1 Angkanna kam mbal makaraˈawa, sasuku kam anoway pagkahibi ma sabab alaˈat hinangna. Yukbi in sigām patut pinatˈnnaˈan hukuman, sagōˈ amatˈnnaˈan kam di-bi hukuman sabab ya du kaˈam maghinang kalaˈatan. Hatina, bang kam anoway kaseheˈanbi, saliˈ kaˈam baranbi ya sinoway. 2 Kataˈuwanta asal, abontol hukuman Tuhan ya pamatˈnnaˈna ma sasuku maghinang ginisan laˈat bay sambatku heˈ. 3 Kumpasbi bahāˈ in kaˈam makapuwas min hukuman Tuhan, boˈ paˈin masi maghinang kalaˈatan ya panowaybi seheˈbi? 4 Maˈaseˈ Tuhan ma kaˈam, angkan kam halam pinatˈnnaˈan hukuman saruˈun-duˈun, sagōˈ halam tapaheyabi ma atay in kahāpanna, maka kaˈaseˈna, maka kalunuk pangatayanna. Ya sadja kabayaˈanna in kaˈam subay pataikut sampay angˈbba min dusabi. 5 Sagōˈ atuwas kam, mbal bilahi apinda min dusabi. Angkanna paruhun kabinasahan ma kaˈam bang taˈabut llaw pamatuwaˈ eˈ Tuhan astolna maka hukumanna abontol. 6 Sabab in manusiyaˈ kamemon tinungbasan du eˈ Tuhan pakaniya-pakaniya, pinapagtongod maka ai-ai bay hinang sigām ma dunya. 7 Aniyaˈ manusiyaˈ kaseheˈ atukid maghinang ahāp sabab sanglit maka hulmat min Tuhan ya niangut eˈna, maka kallum kakkal. Ya pamuwan Tuhan ma aˈa buwattēˈ kallum taptap ni kasaumulan. 8 Aniyaˈ isab aˈa kabintanan magpalanga di-na min kaseheˈanna. Sinulak eˈ sigām kasabˈnnalan ati ameyaˈ ma kalaˈatan. Tantu pinatˈkkahan mulkaˈ Tuhan saga aˈa buwattēˈ. 9 Sasuku biyaksa maghinang alaˈat taluwaˈ du katiksaˈan maka kabinasahan, bangsa Yahudi boˈ yampa bangsa kaseheˈ. 10 Saguwāˈ sasuku maghinang ahāp sinanglitan du eˈ Tuhan, binuwanan kahulmatan maka kasannangan atay, bangsa Yahudi boˈ yampa isab bangsa kaseheˈ, 11 sabab Tuhan mbal amapagbiddaˈ ma manusiyaˈ. Saliˈ-saliˈ sigām ma pangˈndaˈna minsan ai bangsa. 12 Saga bangsa kaseheˈ, ya halam bay kapatˈnnaˈan saraˈ si Musa, amutawan du min Tuhan minsan halam aniyaˈ saraˈ pangalanggalan sigām. Maka bangsa Yahudi isab, taluwaˈ sigām hukuman ma buwat panohoˈan saraˈ si Musa. 13 Sabab nggaˈi ka min kakaleta ma saraˈ si Musa ya angkan kita abontol ma pangˈndaˈ Tuhan, saguwāˈ min kapameyaˈta ma panohoˈanna. 14 Halam aniyaˈ saraˈ si Musa ma saga aˈa ya nggaˈi ka Yahudi, sagōˈ bang sigām angahinang kahāpan luwas min deyom atay sigām, hatina tabeyaˈ eˈ sigām saraˈ Tuhan. 15 Aniyaˈ tandaˈ saksiˈ in panohoˈan saraˈ patˈnnaˈ asal ma deyom itikad sigām, jari minnēˈ aniyaˈ pangitaˈu sigām pasal hinang ya patut nihinang maka mbal. 16 Manjari bang taˈabut llaw damuli, ya llaw pangahukum Tuhan ma manusiyaˈ labay min si Isa Al-Masi, tinanding eˈna ai-ai bay katapukan ma deyom pamikil, ati minnēˈ sigām nihukum. Buwattēˈ isab ma lapal ahāp ya pagnasihatku. 17 Na kaˈam saga Yahudi, ya pasangdol ma saraˈ-panohoˈan min si Musa boˈ supaya kam tinaimaˈ eˈ Tuhan. Tuhan isab ya pagmalangkahianbi ni aˈa kaseheˈan. 18 Kataˈuwanbi bang ai pangahandak Tuhan ma kaˈam, maka bang ai ya wajib hinangbi ma sabab saraˈ si Musa ya pangadjiˈanbi. 19 Pangannalbi in kaˈam tōp magmalim ma aˈa buta, ya halam pangadjiˈna. Yukbi in kaˈam saliˈ sawa pamasawa akkal aˈa kaseheˈ, ya ma deyom kalendoman. 20 Pangannalbi isab in kaˈam jukup ma akkal maka ma pangitaˈu sabab ilu saraˈ ma kaˈam, angkan yukbi in kaˈam ataˈu amaguru ma aˈa mbal ataˈu, amituwa isab ma saga aˈa aˈawam. 21 Ataˈu kam amanduˈ ma aˈa kaseheˈan, angay kam mbal amanduˈan di-bi? Bandaˈanbi aˈa kaseheˈ subay mbal anangkaw, boˈ kaˈam ya anangkaw du! 22 Pamanduˈbi subay mbal angaliyu-lakad ma nggaˈi ka pagholaˈna, boˈ kaˈam ya labi magdˈnda. Asammal konoˈ ma pangˈndaˈbi bang aˈa anumba taˈu-taˈu, boˈ paˈin kaˈam ya angagaw ai-ai ahalgaˈ min lumaˈ pagsusumbahan taˈu-taˈu inān! 23 Magabbu-abbu kam in kaˈam kabuwanan saraˈ Tuhan, sagōˈ kaˈam ya amuwan kamaruhan ma Tuhan pagka halam beyaˈbi panohoˈanna. 24 Buwat bay tasulat ma deyom Kitab, ya yuk-i, "Kaˈam saga Yahudi ya sababna angkan Tuhan pinahˈllingan pangkal eˈ bangsa kaseheˈan." 25 In kitam Yahudi sinōˈ niˈislam tandaˈ saksiˈ in kitam aˈa sukuˈ Tuhan. Saguwāˈ bang kam maglalanggal saraˈ, saliˈ halam aniyaˈ pūs ma pagislambi. Ahāp lagiˈ kam halam bay niˈislam. 26 Bang takdil ni aˈa nggaˈi ka Yahudi, aˈa halam bay niˈislam, abila sigām ameyaˈ ma panohoˈan saraˈ, binista sigām eˈ Tuhan sukuˈna saliˈ du maka aˈa bay niˈislam. 27 Manjari kaˈam saga Yahudi katōngan dusa eˈ bangsa kaseheˈ inān, minsan kam kaniyaˈan Kitab Tawrat. Katōngan kam dusa sabab kaˈam ya angalanggal saraˈ minsan bay niˈislam, sagōˈ sigām ya angisbat saraˈ minsan halam bay niˈislam. 28 Ya dī Yahudi nggaˈi ka aˈa ya amogbogan addat maka usulan Yahudi, ya taga-bainat pagislam isab ma baranna. 29 Ya taluwaˈ niōnan Yahudi toˈongan bang aˈa taga-bainat ma deyom pangatayanna. Hinang Rū Tuhan koˈ itu, nggaˈi ka min pamogbogna ma saraˈ. Aˈa inān mbal sinanglitan eˈ pagkahina manusiyaˈ bang buwattēˈ kapagyahudina, sagōˈ sinanglitan iya eˈ Tuhan.
