1 Manjari itu aniyaˈ na isab taˈndaˈku paltandaˈan dakayuˈ ma diyataˈ langit, landuˈ makainu-inu maka makahailan. Ya taˈndaˈku inān pituˈ malaˈikat amowa pituˈ ginis balaˈ. Ya na heˈ-i kahinapusan balaˈ pamatobtob mulkaˈ Tuhan. 2 Sakali aniyaˈ taˈndaˈku mainaˈan saliˈ kahantang sˈllang, landuˈ asawa saliˈ sawa samin, maka kalamuran api angillaw-ngillaw. Taˈndaˈku isab saga aˈa bay makapangandaˈug min sattuwa talun maka min taˈu-taˈu ya hinangan pangluwahanna. Halam sigām bay angaku umbul ya panganggindan ōn sattuwa heˈ. Jari inaˈan saga aˈa bay angandaˈug magpanˈngge ma bihing sˈllang, ya saliˈ sawa samin. Amowa sigām biyula bay pamuwan sigām eˈ Tuhan pakaniya-pakaniya. 3 Magkalangan sigām kalangan bay min si Musa ya sosohoˈan Tuhan, maka kalangan min Bili-bili. Buwattitu ya lapal kalangan sigām: "O Panghūˈ, Tuhan Sangat Kawasa, kawasahan kahinangannu kamemon, makainu-inu sidda. Kaˈa ya sultan ma palbangsa-bangsahan. Abontol maka bˈnnal kaniyatannu kamemon. 4 O Panghūˈ, sai bahāˈ mbal magmatāwan kaˈa? Aniyaˈ bahāˈ mbal magmahaldikaˈan kaˈa? Kaˈa sadja ya tunggal mahasussi, magsakaum kamemon palbangsahan amudji kaˈa, sabab taˈndaˈ eˈ aˈa kamemon in kahinangannu asal adil." 5 Puwas eˈ taˈndaˈku aukab langgal ma deyom sulgaˈ, maka taˈndaˈku isab Bilik Mahasussi mainaˈan. 6 Taˈndaˈku isab pituˈ malaˈikat paluwas min deyom langgal inān, ya malaˈikat amowa pituˈ ginis balaˈ. Alˈssin pakayan sigām, makasilaw poteˈna. Pinakambotan bulawan isab daggaha sigām. 7 Makaluwas paˈin, na, tinoporan sigām pinggan bulawan eˈ dakayuˈ binatang min mpat inān. Ya pituˈ pinggan inān apˈnnoˈ eˈ mulkaˈ Tuhan ya kakkal ni kasaumulan. 8 Manjari langgal inān apˈnnoˈ eˈ humbu min haddarat Tuhan, paltandaˈan sahayana maka kawasana, ati halam aniyaˈ makasōd ni deyom langgal inān satˈggol halam giˈ aubus saga balaˈ pituˈ hekana ya binowa eˈ pituˈ malaˈikat eˈ.
