1 Saga dauranakanku bebeyaˈan si Isa, ya pagmatayanku toˈongan pagkahiku bangsa Yahudi, bang paˈin sigām lappasan boˈ makasōd ni deyom sulgaˈ. Ya koˈ inaˈan pangamuˈ-ngamuˈku ni Tuhan. 2 Makasaksiˈ aku ma pasal katuyuˈ sigām ma Tuhan, sagōˈ halam tahati eˈ sigām bang ai kataluwaˈanna. 3 Halam tahati sigām bang buwattingga eˈ Tuhan angampun dusa, maka eˈna amuwan kabontolan ma manusiyaˈ. Angusul sigām ma agama sigām, ati mbal anambut kabontolan ya pamatˈnnaˈ Tuhan ma sigām. 4 Ya saraˈ bay tasulat eˈ si Musa taga-katumanan na pagka makapiˈitu na Al-Masi, manjari sai-sai angandol ma iya niōnan abontol eˈ Tuhan. 5 Aniyaˈ isab tasulat eˈ si Musa pasalan aˈa amogbogan saraˈ supaya binista abontol eˈ Tuhan. Yuk sulat eˈ, "Sai-sai angahinang panohoˈan saraˈ itu, aniyaˈ kallumna kakkal." 6 Aniyaˈ sulat dakayuˈ pasal kabontolan atay ya pinaniyaˈan sasuku angandol, yuk-i, "Daˈa kam atilaw-tilaw ma deyom ataybi bang sai patukad pariyataˈ ni sulgaˈ." (Hatina sai amareyoˈ Al-Masi minnēˈ.) 7 "Daˈa isab kam atilaw bang sai pareyoˈ ni deyom ahirat." (Hatina sai amowa Al-Masi pariyataˈ min lahat kamatayan.) 8 Kira-kirahunbi ayat Kitab dakayuˈ, ya yuk-i, "Ilu na lapal Tuhan ma kaˈam. Ilu ma deyom bowaˈbi. Ilu isab ma deyom ataybi." Hatina ilu na ma kaˈam lapal bay nasihat kami pasal pangandol ma si Isa Al-Masi. 9 Bang kam magpasabˈnnal in si Isa Panghūˈbi maka magkahagad toˈongan min deyom ataybi in iya bay pinakallum min kamatay eˈ Tuhan, tantu kam lappasan boˈ pasōd ni deyom sulgaˈ. 10 Sabab min pagkahagadtam ma si Isa ya angkan kitam binista abontol eˈ Tuhan, ati bang kitam angahaka sabˈnnal ni aˈa kaseheˈan pasal pagkahagadtam, minnēˈ kitam lappasan. 11 Yuk sulat Kitab isab, "Sai-sai magkahagad ma iya halam aniyaˈ pagsusunanna sapupud-daya." 12 Talapay manusiyaˈ kamemon pinagbissala ma ayat Kitab itu, sabab mbal magbiddaˈ Yahudi maka nggaˈi ka Yahudi. Dakayuˈ du Tuhan ya pameyaˈan eˈ sigām kamemon, maka aheya kahāpan pamuwanna ma sasuku parahing ni iya. 13 Buwat tasulat ma deyom Kitab, ya yuk-i, "Sai-sai parahing ni Panghūˈ, tantu lappasan." 14 Buwattingga eˈ sigām parahing ni Panghūˈ bang halam giˈ makapamˈnnal ma iya? Maka buwattingga eˈ sigām amˈnnal bang halam giˈ bay makakale lapal ahāp? Buwattingga isab eˈ sigām akale lapal ahāp bang halam aniyaˈ magnasihatan sigām? 15 Maka buwattingga isab eˈ aˈa magnasihat bang halam aniyaˈ bay anohoˈ iya magnasihat? Sagōˈ aniyaˈ bay sinohoˈ, buwat tasulat ma deyom Kitab, ya yuk-i, "Kahāp du paˈin bang aniyaˈ amowahan kita lapal ahāp!" 16 Saguwāˈ nggaˈi ka aˈa kamemon bay akale lapal ahāp itu, buwat na bay pamūng si Isaya inān, ya yuk-i, "O Tuhan, kulang du aˈa magkahagad ma panglapal kami." 17 Manjari lapal pasal Al-Masi subay pinagnasihat dahū boˈ yampa takale eˈ aˈa, ati minnēˈ aniyaˈ pagkahagad sigām. 18 Amikilan aku pasal bangsa Israˈil. Kalu bahaˈ halam takale sigām lapal ahāp pasal si Isa Al-Masi? Sagōˈ tantu takale sabab atanyag lapal itu, buwat tasulat ma deyom Kitab, yukna, "Patanyag pamanduˈ sigām ni kamemon bangsa, pasampay bissala sigām ni mpat pidju alam." 19 Amikilan lagiˈ aku, kalu halam tahati eˈ bangsa Israˈil pasal lapal itu. Sagōˈ tahati du. Si Musa ya makarahū anambung, yukna, "Pagalakta kam ni bangsa kaseheˈ, ya yukbi halam aniyaˈ gunana. Papˈddiˈku ataybi tudju ni bangsa dakayuˈ, ya pangannalbi mbal makataˈuwan aku." 20 Atampal du pangallam Tuhan ya tasulat eˈ si Isaya, yuk-i, "Tabāk aku eˈ saga aˈa bay halam amiha aku. Panyataˈ aku ni saga aˈa halam bay atilaw ma pasalanku." 21 Saguwāˈ buwattitu ya pamissala Tuhan ma pasal bangsa Israˈil, yukna, "Kahabaˈ llaw bilahi aku anaimaˈ saga aˈa anaggaˈ aku, ya anaggaˈ na paˈin ma kabayaˈanku."
