1 Manjari angannal-ngannal lagiˈ aku: "Tinimanan bahāˈ eˈ Tuhan bangsa dakayuˈ-kayuˈ ya palsukuˈanna?" Tantu mbal. Bangsaku koˈ inān sabab bangsa Israˈil aku, tubuˈ si Ibrahim, min panubuˈ si Benjamin. 2 Halam katimanan eˈ Tuhan bangsa ya bay tapeneˈna sangay min awal tagnaˈ. Kataˈuwanbi ya tasulat ma deyom Kitab, waktu kapanutul si Elija ni Tuhan pasal bangsa Israˈil. Yuk si Elija eˈ, 3 "O Tuhan, pinapatay eˈ sigām saga nabi sosohoˈannu. Nilubu eˈ sigām pagkukulbanan kami ni kaˈa. Hal aku laˈa takapin min baˈanan nabi, ati piniha aku eˈ sigām boˈ pinapatay." 4 Entomunbi bay panambung Tuhan ma panutul si Elija eˈ, yuk-i, "Aniyaˈ giˈ pituˈ ngibu aˈa bay kapinanku, aˈa halam bay makasumba ni taˈu-taˈu Baˈal." 5 Damikiyanna ma buwattinaˈan, aniyaˈ giˈ takapin bangsa Israˈil halam pataikut min Tuhan, aˈa isab tapeneˈna min lasana maka min kaˈaseˈna ma sigām. 6 Bang kasi-lasa Tuhan ya sababanna angkan iya ameneˈ aˈa, tantu nggaˈi ka kahinangan manusiyaˈ ya makasabab. Sagōˈ bang Tuhan bay ameneˈ aˈa ma saukat na ahāp hinangna, saliˈ halam aniyaˈ pūs ma aseˈ maka lasa Tuhan eˈ. 7 Jari ai lagiˈ? Halam tabāk eˈ bangsa Israˈil ya pagmatayan sigām. Luwal aˈa pineneˈ eˈ Tuhan ya makabāk. Bay pinatuwas kōk saga aˈa kaseheˈan, 8 buwat tasulat ma kitab, ya yuk-i, "Pinabongog eˈ Tuhan pamikil sigām, ya poˈon mbal makahati. Aniyaˈ mata sigām sagōˈ mbal makaˈndaˈ, Aniyaˈ tainga sigām sagōˈ mbal makakale." 9 Aniyaˈ isab bay pamissala si Daˈud, yukna, "Bang paˈin sigām nijallat eˈ paglami sigām, Bang paˈin sigām palukbuˈ sampay ahˈbbaˈ, panungbas kalaˈatan sigām. 10 Bang paˈin palendom pangˈndaˈ sigām boˈ mbal makaˈndaˈ, bang paˈin parukkug bukut sigām sampay ni kasaumulan." 11 Amikilan lagiˈ aku pasal bangsa Israˈil itu. Ya kahˈbbaˈ sigām inān, anatas bahāˈ sampay ni kasaumulan? Tantu mbal. Sabab buwattitu ya pinagmohotan eˈ Tuhan: saga bangsa nggaˈi ka Israˈil pasˈlleˈ na lappasan min hukuman dusa ma sabab karusahan bangsa Israˈil. Minnēˈ isab in bangsa Israˈil tabowa angihid pagka tinaikutan. 12 Kira-kirahunbi, bang kaniyaˈan kahāpan saga aˈa nggaˈi ka Israˈil ma sabab karusahan bangsa Israˈil, maka ma sabab kapanaikut Tuhan ma sigām, luhūy paheya kahāpan ma palbangsa-bangsahan kamemon bang jukup na saga aˈa Israˈil magpangahagad. 13 Aniyaˈ pamissalaku ma kaˈam ya nggaˈi ka Yahudi. Kawakilan aku eˈ Tuhan magnasihat ma buwat kaˈam. Paheyaku isāb pagnasihatku itu ma atay, 14 bang paˈin pinaihid pagkahiku Yahudi boˈ supaya aniyaˈ sigām lappasan min mulkaˈ. 15 Sabab bang maghāp na Tuhan maka saga palbangsa-bangsahan ma sabab kataikut Tuhan ma bangsa Israˈil, ai kaluwasanna bang sigām tinaimaˈ eˈ Tuhan pabīng? Lumanduˈan ahāp. Saliˈ sigām aˈa pinakallum pabīng min kamatay. 16 Buwat tinapay bang ma pangaddat Yahudi. Niakup dangkuriˈ min addunan bay panukbal ni Tuhan, paltandaˈan in tinapay inān kamemon palsukuˈan Tuhan du. Atawa poˈon kayu, panukbal gamutna ni Tuhan, jari palsukuˈanna katibuˈukan kayu inān sampay ni sangana. 17 Na, magparalilan aku: bang aniyaˈ sanga sinagpeˈ min poˈon kayu niˈipat, boˈ aniyaˈ sanga kayu talun pinabatuk ni bay panagpeˈan sanga tagnaˈ, jari kabahagiˈan kajatuhan min kayu niˈipat saga magdalos na maka gamutna. 18 Sagōˈ daˈa pagabbu-abbuhinbi, sabab kaˈam ilu hal sanga, maka nggaˈi ka sanga ya amuwan kallum ma gamut. Gamut ya amuwan kallum ma sanga. 19 Kalu yukbi, "Bˈnnal koˈ ilu, saguwāˈ sinagpeˈ sigām eˈ Tuhan supaya kami kapabatukan." 20 Ahoˈ, bˈnnal. Sagōˈ ya poˈon sigām bangsa Israˈil sinagpeˈ sabab agagga amˈnnal ma Tuhan, ati kaˈam ya pinabatuk ni poˈon kayu ma sabab kapamˈnnalbi. Sagōˈ daˈa pagmalangkahianbi inaˈan-i. Gom paˈin kam magmatāw, ya aniyaˈ kam sinagpeˈ buwat bay sigām. 21 Sabab hatina, bang mbal allog Tuhan ma saga sanga porol, ya du kaˈam mbal kaˈlloganna. 22 Kira-kirahunbi kaˈaseˈ Tuhan maka kabˈngngisna. Kabˈngngisanna saga aˈa ya pataikut min iya, saguwāˈ kaˈaseˈanna kam bang paˈin pataptap ma kahāpna, mbal maglaˈan-laˈan. Bang kam gantaˈ pataikut min pangandolbi, ya du kaˈam sinagpeˈ du buwat ibarat sanga kayu. 23 Ya balikna, pinabatuk bangsa Israˈil ni bay bai sigām, bang sigām gantaˈ pahali anulak Al-Masi. Sabab halam aniyaˈ ahunit ma Tuhan. 24 Ya hantang hatulanna, bang kaˈam bay niāˈ min kayu jaitun talun boˈ pinabatuk ni kayu niˈipat, labi aluhay bang bangsa Israˈil pinabīng ni kayu bay panagpeˈan sigām tagnaˈ, sabab ya na poˈonan sigām. 25 Saga dauranakanku, aniyaˈ bay pamataˈu aku eˈ Tuhan ma pasal bangsa Israˈil itu. Bilahi aku amahatian kaˈam supaya kam mbal amikil di-bi in kaˈam ahāp min sigām. Buwattitu: in bangsa Israˈil itu bay agagga amˈnnal ma si Isa Al-Masi, saguwāˈ mbal anatas kagagga sigām. Bang ajukup na kahekaˈan aˈa min bangsa saddī ameyaˈ ma Tuhan, ameyaˈ isab bangsa Israˈil. 26 Manjari lappasan isab bangsa Israˈil kamemon, buwat bay sinulat ma deyom Kitab, ya yuk-i, "Piˈitu min lahat Siyun ya Manglalappas. Pahalamna saga laˈat bay tahinang eˈ panubuˈ si Yakub. 27 Makapiˈilu paˈin aku, laˈananku dusa sigām kamemon, buwat bay asal tajanjiˈku ma sigām." 28 In bangsa Israˈil itu bay banta Tuhan sabab tasulak eˈ sigām lapal ahāp pasal si Isa Al-Masi, sagōˈ in kahāpan bay ma sigām tagnaˈ papelleng na ni bangsa saddī. Saguwāˈ mbal du taptap kapanaggaˈ sigām, sabab nientom eˈ Tuhan bay kapameneˈna ma kaˈmboˈ-mboˈan sigām, angkan sigām kinalasahan na paˈin. 29 Sabab Tuhan, bang aniyaˈ aˈa bay pineneˈ eˈna sampay lidjikiˈanna, mbal toˈongan apinda niyatna. 30 Kaˈam nggaˈi ka Yahudi ilu, bay kam anulang kabayaˈan Tuhan ma waktu palabay inān, mandaˈ kinaˈaseˈan kam eˈna buwattinaˈan ma sabab kapanulang bangsa Yahudi. 31 Ya du isab bangsa Yahudi, tasulang eˈ sigām kabayaˈan Tuhan buwattinaˈan, sagōˈ kinaˈaseˈan sigām eˈ Tuhan buwat kaˈaseˈna ma kaˈam. 32 Min kahandak Tuhan angkan in kamemon bangsa manusiyaˈ tahinang saliˈ sapantun pilisu mbal makalimaya min kapanulang sigām, boˈ supaya in sigām kamemon pinatˈkkahan aseˈna. 33 Mbal tapulaˈ-pulaˈ kahāp Tuhan, kaˈaseˈna, pangitaˈuna maka panahuˈanna. Halam aniyaˈ min kitam makahati ma kagaraˈanna maka ma kahinanganna. 34 Buwat yukna ma deyom Kitab, "Sai makataˈu panahuan Tuhan? Sai makapituwahan iya? 35 Sai bay makabuwanan Tuhan ai-ai, atawa bay makapautang ma iya?" 36 Min Tuhan asal ai-ai kamemon. Iya ya bay amaniyaˈ kamemon maka iya isab sababanna angkan paniyaˈ baˈanan ai-ai kamemon. Sanglitanta iya ni kasaumulan. Amin.
