyoontēēt, yoo -mōōmuuchē ōriib keey. 6-Māāmiitē āmwoowook kule māchāktōōs :chii kōōmutiis, nteenee āmwooyē kule yoo kacham :chii kōōmutiis, kuyey kuu nyooto. 7Ābērē nto kiwuu :biiko tukul wōlēē āwuuyē :anii. Nteenee, tinyē :chii ake tukul rōōbēywoontēēnyii kuchōōnēē wōlēē miitē :Yēyiin. Boonto :ake rōōbēywoontēēt nyēē teer ām wōlēē mii nyēbo ake. 8Nto kurubta keey āk choo kimēēkuboonto koor nto choo musuuk, āmwooyē kule karaam kōōbuur :chii kuu anii, kumacheeng' :booyoo koorko amacheeng' :koorko saannyaa. 9Nteenee yoo -mēēmuuchē kut kuriib keey, ku karaam kōōmutiis nto /kiimut kusiir yēē kātātōōrtooy :muchas. 10Nto kurubta keey āk biikaab Yēyiin choo kēēsyootiin, āmwoowook (āmēēbērē, sōō, kule anii nyēē āmwooyē, nteenee Mokoryoontēēt) kule māmāchāktōōs :koorko kubakaakta keey āk saanteenyii. 11Nto yoo kātēbi kut kubakaakta keey ku māmākyiintōōs /bākiimut koorkoonoo subak. Nto yoo māwuu nyoo, /kiichoomnyo āk saanteenyii ānkōōbuurchiin kuu kēny. Māmākyinē mbo nkinee saanteet kukwet koorkēēnyii. 12Nto chuut alak, āmwooyē (anii nyooto āmwooyē, mēēbērē Mokoryoontēēt) kule yoo boonto :chiitaab Yēyiin koorkēēnyii nyēē mānēēyēnchi Yēyiin, ānkuchāmē :koorkoonoo kule kuming'to keey āk inee, ku māmākyinē kule kukwet. 13Nto subak yoo boonto :cheebiya ake tukul saanteet nyēē mānēēyēnchi Yēyiin ānkuchāmē :saantaanaa kule kutēbto keey koorkēēnyii, ku māmāchāktōōs :koorkoonoo kubakaakta saanteenyii. 14Āmwooyē kuu nyooto, kuuyu /kiikiitiliil saantaanaa mānēēyēnchi Yēyiin kubununēē wōlēē mii :koorkēēnyii nyoo kiikōōyēnchi Yēyiin, anku /kiikiitiliil koorkēēt nyoo mānēēyēnchi Yēyiin kubununēē wōlēē mii :saanteenyii nyoo kiikōōyēnchi Yēyiin. Nto kimāwuu nyooto, nto kimātiliilēch :lōkōkwook, nteenee kuuyu wuu nyooto ku tiliilēch. 15Nteenee yoo kakwet :chii nyoo mānēēyēnchi Yēyiin koorkēēnyii, kootyaakaat :koorkoonoo kuwēēchi keey. Nto yoo māchē :koorko nyoo mānēēyēnchi Yēyiin kule kubakaakta saanteenyii, /kēēchāmchi kuwēēchi keey. Mārātē koorko nto murēn :nyoo kiikōōyēnchi Yēyiin :ng'ala chēē wuu chooto, kuuyu kiikukuurēēch :Yēyiin kēēminy ām kaalyeet. 16Inkētēē nee :inyiing' koorko nyoo 'kiiyēnchi Yēyiin yoo 'imuuchē iyey saanteeng'uung' /kiiraraach, nto acha? Nto, inkētēē nee :inyiing' saannyaa nyoo 'kiiyēnchi Yēyiin yoo 'imuuchē iyey /kiiraraach koorkēēng'uung', nto acha? 17Māchāktōōs kurubē :chii kāāburnyii kuu wōloo kikiikuchōbtoochi :Mokoryoontēēt kukuurē :Yēyiin. Mākuutyēēt :nyiitēnyi nyēē ātōōrchinē biikaab Yēyiin tukul. 18Yoo kikuurē :Yēyiin chii koomuraatanaat, kuuyu kibo Yuutayeek :inee, ku māmāchāktōōs kusyeem kuyēk chii nyēē /manaakiimuraatan. Nto yoo kimeemuraatanaat :chii yu kikuurē Yēyiin, kuuyu kimābo Yuutayeek :inee, ku māmākyinē kule /kiimuraatan. 19Yoo imuraatanaat :chii nto ku meemuraatanaat, ku māmii yēēt kiy. Nteenee ng'ālyoo nyēē mākyiintōōs, ku /kēēriib mākuutēkaab Yēyiin. 20Māchāktōōs :chii kōōbuur kuu wōloo kiwuunto kukuurē :Yēyiin. 21Yoo /kikēēkuuring' iwuuyē motwooriin, -meekany kooyiimiing' mēt yooto, nteenee yoo 'kēēnyōōru bārooyinto /kiityaaktiing', iyēyiisyēē nyooto. 22Āmwooyē kuu nyooto, kuuyu /kikiityaakta chiito nyoo ki motwooriin kukuurē :Yēyiin sukubooyiit Mokoryoontēēt. Nto yoo kibāwu keey :chii kukuurē :Yēyiin, kiikuyēk :chiichoo motwooriintēētaab Kiriistō. 23/Kikyaaleenaak kiy nyēē bichiiy. Kunyoo, -mookany ōyēku motwoorikaab biiko. 24Mbo ng'eetaabiya, ōbuur āk Yēyiin ānku māchāktōōs :chii ake tukul kutas taay kōōbuur kuu wōloo kiibuurtooy /kēēkuurē. 25Nto kurubta keey āk choo mākēēsyootiin, -māātinyē mākuutyēētaab Mokoryoontēēt nyēē nāmē keey āk icheek. Nteenee ātiilē kuu chii nyēē /kiikoosēē keey ām bērurto nyēē kikōōno Mokoryoontēēt. 26Kubo wuuyinto nyēē miitē, kuu nyiitēnyi āsōōtē kule karaam -/mākiimutiis. 27Yoo boonto :chii koorkēēt, kōōbuurto; nto yoo māboonto, macheeng'. 28Yoo kēēmutiis :chii, mēēbērē kāchoolwookēn, nto nyoo /kakiimut, mēēbērē kāchoolwookēn :nkinee. Nteenee, mākunyōōr nyoo kēēmutiis nyāliluutēk chēē chaang' ām ming'ātēēnyii, ānkāāmāchē :anii asateenaak nyāliluutēchooto. 29Mbo ng'eetaabiya, kiyēē āmiitē ābooru ām yuutēyu ku nyi: lēēkit :mēēyintaab kōōrēēt. Kunyi, māchāktōōs :murēnik choo kiikōōmutiis māswēē kēēsyēēt? 30Nto choo mii kuriirtōōs ku māchāktōōs kōōbuurē kuu nyēē mātinyē ng'woonin. Nto choo mii kung'ērēchē ku māchāktōōs kōōbuurē kuu nyēē māng'ērēkootiin. Nto choo āliisyē, kōōbuur kuu nyēē ma cheekwaa :tukuuchoo kā-ālē. 31Nto choo yēyiisyēē tukuukaab kōōrooni ku māchāktōōs kōōbuur wuu nyēē māng'ērēkyinē tukuuchoo. Āmwooyē kuu nyooto, kuuyu mii wokubotē :kōōrooni ām lēēkitō. 32Āmāchē ōbuur nyēē māmii :kiyēē iyiimook mētēwoy. Āmē mēt chiito nyoo mānēēmutiis :wōlēē mākuriibto ng'aleekaab Mokoryoontēēt kuu wōlēē makoong'ereekta Mokoryoontēēt. 33Nto chiito nyoo kiikōōmutiis, kōōsōōtē :nyoo wōlēē wuu :ming'ātēēnyii, kuu kule makoong'ereech koorkēēnyii ām kēēlto nkōnō. 34Yooto mākubchēyākiis :kāāsōōtēywēēkyii. Nto ārung'oonyoontēēt nto ku koorko nyoo mēēkuboonto saannyaa, kōōsōōtē :nyoo kurubta keey āk ng'aleekaab Mokoryoontēēt. Kiito nyēē māchē kule kuyey ku kōōnēmchi keey Mokoryoontēēt kutukul. Nto koorko nyoo imutaat, kōōsōōtē :nyoo kurubta keey āk ming'ātēēnyii kuu wōlēē makoong'ereekta saanteenyii. 35Āmiitē āmwooyē ng'ālyoontooni sukuyēētyēēchook āmēēbērē kule kaakiichaak. Āmāchē kule ōbuur ām kēēlto nyēē rootaat ānkāāmāchē mbo subak kule ōnēmchi keey Yēyiin kutukul. 36Yoo isōōtē :booyoo kule māmii kuyēchinē chēēbnyii nyēē kōōkōōnnyoo nyēē karaam ānkōōkunyiisyo :chēēboo nyēē mii wokukēēytēē bēsyōōsyēk chēē nyoolunēē /kiimutee ānkōōsōōtē :chiichoo kule irook chēēboo /kiimut, kōōrook :boontoonoo kumakta chēēbnyii kuu wōloo māktooy. Māmii kiy nyēē miyaat yoo kayey :boontoonoo kuu nyooto. Kumakta :inee chēēbnyii /kiimut. 37Nteenee yoo kāākōōrwooch :boontoonoo kusat ng'aleechaa kuchōbākiis ām mooyēēnyii āmāmii :kiy nyēē iyiimē ānkōōmuuchē kumuytoochi ām mooyēēnyii, ankootiil kōōbuur :kōōkoonoo nyēē mēēbērē /kiimutē, kumii :boontoonoo kuyēyē nyēē karaam. 38Kunyoo, boontēēt nyoo kamakta chēēbnyii /kiimut, ku kayey nyēē karaam, nto nyoo kamamakta chēēbnyii /kiimut, ku kayey :nyoo nyēē karaam miisin. 39Māchāktōōs :koorko kutāsē taay kōōbuurtooy keey saanteenyii yoo tākusoboot :saanteet. Nteenee yoo kame :saanteet, ku /kēēchāmchinē koomut keey āk chiito ake tukul nyoo kacham :inee, kātikoo kiikōōyēnchi :chiichooto Mokoryoontēēt. 40Nteenee ibēruuroot :koorkoonoo yoo /kamakiimut subak, ām wōlēē ākāstooy :anii. Āmwooyē ng'aleechu, āsōōtē kule ātinyē :nkanii Tāmirmiryēētaab Yēyiin.

will be added

X\