1 Paentomin saga bebeyaˈan si Isa Al-Masi mailu, in sigām subay angaku ma kapatut saga pagnakuraˈan maka saga aˈa angˈntan pagparinta, ati subay ameyaˈ ma panohoˈan sigām. Subay sigām sakap maghinang ai-ai ahāp. 2 Sohoˈun sigām daˈa angalimut ma sai-sai, sagōˈ subay sigām pasulut maka pabagay sadja ma aˈa kaseheˈan. Subay ahanunut pahˈlling sigām ni aˈa kamemon. 3 Sabab in kitam bay du isab aˈawam ma waktu palabay, bay agagga sinohoˈ, maka bay talingu. Tabowa-bowa na paˈin kitam eˈ napsu ahāp-alaˈat, ai-ai ya makahāp palasahan. Bay alaˈat isab kasuddahantam maka angandaliˈit na paˈin kitam ma saga seheˈtam. Abˈnsi kitam ma pagkahita, maka kinabˈnsihan isab kitam eˈ sigām. 4 Sagōˈ Tuhan, ya angalappas kitam, bay makapatuwaˈ kahāpna maka lasana ma bangsa manusiyaˈ, 5 ati puwasanna kitam min hukuman dusa. Nggaˈi ka ma sabab aniyaˈ kahāpan bay hinangtam, sagōˈ ma sabab aseˈna ma kitam. Nianakan kitam pabīng eˈ Rū Sussi maka kabuwanan kallum bahaˈu pagka sussina ataytam. 6 Manglabi-labihan na kahāpan ma kitam pagka kitam pinasangonan Rū Sussi eˈ Tuhan ma sabab si Isa Al-Masi ya angalappas kitam. 7 Sabab min lasa maka aseˈ Tuhan ya angkan kitam pinapagkahāp na maka Tuhan, boˈ kitam kaniyaˈan kallum kakkal ya asal holatantam. 8 Bˈnnal sadja ya pahˈllingku itu. Kabayaˈanku subay ka amanduˈ pahāp-hāp pasal saga panduˈku ya ma deyom sulat itu. Sohoˈun saga aˈa ilu angikut toˈongan boˈ supaya sasuku sigām magkahagad ma Tuhan magmatuyuˈ na paˈin maghinang ahāp. Ahāp asal hinang sigām buwattēˈ, maka aniyaˈ kagunahanna ma aˈa kamemon. 9 Saguwāˈ halliˈin saga aˈa magjawab ma halam aniyaˈ kagunahanna, maka pagsuli-suli pasal saga ōn kaˈmboˈ-mboˈan sigām pangkat-mamangkat. Daˈa ka isab palamud bang aniyaˈ maglugat atawa magsuˈal pasal saraˈ bay pangˈbba eˈ si Musa ma masa awal eˈ. Saga pagsuli-suli buwattēˈ mbal makahāp, halam aniyaˈ pūsna. 10 Bang aniyaˈ seheˈbi makatagnaˈan paglugat ma saga bebeyaˈan si Isa, sanggupin iya mintˈdda, boˈ sanggupin iya pabīng min tˈdda laˈa. Bang iya mbal angˈbba min hinangna heˈ, daˈa ka palamud ma iya. 11 Sabab kataˈuwannu in aˈa buwattēˈ, abengkok asal pikilanna maka dusahan. Atampal sāˈna sabab min hinangna. 12 Na, Titus, bang atˈkka piˈilu si Artemas atawa si Tikikus, sai-sai ya sohoˈku, patuyuˈ ka pehēˈ ni daˈira Nikupulis boˈ kitam magbāk mahēˈ. Sabab agaraˈ aku patˈnnaˈ mahēˈ satˈggol timpu pamaliyu. 13 Patuntulun si Apollos maka si Senas ya abugaw heˈ bang sigā pauntas ni palˈngnganan sigā. Buwanin sigā ai-ai kagunahan sigā. 14 Panduˈin saga seheˈtam bebeyaˈan si Isa Al-Masi ilu, in sigām subay patukid maghinang ahāp boˈ aniyaˈ panabang sigām ma aˈa kaseheˈan bang kasigpitan. Bang buwattēˈ aniyaˈ du paˈin kagunahan saga kahinangan sigām. 15 Saga seheˈku kamemon maitu amasampay minsan laˈa hal lapal sigām ni kaˈa. Ya du aku amasampay kasi-lasaku ni sasuku alasahan kami, pagka kitam dambeyaˈan angandol ma Al-Masi. Mura-murahan, bang paˈin kaˈam kamemon pinaniyaˈan tatabangan eˈ Tuhan. Wassalam
