1 Na, kataˈuwanku ahogot imanbi ma sabab pagbeyaˈbi maka Al-Masi. Kauliˈan kasusahanbi ma sabab lasana maka aniyaˈ kapagdakayuˈbi atay sabab min Rū Sussi. Aheya isab kasi-lasabi dangan maka dangan. 2 Manjari, pagga buwattēˈ kahālanbi, pajatuhun lagiˈ kakōganku. Magdakayuˈ kam ma pamikilbi, papagsaliˈ-saliˈunbi lasabi, magdaˈatay kam toˈongan. Bang aku beyaˈbi buwattēˈ, jukup du paˈin kakōganku. 3 Ai-ai hinangbi subay daˈa min pangihidbi atawa min kabayaˈanbi magmalangkahi. Subay areyoˈ sadja pangatayanbi. Bistahunbi pagkahibi ilu alanga giˈ min kaˈam. 4 Daˈa pikilunbi kahāpan ni baranbi sadja, saguwāˈ magkaˈinagon kam dangan maka dangan. 5 Ya pangatayanbi subay pasaliˈ ni buwat pangatayan si Isa Al-Masi. 6 Tuhan asal iya min kaˈasalna, sagōˈ halam tapikilna in kapagdakayuˈna maka Tuhan subay gomgomanna. 7 Gom paˈin bbahanna kaniyaˈna kamemon, ati maglillaˈ iya magpaˈata. Bay iya magpabaran manusiyaˈ piˈitu ni dunya, 8 pasengod iya ni kajarihan manusiyaˈ. Bay iya magpareyoˈ di-na, ati beyaˈna kabayaˈan Tuhan sampay ni kamatay, minsan pinapatay ma hāg. 9 Angkan iya pinalanga eˈ Tuhan ni langa katapusan. Kabuwanan iya ōn alanga min ōn kamemon, 10 boˈ magsujuran ni iya binangsa ai-ai kamemon, ai-na ka ma sulgaˈ, ai-na ka ma dunya, ai-na ka isab ma deyom ahirat. 11 Magpasabˈnnal sigām kamemon in si Isa Al-Masi Panghūˈ toˈongan, maka Mmaˈtam Tuhan ya pinagmahaldikaˈan. 12 Manjari itu, saga bagay kalasahanku, beyaˈunbi na paˈin pamituwaku buwat bay sakahabaˈ. Bay asal beyaˈbi ma kamailuku lagiˈ, sagōˈ lubaˈ-lagiˈna na bang aku alikut. Isbatunbi Tuhan, pagmatāwinbi, hinabubi amanuyuˈ boˈ tatuman kalappasbi. 13 Sabab Tuhan ya angahinang na paˈin ma deyom pangatayanbi boˈ aniyaˈ bayaˈbi maka kosogbi angahinang ai-ai pangahandakna. 14 Hinangunbi ai-ai panohoˈan kaˈam ma halam aniyaˈ karugalan atawa panganjawabbi, 15 supaya halam aniyaˈ laˈat atawa sallaˈ panāˈan kaˈam. Jari anak Tuhan na kam halam taga-tamak minsan kam palamud ma saga aˈa ya abengkok pikilan sigām maka alaˈat kasuddahan sigām. Sapantun kam bituˈun asahaya amuwan sawa ma bˈttong langit, 16 saltaˈ kaˈam amasampay lapal min Tuhan ni saga aˈa ma dunya itu, lapal makabuwanan sigām kallum taptap. Bang hinangbi inaˈan, pamantuganku kaˈam bang taˈabut llaw kabalik Al-Masi, sabab kaˈam ya saliˈ bainat in hinangku maka sangsāˈku taga-kamattihan du. 17 Na, ya pangandolbi ma Al-Masi saliˈ dalil pagkulban tinukbalan ni Tuhan. Maka bang aku saupama pinapatay, lahaˈku saliˈ dalil lalabotan pamajukup ni pagkulbanbi. Jari mbal aku magang-ang amutawanan nyawaku, gom paˈin aku magbeyaˈ maka kaˈam magkōg-koyagan. 18 Damikiyanna isab kaˈam ilu, subay kam kinōgan na paˈin sampay ameyaˈ ma kakōganku. 19 Agaraˈ aku amabeyaˈ si Timuti pasaˈut piˈilu, bang kabayaˈan Panghūˈ Isa isab. Jari bang iya pabīng piˈitu amowahan aku habal pasal kahālanbi, aheya kalasiganku. 20 Sabab halam aniyaˈ angatu ma si Timuti itu bang takdil ni pagkaˈinagon ma kaˈam. 21 Kahekaˈan saga aˈa itu hal angannal ma baran sigām sadja, mbal angannal pasal pakaradjaˈan si Isa Al-Masi. 22 Sagōˈ kataˈuwanbi si Timuti maka kahatulna. Bay iya anabangan aku magnasihat lapal ahāp, buwat panabang aˈa ma mmaˈna. 23 Angkan aku magniyat amapiˈilu si Timuti, sagoˈ subay kataˈuwanku dahū bang ai tumˈkka ni aku. 24 Pasangdol isab aku ma Panghūˈ Isa, bang paˈin aku makasaunuˈ ni kaˈam. 25 Bang ma kumpasanku ahāp subay pabalikku ni kaˈam danakanku si Epaprode, ya bay sohoˈbi piˈitu anabangan aku. Seheˈku iya maghinang ni Tuhan, gapiˈku angosogan lapal ahāp. 26 Angentom iya ma kaˈam kamemon, maka asusa isab iya pagka takalebi habal pasal sakina. 27 Bˈnnal bay abangat sakina, arak iya amatay, mandaˈ iya kinaˈaseˈan eˈ Tuhan. Ya du aku kinaˈaseˈan, sabab bang iya gantaˈ bay amatay, magduruhun karukkaˈanku. 28 Angkanna aheya bayaˈku amabalik iya ni kaˈam, boˈ kam kinōgan pagˈndaˈbi ma iya, ati pahantap bay kasusahanku. 29 Sampangunbi iya pahāp luwas min pagkōg-koyagbi, sabab Panghūˈ Isa ya pameyaˈanbi saliˈ-saliˈ. Pagaddatinbi saga aˈa ya pasaliˈ ni si Epaprode itu, 30 sabab arak toˈongan iya amatay ma sabab hinangna tudju ni Al-Masi. Bay panūkna kallumna, bang paˈin iya pagantiˈ min kaˈam amatuntul aku.
