1 Na, saga dauranakanku, ya itu katapusanna: magkōg-koyag kam ma sabab Panghūˈbi si Isa. Mbal makainay ma aku bang aku anulatan kaˈam pabalik pasal itu, bang paˈin kam asalamat. 2 Halliˈinbi saga aˈa maghinang kalaˈatan ilu, ya sapantun eroˈ landuˈ abˈngngis. Tagihan sigām anganggaliˈan kuwit aˈa, bainat in sigām sukuˈ Tuhan. 3 Sagōˈ hakaˈanta kam, kitam ya taga-bainat bˈnnal. Amudji kitam ni Tuhan sabab min Rū-na Sussi, maka magkōg-koyag isab kitam ma sabab si Isa Al-Masi. Halam aniyaˈ pasangdolantam ma hinangan baran. 4 Sagōˈ bang aku subay taga-pasangdolan ma hinangan baran, aniyaˈ du kahinangan ma aku. Bang pangannal saga aˈa kaseheˈ aniyaˈ kapatutan sigām pasangdol ma pamogbog sigām ma agama, lubaˈ-lagiˈna na aku. 5 Sabab taˈabut paˈin walungˈllaw min bay kapaganak ma aku, niˈislam aku ma buwat addat kami Yahudi. Bangsa Israˈil aku, panubuˈ si Benjamin asal kamattoˈahanku. Porol aku bangsa Hibrani. Bang takdil ni pamogbog ma saraˈ agama Yahudi, umpigan Parisi aku ya atukid amogbog ma saraˈ agama. 6 Landuˈ aku atukid ma agama Yahudi, ya poˈon bay pinjalaˈku saga jamaˈa Al-Masi. Bang aniyaˈ aˈa tabista aˈadil ma sabab kapamogbogna ma panohoˈan-saraˈ si Musa, lubaˈ-lagiˈna na aku itu, sabab halam aniyaˈ sallaˈku. 7 Malaingkan ai-ai bay pangannalku amowa aku ni kahāpan mbal na pamagayku bang paˈin aku taga-lamud ma Al-Masi. 8 Maka nggaˈi ka hal eˈ-i. Ai-ai bay ahalgaˈ ma aku dahū itungku na saliˈ halam aniyaˈ pūsna, bang paˈin kataˈuwanku Panghūˈku si Isa Al-Masi. Sabab ahalgaˈ giˈ iya min kamemon. Taikutanku na kamemon bay bistaku pangaltaˈ ma waktu tagnaˈ, ati itungku na saliˈ sˈggit, bang paˈin taˈangutku Al-Masi, 9 sampay makaparakayuˈ na ni iya. Mbal paheyaku ma atay in kabontolan luwas min pamogbogku ma saraˈ bay tasulat si Musa. Binista aku abontol eˈ Tuhan sabab min pangandolku ma Al-Masi. Ya na koˈ ilu kabontolan pamuwanna ma sasuku angandol. 10 Ya sadja pagmatayanku bang paˈin kasakupanku Al-Masi, boˈ tananamku isab barakat Tuhan ya bay pamakallum Al-Masi min kamatayna. Bilahi aku pasaliˈ ni iya anandalan kabinasahan buwat bay panandalna, sampay ni kamatay. 11 Sabab bang buwattēˈ kapameyaˈku ma Al-Masi makaholat aku pinakallum pabīng min kamatay. 12 Halam giˈ taˈabut kamemon ya pagmatayanku, maka mbal giˈ aku sampulnaˈ ma kaul maka piˈil. Sagōˈ amanuyuˈ na paˈin aku boˈ taˈangutku kamemon ya minaksud eˈ si Isa Al-Masi angkan iya bay ameneˈ aku. 13 Hakaˈanta kam saga dauranakan, mbal aku amikil di-ku in aku makaˈangut na. Sagōˈ buwattitu na paˈin hinangku: bbahanku na ai-ai bay talabayku inān, ati angutku na ai-ai ya pinama-aku ma sinosōng. 14 Amanuyuˈ aku sampay taˈabutku kahāpan ya pangabbitan aku eˈ Tuhan labay min si Isa Al-Masi, hatina kallum kakkal ma deyom sulgaˈ. 15 Kitam kamemon, sasuku kitam asangpot na ma pangandol maka ma akkal, subay saliˈ-saliˈ panganguttam. Bang hati aniyaˈ amikilan saddī pasal ai maka ai, pinasawa du eˈ Tuhan pamikilna. 16 Sagōˈ minsan painay, subay tukiranta ai-ai bay taˈabutta min katagnaˈ pangandolta sampay ni kabuwattituhan. 17 Saga danakanku, subay kam dauyunan anunuran aku. Pandogahinbi isab saga aˈa kaseheˈan, ya ameyaˈ ma suntuˈan bay pangˈbba kami ma kaˈam. 18 Araran itu bay pahˈllingku ni kaˈam ma waktu palabay, maka balikanku hinabu aku anangis: aheka aˈa anulakan panduˈ pasal kamatay Al-Masi ma hāg. 19 Nalkaˈ ya kamattihan sigām, sabab tabanyagaˈ sigām eˈ napsu, maka pagbantugan sigām saga hinang makaiyaˈ-iyaˈ. Luwal legot dunya ya kinannal eˈ sigām. 20 Saguwāˈ mbal buwattēˈ ma kitam. Sulgaˈ ya lahattam luggiyaˈ, maka aniyaˈ Manglalappas lagarantam pabalik piˈitu minnēˈ, hatina Panghūˈtam si Isa Al-Masi. 21 Makapiˈitu paˈin iya, pinindahan eˈna ginhawa barantam ya magkalamma maka magkamatay itu. Pinindahan ni buwat baranna asahaya, min kawasana ya panganggaˈosna ma ai-ai kamemon.
