1 Manjari aniyaˈ na isab taˈndaˈku malaˈikat pareyoˈ min sulgaˈ, amowa kunsiˈ tambol lowang tegob-tegoban, maka kilikili aˈaslag. 2 Sinaggaw eˈna naga, ya Sowa Masa Awal, hatina nakuraˈ saitan atawa hibilis. Tasaggaw paˈin, niengkotan iya maka kilikili ati ginantaˈan dangibu tahun. 3 Puwas eˈ, nilarukan iya eˈ malaˈikat ni deyom lowang tegob-tegoban, boˈ kinandaruhan pahogot sampay pinikitan gindan boˈ mbal taukab. Tinambolan nakuraˈ saitan inān boˈ supaya mbal na paˈin makapangakkal ma palbangsa-bangsahan, satˈggol mbal giˈ paˈabut ni dangibu tahun eˈ. Bang taˈabut na dangibu tahun, pinalˈppa du iya, sagōˈ daiˈ-daiˈ du. 4 Manjari itu aniyaˈ taˈndaˈku saga paningkōˈan babangsahun maka saga aˈa magtingkōˈan mainaˈan. Kabuwanan sigām kapatut amalˈngngan hukuman. Taˈndaˈku baˈanan saga umagad min aˈa bay pinapatay ma sabab pagnasihat sigām panduˈ bˈnnal ya bay pamataˈu eˈ si Isa, maka ma sabab palman Tuhan. Saga aˈa itu halam bay makasumba ni sattuwa talun atawa ni taˈu-taˈu hinangan pangluwahanna. Halam isab bay makataimaˈ umbul sattuwa panāp tuktuk sigām atawa tangan sigām. Allum na sigām pabalik min kamatay ati ameyaˈ sigām ma Al-Masi magsultan ma deyom dangibu tahun. 5 Ya inaˈan tagnaˈan pagpakallum pabalik ma saga aˈa bay magpatayan. (Aˈa magpatayan kaseheˈ mbal giˈ pinakallum pabīng. Subay na apuwas dangibu tahun eˈ.) 6 Aheya kalasigan maka kahāpan sasuku makasambeyaˈ pinakallum min kamatay ma pagpakallum dahū itu. Mbal sigām talapay ma kabinasahan paddas, ya pinagbahasa kamatay kaminduwana. Pinaˈntanan sigām hinang kaimaman angarap ni Tuhan maka ni Al-Masi. Ati ameyaˈ sigām ma Al-Masi angˈntan pagparinta ma deyom dangibu tahun. 7 Na, bang atobtob na dangibu tahun inān, pinalˈppa du nakuraˈ saitan min deyom lowang bay pangalabusuhan iya. 8 Pagluwasna minnēˈ, angakkal na isab iya ma kabangsa-bangsahan ma mpat pidjū alam, ya bangsa pinagōnan Gōg maka Magog. Pinapagsakaum saga aˈa inān kamemon eˈ nakuraˈ saitan, pinasakap magbonoˈ. Ya heka sigām inān saliˈ sapantun heka solagan gusung ma bihing tampe. 9 Manjari maglanjalan baˈanan aˈa inān boˈ angulatapan kaluhaˈan dunya, sampay alikus eˈ sigām paghantiˈan aˈa sukuˈ Tuhan maka daˈira kalasahanna. Sagōˈ aniyaˈ api pareyoˈ min langit anunuˈ sigām kamemon. 10 Puwas eˈ in nakuraˈ saitan, ya bay angakkalan saga aˈa palbangsa-bangsahan inān, waˈi nilarukan ni deyom api mailang ya magdanaw-danaw suleyabna. Ya na heˈ api bay pangalarukan sattuwa talun maka nabi putingan. Na, inaˈan sigām pinapˈddiˈan llaw-sangom sampay ni kasaumulan. 11 Manjari itu aniyaˈ taˈndaˈku paningkōˈan apoteˈ maka aheya, maka taˈndaˈku isab ya magtingkōˈ mainaˈan. Dunya maka langit waˈi na alaˈan min haddaratna, mbal na taˈndaˈ pabīng. 12 Sakali taˈndaˈku aˈa magpatayan kamemon aheya-arikiˈ, inaˈan magpanˈngge ma dahuan paningkōˈan inān. Jari niukab kakitaban, maka aniyaˈ giˈ kitab dakayuˈ niukab, ya kitab pagsusulatan ōn saga aˈa, sasuku kabuwanan kallum kakkal. Saga aˈa magpatayan inān nihukum min bay kahinangan sigām ahāp-alaˈat, ya tasulat asal ma deyom saga kitab inān. 13 Sai-sai bay magpatayan ma deyom tahik bay paluwas paharap ni Tuhan. Damikiyan isab sigām bay ma deyom gumi maka nalkaˈ paluwas isab sigām kamemon boˈ paharap ni Tuhan. Ati nihukum sigām kamemon kaniya-kaniya min bay kahinangan sigām ahāp-alaˈat. 14 - 15 Puwas eˈ, sasuku halam bay tasulat ōnna ma deyom kitab pagsusulatan ōn saga aˈa taga-kallum kakkal, nilarukan ni deyom kasaplagan api ya magdanaw-danaw suleyabna. Manjari in kamatay maka nalkaˈ bay tinimanan ni deyom api mailang ya magdanaw-danaw, ya pinagōnan kamatay karuwana.
