1 Na, buwattingga? Pasangdantam bahāˈ kabayaˈantam magdusa, boˈ supaya pasōng lagiˈ aseˈ maka lasa Tuhan. 2 Tantu mbal! Sabab kitam itu saliˈ hantang aˈa amatay, ya mbal na makapagdusa, angkan kitam subay angˈbba min dusa. 3 Sabab kataˈuwanbi, bay kitam pinandi tandaˈ saksiˈ in kitam lamud na ma si Isa Al-Masi, ati minnēˈ aniyaˈ lamudtam ma kamatayna. 4 Hatina toˈongan, saliˈ kitam hantang paunung na ma Al-Masi kinubul maka iya, pagka buwattēˈ kapamandi ma kitam. Saliˈ kitam da-kamatay maka iya, boˈ supaya kita kabuwanan kallum bahaˈu buwat bay pamakallum iya min kawasa Mmaˈna Tuhan. 5 Sabab hatina, bang kitam parongan amatay maka si Isa, tantu kitam magdongan maka iya pinakallum pabalik. 6 Kataˈuwantam isab, in kajarihantam tagnaˈ waˈi pinapatay ma hāg magbeyaˈ maka Al-Masi, boˈ supaya pahalam kalaˈatantam. Jari mbal na kitam tabowa binanyagaˈ pabīng eˈ saga dusatam, 7 sabab sai-sai amatay apuwas na min hukuman dusa. 8 Bang kitam bay parongan ma Al-Masi ma kamatayna, amˈnnal du kitam in kitam parongan ma iya ma kallumna. 9 Sabab kataˈuwanta Al-Masi, in iya bay pinakallum pabīng min kamatay, angkan mbal na magkamatay pabalik. Puwas na iya min kamatay sampay ni kasaumulan. 10 Min tˈdda du iya bay amatay boˈ supaya kapuwasanna paldusahan manusiyaˈ kamemon. Saguwāˈ in kallumna buwattinaˈan ma okoman Tuhan na. 11 Ya du kaˈam, subay bistahunbi baranbi saliˈ hantang aˈa amatay, angˈbba na min katagihanna magdusa. Allum na kam bang harap ni Tuhan, ma sabab si Isa Al-Masi ya parakayuˈanbi. 12 Angkan kam subay mbal kapagagihan eˈ dusa indaginis, boˈ mbal beyaˈbi napsubi. 13 Paggatunbi bayaˈ ginhawa-baranbi boˈ kam mbal tabowa angahinang kalaˈatan. Pamalillaˈunbi baranbi ni Tuhan, sabab aˈa kam bay pinakallum eˈna pabīng min kamatay. In ginhawa-baranbi ilu subay pamasukuˈbi ni iya paglagina ma kahinangan abontol. 14 Daˈa kam magpasagad pinagagihan eˈ dusabi, sabab puwas na kam min kalˈngnganan saraˈ. Ma gomgoman Tuhan na kam, kaniyaˈan kaˈaseˈna maka kalasana. 15 Na, ai lagiˈ? Angandusa bahāˈ kitam ma sabab apinda min kalˈngnganan saraˈ ni aseˈ maka lasa Tuhan? Tantu mbal. 16 Kataˈuwanbi du, bang kam saupama magpatiata ni aˈa dakayuˈ, pinagbayaˈan kam eˈna sabab atana kam. Ati bang dusa ya paˈatahanbi, kamatay ya kamattihanna. Bang kabayaˈan Tuhan ya paˈatahanbi, na, kabontolan atay ya kamattihanna. 17 Angkan aheya pagsukulan ni Tuhan! Tagnaˈ, bay kam tabanyagaˈ eˈ dusa, sagōˈ makakale paˈin kam ma pamanduˈ ya pangandolanbi na, magtūy beyaˈbi magatay-poteˈ. 18 Jari pinaluhaya na kam min dusa bay pamanyagaˈan kaˈam tagnaˈ, ati banyagaˈ Tuhan na kam maghinang kabontolan. 19 Amaralil aku pasal banyagaˈ maka nakuraˈ boˈ supaya tahatibi, sabab kulang lagiˈ akkalbi. Ma waktu tagnaˈ inān bay kam magparūl binanyagaˈ eˈ dusabi, ya poˈon kam maghinang kasabulan maka kalaˈatan duhun manduhun. Saguwāˈ buwattinaˈan Tuhan ya pagbanyagaˈanbi, angkan kam maghinang ai-ai abontol ya makasussi pangatayanbi. 20 Satˈggol kam sapantun banyagaˈ abowa-bowa eˈ baˈanan dusabi, mbal kam pasohoˈ maghinang kabontolan. 21 Makaiyaˈ-iyaˈ ya bay kahinanganbi tagnaˈ, bang isab tapikilbi ma buwattinaˈan. Ai bay paluntunganna? Tantu halam, sabab kamatay ya kamattihanna. 22 Sagōˈ ma buwattinaˈan tapuwas na kam eˈ Tuhan min dusa, ati banyagaˈna na kam. Ya paluntunganbi atay asussi tudju ni iya, maka kallum kakkal ya kamattihanna. 23 Tagnaˈ, bay kitam tabanyagaˈ eˈ dusa ati kamatay ya tungbasna, saguwāˈ kallum kakkal ya pangahilas Tuhan ma kitam bang si Isa Al-Masi Panghūˈtam ya pameyaˈantam.
