1 Sulat itu deyoˈ min aku, si Paul, pinasampay ni kaˈam ma daˈira Rōm. Aku itu dakayuˈ sosohoˈan si Isa Al-Masi. Tapeneˈ aku eˈ Tuhan, kawakilan eˈna magnasihat lapalna ahāp. 2 Lapal ahāp itu bay panganjanjiˈ eˈ Tuhan ma masa awal. Bay pinalatun eˈna ma saga nabi, ati sinulat eˈ sigām ma deyom Kitab. 3 Si Isa anak Tuhan ya pinagbissala ma lapal ahāp itu. Bang takdil ni kapagaˈana, tubuˈ iya min sultan Daˈud. 4 Bang takdil ni kajarihanna maka palnyawahanna, asussi iya luwas bay min Rū Sussi, maka manyatakan isab in iya bˈnnal Anak Tuhan ma sabab kosog kawasa Tuhan ya bay pamakallum iya min kamatay. Si Isa Almasi Panghūˈtam koˈ itu. 5 Iya ya palsababan angkan aku kabuwanan kapatut eˈ Tuhan ati kawakilan magnasihat boˈ supaya aniyaˈ saga aˈa min bangsa kamemon tabowa eˈku magsabˈnnal maka ameyaˈ ma si Isa. 6 Ya du kaˈam maglahat ma daˈira Rōm ilu, tapeneˈ du isab kam eˈ Tuhan boˈ pasukuˈ ma si Isa Al-Masi. 7 Amabeyaˈ aku sulat itu ni kaˈam kamemon mailu ma Rōm, aˈa kinalasahan eˈ Tuhan maka pineneˈ eˈna boˈ kam manjari aˈana. Mura-murahan, bang paˈin kam kaniyaˈan tatabangan maka kasannangan atay eˈ Mmaˈtam Tuhan maka eˈ si Isa Al-Masi Panghūˈtam. 8 Tagnaˈanku na bissalaku ma kaˈam: magsukul aku ni Tuhan labay min si Isa Al-Masi, maka magsukul aku ma pasalanbi kamemon sabab abantug na pangandolbi sampay ma kaluhaˈan dunya. 9 Saksiˈku Tuhan ya paghinanganku min deyom atay pagka aku magnasihat lapal ahāp pasal Anakna. Taentomku kam sakahabaˈ 10 waktu kapangarapku ni Tuhan. Amuˈku isab ni iya bang paˈin aku kinahandakan eˈna supaya makaluhaya piˈilu patibaw ni kaˈam ma waktu itu. 11 Landuˈ toˈongan aku bilahi magˈndaˈ maka kaˈam sabab aniyaˈ kahāpan min Rū Tuhan bowahanku kaˈam, supaya angahogot imanbi tudju ni Tuhan. 12 Saguwāˈ bang aku makamailu ma kaˈam, magkalasigan kitam saliˈ-saliˈ, kaˈam ma sabab pangandolku, aku isab ma sabab pangandolbi. 13 Saga dauranakanku, kabayaˈanku subay kam mbal aˈawam ma pasalanku. Min heka na aku bay agaraˈ anibaw kaˈam, saguwāˈ aniyaˈ na paˈin makabimbang, ya poˈon aku halam bay makalanjal. Ya maksudku piˈilu, subay aniyaˈ paluntungan min pagnasihatku, hatina aniyaˈ aˈa tabowaku magsabˈnnal ma si Isa, buwat bay kapamowaku ma bangsa kaseheˈ ya nggaˈi ka isab Yahudi. 14 Sabab aniyaˈ hinang bay pamaˈatas ma aku, ya poˈon aku subay magnasihat lapal ahāp ma aˈa kamemon minsan ai bangsa, bangsa Girīk ka atawa bangsa saddī, aˈa taga-pangadjiˈ ka atawa halam aniyaˈ pangadjiˈna. 15 Angkan aku atuyuˈ toˈongan magnasihat lapal ahāp itu sampay ma kaˈam ya maglahat mailu ma daˈira Rōm. 16 Mbal aku aiyaˈ magnasihat lapal ahāp itu sabab aniyaˈ barakatna min Tuhan pamapuwas aˈa kamemon min hukuman dusa, bangsa Yahudi dahū boˈ yampa bangsa kaseheˈ, ya sasuku magsabˈnnal ma lapal itu. 17 Lapal ahāp itu amahatian kitam bang buwattingga pamabontol Tuhan ma kitam manusiyaˈ. Subay kitam angandol sadja, min tagnaˈanna sampay ni katapusanna, buwat bay tasulat ma deyom Kitab, ya yuk-i, "Sai-sai angandol ma Tuhan, boˈ tabista eˈna abontol, allum du iya." 18 In mulkaˈ Tuhan pinabukis na min deyom sulgaˈ, pinatˈkkahan saga manusiyaˈ ma sabab ya nihinang eˈ sigām ma halam aniyaˈ pagmatāw ma Tuhan. Katambunan eˈ sigām in pangitaˈu bˈnnal. 19 Patut sigām minulkaˈan sabab manyatakan asal kajarihan Tuhan, sabab baran Tuhan ya bay amataˈuwan sigām. Tuˈud sigām mbal bilahi amˈnnal. 20 Sangay min waktu bay pamapanjari dunya itu eˈ Tuhan atampal asal palantarana, minsan iya mbal taˈndaˈ eˈ manusiyaˈ. Atampal in iya taga-kawasa taptap ni kasaumulan. Atampal isab in iya Tuhan, takilā asal min kamemon ai-ai bay papanjarina. Manjari halam aniyaˈ aˈa makaraˈawa in iya aˈawam pasal Tuhan. 21 Makataˈu asal sigām ma pasal Tuhan, in iya patut pagtuhanan, saguwāˈ mbal sigām bilahi angamahaltabat iya atawa angōn Tuhan ma iya. Mbal sigām minsan magsarang-sukul. Ya pinikil na paˈin eˈ sigām pikilan halam aniyaˈ kagunahanna, ati alendom akkal sigām kabowa karupangan ya tahinang sigām. 22 Maglaku-laku sigām in sigām taga-pangitaˈu sagōˈ magkarupangan sadja. 23 Arapun sigām amudji Tuhan ya taptap allum, saguwāˈ ya pinudji eˈ sigām saga taˈu-taˈu pinaka luwa manusiyaˈ ya magkamatay. Pinudji isab eˈ sigām taˈu-taˈu luwa hayop, luwa manuk-manuk, luwa ai-ai maglelehan ma kuwit tanaˈ. 24 Angkanna manusiyaˈ itu pinasagaran eˈ Tuhan magdūl-bayaˈ ma kasabulan ai-ai kinanapsuhan eˈ sigām. Magkahinangan na paˈin sigām kalumuˈan dapagkahian. 25 Sinulak eˈ sigām bissala bˈnnal pasal Tuhan ati pineneˈ eˈ sigām bissala puting. Ya sinumba eˈ sigām saga ai-ai bay pinapanjari eˈ Tuhan, sagōˈ Tuhan ya mbal sinanglitan minsan iya ya Magpapanjari angkan patut subay pinudji sampay ni kasaumulan. Amin. 26 Pagka buwattēˈ kahinangan manusiyaˈ, pinasagaran sigām eˈ Tuhan magpangandūlan napsu sigām makatamparasa. Angˈbba karˈndahan min addat sigām karˈndahan boˈ magkabayaˈ maka pagkahi dˈnda maghinang alaˈat. 27 Damikiyanna isab kalˈllahan, mbal bilahi ma dˈnda sagōˈ magkabayaˈ maka pagkahi sigām lˈlla. Magbeyaˈ sigām maghinang kasabulan, angkan sigām pinatˈkkahan laˈat pinapagtongod maka kalaˈatan ya bay tahinang sigām. 28 Na, pagka bangsa manusiyaˈ itu mbal bilahi angisbat pangitaˈu bˈnnal pasal Tuhan, pinasagaran sigām eˈna magpikil karupangan, ati nihinang eˈ sigām ya mbal manjari nihinang. 29 Apˈnnoˈ panahuˈan sigām eˈ kalaˈatan maka dusa kaginisan, hawa napsu maka kajahilan. Makalanduˈ heka kalaˈatan ma deyom pangatayan sigām, buwat saga angalindi, amonoˈ pagkahi sigām manusiyaˈ, angalugat, angulliˈ, anganjahulakaˈ, amalatun bissala alaˈat, 30 angalimut isab sigām ma kaseheˈan sigām. Abˈnsi saga aˈa buwattēˈ ma Tuhan. Ajingki sigām ma pagkahi sigām, alanga toˈongan atay sigām maka magabbu-abbu na paˈin. Ya sadja pinikil eˈ sigām bang buwattingga kasōng hinang sigām alaˈat-i. Agagga sigām ma pamiˈat mattoˈa 31 maka alaˈat pamikil sigām. Mbal sigām kapangandolan, mbal alasa atawa maˈaseˈ ma pagkahi sigām, mbal tabowa magkahāp. 32 Makataˈu saga manusiyaˈ itu abontol asal pangahandak Tuhan ma pasal aˈa maghinang saga dusa itu, in sigām subay pinapatay. Sagōˈ minsan buwattēˈ, luhūy sigām maghinang kalaˈatan maka kinōgan gom paˈin bang aniyaˈ aˈa kaseheˈ makasaliˈ ni sigām.
