1 Manjari ya malaˈikat kalimana bay amahˈlling tiyup-tiyupna, ati aniyaˈ taˈndaˈku saliˈ bituˈun bay ahūg ni dunya min diyataˈ langit. Bituˈun itu bay kabuwanan kunsiˈ pangukab tambol lowang tegob-tegoban. 2 Pagukabna paˈin lowang inān, magtūy aniyaˈ humbu anˈbbud min deyomna, saliˈ humbu min tunuˈ aheya. Jari kalendoman llaw maka langit eˈ humbu inān. 3 Aniyaˈ baˈanan ampan patˈppak ni dunya luwas bay min deyom humbu, kabuwanan kapatut angeket, buwat jalalangking. 4 Sinōˈ sigām daˈa amakaˈat kaparang-parangan atawa kakayu-kayuhan atawa ai-ai patomoˈ ma babaw dunya. Luwal saga aˈa halam bay kasāpan tuktuk sigām maka sāp Tuhan ya makajari minula eˈ saga ampan inān. 5 Malaingkan mbal sigām pinarūl amapatay. In manusiyaˈ inān subay pinapˈddiˈan sadja ma deyom limambulan. Ya nanam pˈddiˈ kalabayan saga aˈa inān saliˈ maka pˈddiˈ keket jalalangking. 6 Na, ma deyom limambulan parahing na paˈin saga aˈa kineket itu bang paˈin sigām amatay, sagōˈ mbal tinugutan amatay. Bilahi toˈongan sigām amatay sagōˈ mbal nirūlan. 7 Ya pangluwahan saga ampan inān saliˈ hantang kuraˈ pinanyapan song panguraˈan ni pagbonoˈan. Aniyaˈ saliˈ korona bulawan paporong ma kōk sigām, maka pamaihuˈan sigām saliˈ manusiyaˈ. 8 Buˈun sigām atahaˈ saliˈ buˈun dˈnda, maka empon sigām saliˈ taling sattuwa halimaw. 9 Daggaha sigām tinamingan maka sisik saliˈ luwa basiˈ. Angˈllub isab pikpik sigām bang pajabjab, saliˈ tagandak baˈanan kuraˈ angangguyud saga kalesa bang parugpak ni pagbonoˈan. 10 Togel sigām saliˈ togel jalalangking, taga-tugsuk ma tōngna. Ya inaˈan paminasa sigām ma manusiyaˈ ma deyom limambulan. 11 Aniyaˈ isab sultan magagi ma sigām, ya na dakayuˈ saitan tag-ntanan lowang tegob-tegoban inān. Ōn tag-ntanan inān, bang ma bahasa Hibrani, si Abaddon. Bang ma bahasa Girīk, si Apolyon, hatina Pamamakaˈat. 12 Na, minnēˈ patobtob na balaˈ ya dahū pinatˈkka, sagōˈ masi giˈ duwa balaˈ damuli. 13 Manjari malaˈikat kannomna bay amahˈlling tiyup-tiyupna ati makakale aku suwala paluwas min mpat dugu lamisahan bulawan ya pagtugtugan kamanyan, ya mainaˈan ma alopan Tuhan. 14 Buwattitu ya lapal suwala inān, yukna, "Hubarin na mpat saitan ya bay niengkotan ma bihing sapaˈ Alpurati heˈ." 15 Saga saitan inān bay pinasakap asal sagōˈ halam sigām bay nihubaran. Subay na taˈabut waktuna toˈongan, llawna maka bulanna maka tahunna, boˈ yampa sigām pinaluwas amapatay baˈanan manusiyaˈ, dabahagiˈ min bahagiˈ tˈllu ma sigām kamemon. 16 Kahakaˈan aku bang pila sundalu ma deyoˈan mpat saitan eˈ, aˈa magpanguraˈ lullun. Duwampūˈ ngibu laksaˈ konoˈ ya heka sigām. 17 Buwattitu ya pangluwahan saga kuraˈ bay taˈndaˈku, maka saga sundalu magpanguraˈ inān. Ya daggaha sigām bay tinampanan maka taming magwalnaˈ keyat api maka bilu alutuˈ maka saliˈ biyaning mailang. Ya kōk kuraˈ inān angaluwa halimaw, ya bowaˈ sigām paluwasan api maka humbu maka mailang arokot. 18 Jari amatay in binangsa manusiyaˈ, dabahagiˈ min bahagiˈ tˈllu. Ya makapatay inān tˈllu ginis balaˈ bay paluwas min bowaˈ saga kuraˈ, hatina api maka humbu maka mailang arokot. 19 Aniyaˈ duwa balaˈ pamapatay saga kuraˈ inān ma manusiyaˈ. Kaissana, ya balaˈ paluwas min bowaˈ sigām. Karuwana, ya balaˈ ma togel sigām, sabab togel sigām inān saliˈ sowa taga-kōk pangamula ma manusiyaˈ. 20 Malaingkan saga manusiyaˈ takapin, ya halam bay amatay eˈ balaˈ inān, mbal toˈongan pataikut min taˈu-taˈu pagtutuhanan sigām. Mbal sigām pahali anumba ni saga saitan sampay ni taˈu-taˈu mbal makaˈndaˈ, mbal makakale, maka mbal makalˈngngan, ya bay hinangan bulawan, pilak, tumbaga, batu maka kayu. 21 Mbal sigām papinda min kahinangan alaˈat. Masi-masi sigām magpamonoˈ sampay amantak ni pagkahi sigām. Mbal sigām pahali maghinang kasabulan dˈnda maka lˈlla, sampay magtangkaw.
