1 Manjari itu kabuwanan aku batang kayu pagsukuran, ati sinohoˈ aku anukud. Yuk panohoˈan eˈ, "Pehēˈ ka, sukurun langgal Tuhan sampay pagkukulbanan. Itungun bang pila jamaˈa ya angarap ni Tuhan mainaˈan. 2 Sagōˈ daˈa lapayun halaman ma katilibut langgal inān. Daˈa sukurun heˈ-i sabab pamasukuˈ ma saga aˈa nggaˈi ka sukuˈ Tuhan. Nilumuˈ daˈira sussi eˈ sigām ma deyom mpatpūˈ maka duwambulan. 3 Sōˈku duwangan saksiˈku pinaˈan," yukna. "Magpamakay sigā sˈmmek karut, ati pinasaplag eˈ sigā lapal Tuhan ma deyom dangibu maka duwa hatus maka nnompūˈ llaw." 4 Na, in duwa saksiˈ itu, ya na duwa kayu jaitun maka duwa palitaˈan anˈngge ma dahuan Panghūˈ ya tag-sukuˈan dunya. 5 Bang aniyaˈ gantaˈ pasulay angalaˈugan saga saksiˈ itu, aniyaˈ api pasulapput min bowaˈ sigā amakaˈat saga banta sigā. Angkan tantu amatay sai-sai anawakkal anganjahulakaˈan duwangan itu. 6 Aniyaˈ isab kapatut sigā anambolan langit boˈ supaya mbal angulan satˈggol sigā masi magpasaplag lapal Tuhan. Taga-kapatut isab sigā magbayaˈ ma tuburan boheˈ, pinapinda ni lahaˈ. Maka aniyaˈ isab kapatut sigā amatˈkka balaˈ kaginisan ni dunya, sumiyan-sumiyan ya kabayaˈan sigā. 7 Na, bang aubus na eˈ duwangan saksiˈ itu magpasaplag lapal Tuhan, nirugpakan du sigā eˈ dakayuˈ sattuwa makatāw-tāw, ya paluwas min deyom lowang tegob-tegoban. Taraˈug eˈna duwangan itu, pinapatay. 8 Jari patay sigā pinasagaran pahantal ma paglabayan ma deyom daˈira binabantug inān, daˈira bay pangalansangan Panghūˈ sigā ni hāg. Ya pangōn daˈira inān Sodom maka Misil, boˈ nggaˈi ka heˈ dī ōnna. Tuˈud ōn pamaralil sadja. 9 Ma deyom tˈllungˈllaw maka tongaˈ in patay duwangan saksiˈ itu niaroˈ-aroˈan na paˈin eˈ baˈanan aˈa min panubuˈ kamemon, min bangsa kamemon, min bahasa kamemon, maka min lahat kamemon. Saguwāˈ mbal toˈongan amakubul saga aˈa angaroˈ-ngaroˈ inān. 10 Na, kinōgan du sidda saga aˈa ma sakalingkal dunya ma sabab kamatay duwangan itu. Magkalamihan sigām sampay maghulmat-hiyulmati dangan maka dangan, sabab in duwa nabi itu bay amaniyaˈ kabinasahan ni saga aˈa patˈnnaˈ ma dunya. 11 Saguwāˈ, palabay paˈin tˈllungˈllaw maka tongaˈ min bay kamatay duwangan itu, magtūy pinabatuk nyawa sigā pabīng eˈ Tuhan, binuwanan kallum pabalik. Magtūy sigā pabungkal, ati sasuku makaˈndaˈ ma sigā landuˈ toˈongan tināw. 12 Puwas eˈ aniyaˈ takale eˈ duwangan nabi itu suwala atanog amissala ni sigā min deyom sulgaˈ, yuk-i, "Pariyataˈ kam piˈitu." Magtūy sigā pariyataˈ ni sulgaˈ min deyom gabun ma sabu banta sigā angˈndaˈ-ngˈndaˈ. 13 Saltaˈ kapariyataˈ sigā, saruˈun-duˈun aniyaˈ linug akosog makalanduˈ. Alubu dabahagiˈ min bahagiˈ sangpūˈ ma daˈira inān. Aniyaˈ pituˈ ngibu aˈa amatay eˈ linug. Sakali saga aˈa ya takapin allum inān sinōd tāw sidda, angkan sigām bay amuwan sanglit ma Tuhan ya ma deyom sulgaˈ. 14 Na, palabay na balaˈ karuwana sagōˈ araiˈ na balaˈ katˈlluna. 15 Na, ya malaˈikat katapusan amahˈlling na tiyup-tiyupna. Magtūy aniyaˈ saga suwala atanog takale min deyom sulgaˈ, yuk-i, "In dunya itu kapagparintahan na eˈ Panghūˈtam Tuhan maka Al-Masi ya tapeneˈna. Taptap kapagparintana sampay ni kasaumulan!" 16 Manjari in duwampūˈ maka mpat pagmattoˈahan, ya magtingkōˈan asal ma alopan Tuhan, pasujud magpamudji iya, 17 yuk-i, "O Tuhan Panghūˈ kami Sangat Kawasa, kakkal ka asal min awal sampay ni kabuwattituhan. Aheya pagsukulan kami sabab ginuna eˈnu kawasanu boˈ ka anagnaˈ magparinta ma dunya. 18 Bay akagit atay saga palbangsahan patigaggahun, ati taˈabut na waktu kapangamulkaˈnu sigām, waktu pangahukumnu ma saga aˈa magpatayan, waktu kapanungbasnu ma saga kanabi-nabihan ya sosohoˈannu, sampay aˈa sukuˈnu kamemon maka sasuku magaddat ma ōnnu, ai-na ka alanga, ai-na ka areyoˈ, waktu isab kapamakaˈatnu saga aˈa bay amakaˈat dunya itu." 19 Sakali niukab na langgal Tuhan ma sulgaˈ ati taˈndaˈku mainaˈan baˈul pangisihan kapagsulutan Tuhan maka saga aˈa sukuˈna. Aniyaˈ inān singlab lāt, maka lˈggon maglagublub, maka linug, maka aniyaˈ tigtigan aes parugpak min diyataˈ.
