1 Sulat itu min aku, si Paul, maka min si Timuti danakantam ma deyoman si Isa. Itiyaˈ aku ma deyom kalabusu ma sabab si Isa Al-Masi ya pameyaˈanku. Pinasampay sulat itu ni kaˈa, Pilimun. Bagay kami ka, maka seheˈ kami maghinang ma Tuhan. 2 Pinasampay isab ni si Appiya danakantam dˈnda, maka ni si Arkippus ya seheˈ kami maghinang ma si Isa ibarat sundalu, maka ni kajamaˈahan si Isa ya magtipun ma lumaˈnu. 3 Mura-murahan bang paˈin kam pinaniyaˈan tatabangan maka kasannangan deyom atay eˈ Mmaˈtam Tuhan maka Panghūˈtam si Isa Al-Masi. 4 Magsukul aku ni Tuhan sakahabaˈ waktu kapangamuˈ-ngamuˈku ma pasalnu, 5 sabab takaleku pasal pangandolnu ma Panghūˈ Isa maka kaheya lasanu ma saga aˈa sukuˈ Tuhan kamemon. 6 Angamuˈ-ngamuˈ aku ni Tuhan bang paˈin ka atuyuˈ angahakaˈan saga aˈa pasal pangandolnu ma Panghūˈ Isa, boˈ supaya palalom panghatinu pasal kamemon kahāpan ya pinaniyaˈan kitam ma sabab Al-Masi ya parakayuˈantam. 7 Bagay, akōd toˈongan aku sabab min lasanu, maka alasig isab deyom atayku ma sabab kapamalasignu pangatayan saga aˈa sukuˈ Tuhan. 8 Manjari itu, minsan aniyaˈ kapatutku deyoˈ min Al-Masi anohoˈ kaˈa pasal ai-ai subay hinangnu, mbal du aku magpanohoˈan. 9 Sagōˈ amuˈanta sadja ka junjung, luwas min paglasata. Jari aku, si Paul, aˈa toˈa na, ya ma deyom kalabusu itu ma sabab kapameyaˈku ma Al-Masi, hal anganjunjung laˈa. 10 Angamuˈ aku junjung ni kaˈa pasal si Onesimus, ya saliˈ anakku lahasiyaˈ itu. Tahinang aku pagˈmmaˈanna sabab tabowa iya magkahagad ma si Isa hinabuku ma deyom kalabusu itu. 11 Tagnaˈ heˈ, halam bay aniyaˈ gunana ma kaˈa, sagōˈ ma buwattinaˈan aheya na gunana ma kaˈam sampay isab ma aku. 12 Jari itiyaˈ papoleˈku ni kaˈa si Onesimus, aˈa kalasahanku toˈongan. 13 Bilahi aku bang iya bay paddas maitu ma aku boˈ aniyaˈ pagantiˈ min kaˈa anabangan aku satˈggolku ma deyom kalabusu itu ma sabab lapal ahāp ya pagnasihatku. 14 Sagōˈ mbal ka pogosku subay anabangan aku. Ya kabayaˈanku bang aku tabangannu, subay min bayaˈnu toˈongan. Jari mbal aku angahinang ai-ai bang ka mbal pasulut. 15 Ya angkan araiˈ si Onesimus bay pinaokat min kaˈa daiˈ-daiˈ, supaya iya pakakkal ma kaˈa tˈggolna allum. 16 Tagnaˈ heˈ banyagaˈnu sadja iya, sagōˈ ma buwattinaˈan ahāp lagiˈ iya min banyagaˈ, sabab danakantam na iya kinalasahan. Ahalgaˈ toˈongan iya ma aku, sagōˈ labi iya ahalgaˈ ma kaˈa sabab banyagaˈnu iya maka danakannu isab ma sabab Panghūˈ Isa ya parakayuˈanbi. 17 Manjari, Pilimun, bang aku tabistanu saliˈ seheˈnu magusaha, taimaˈun si Onesimus itu buwat panaimaˈnu ma aku. 18 Bang aniyaˈ dusana ma kaˈa, atawa bang aniyaˈ utangna, aku ya paˈatasun. 19 Ndaˈun paljanjiˈanku itu, ma sulatan tanganku: "Aku si Paul amayad." Nggaˈi ka isab pagtungbuy, sagōˈ aheya utangnu ma aku, sabab aku ya poˈonna angkan ka taga-kallum kakkal na ni kasaumulan. 20 Ahoˈ, bagay, dūlin lagiˈ aku maka palasigun atayku ma sabab pangandolta ma Al-Masi ya Panghūˈtam. 21 Sulatku sulat itu sabab tatantuku in kaˈa akale du. Kataˈuwanku in tabangnu ma aku palabi lagiˈ min pangamuˈku itu. 22 Aniyaˈ giˈ isab amuˈku: sakapin aku bilik mailu, sabab aholat aku in pangamuˈbi ni Tuhan nirūlan du eˈna, ati niˈndeˈan du aku ni kaˈam. 23 Itiyaˈ si Epapras, seheˈku maitu ma deyom kalabusu ma sabab si Isa Al-Masi ya pameyaˈanna, amabeyaˈ minsan laˈa hal lapalna ma kaˈa. 24 Damikiyanna disi Markus, si Aristarkus, si Demas maka si Lukas, saga seheˈku maitu maghinang ma Tuhan, amabeyaˈ isab lapal sigām ma kaˈa. 25 Mura-murahan, bang paˈin kam kamemon pinaniyaˈan tatabangan eˈ si Isa Al-Masi Panghūˈtam. Wassalam
