1 "Daˈa sāˈunbi pagkahibi boˈ kam mbal sināˈ eˈ Tuhan. 2 Sabab bang kam gantaˈ amatˈnnaˈ hukuman ma seheˈbi, ya du kaˈam pinatˈnnaˈan hukuman eˈ Tuhan, pinapagtongod maka bay pangahukumbi seheˈbi heˈ. Ai-ai panˈppongbi ma seheˈbi, ya du isab panˈppong Tuhan ma kaˈam. 3 Kaˈam magsoway seheˈbi ilu, angay taˈndaˈbi bukbuk ma mata seheˈbi, ati mbal taˈndaˈbi batang kayu ya ma deyom matabi? 4 Mamarahi pahāp kaˈam ilu! Yukbi, 'Tabiyaˈ, laˈananta bukbuk min matanu ilu.' Boˈ paˈin aniyaˈ batang kayu ma deyom matabi! 5 In kaˈam ilu maglaku-laku halam taga-sāˈ! Laˈaninbi giˈ dahū ya bukbuk ma matabi ilu supaya asawa pangˈndaˈbi, boˈ yampa kam angalaˈanan bukbuk min mata seheˈbi. 6 "Daˈa kam amuwan ai-ai asussi ma saga aˈa alaˈat, ya saliˈ sapantun eroˈ. Ya aniyaˈ pabibud angalˈkkob kaˈam. Lapalbi ahalgaˈ, ya pinagbahasa mussaˈbi, daˈa larukinbi ni saga bawi. Ya aniyaˈ pinaggiˈik-giˈikan eˈ sigām." 7 "Angamuˈ-ngamuˈ kam, ati binuwanan du. Amiha kam, ati makabāk du kam. Mikiukab kam, ati niukaban du kam. 8 Sabab sai-sai angamuˈ kabuwanan du. Sai-sai amiha makabāk du. Sai-sai isab mikiukab niukaban du. 9 Kaˈam taga-anak ilu, abila kam pangamuˈan tinapay eˈ anakbi, buwananbi bahāˈ batu? 10 Atawa bang angamuˈ daing, buwananbi bahāˈ sowa? 11 Minsan kaˈam dusahan ilu ataˈu amuwanan anakbi ai-ai makahāp, lubaˈ-lagiˈna na Mmaˈbi ma sulgaˈ ataˈu du amuwanan ai-ai makahāp ni sasuku angamuˈ ni iya. 12 "Manjari bang kabayaˈanbi kinahāpan eˈ aˈa, subay isab sigām kahāpanbi. Ya na heˈ kamaksuran saraˈ ya bay tasulat eˈ si Musa maka saga kanabi-nabihan." 13 "Pasōd kam min lawang akiput, sabab ya lān tudju ni nalkaˈ aluha pasōranna maka aluhay nilˈngngan. Aheka isab manusiyaˈ ameyaˈ min lān inān. 14 Saguwāˈ ya pasōran tudju ni sulgaˈ akiput maka ahunit nilˈngngan. Akulang isab aˈa makatuliˈ iya." 15 "Kamayaˈ-mayaˈ kam boˈ kam mbal kaˈakkalan eˈ saga aˈa magbauˈ-bauˈ in sigām nabi. Ahāp pangluwahan sigām bang ma pangˈndaˈta, saliˈ sapantun bili-bili mbal makamula. Sagōˈ ma deyom atay sigām saliˈ sigām eroˈ talun, sidda abˈngngis. 16 Takilābi du sigām min kahinangan sigām, buwat kayu takilā min buwaˈna. Mbal kita angāˈ buwaˈ anggul min kayu puhung, atawa buwaˈ kayu igira min sampinit. 17 Bang kayu ahāp, ahāp isab buwaˈna. Sagōˈ bang kayu mbal ahāp, mbal isab ahāp buwaˈna. 18 Bang kayu ahāp mbal makabuwan buwaˈ alaˈat. Damikiyanna bang kayu alaˈat suligna, mbal makabuwan buwaˈ ahāp. 19 Bang aniyaˈ kayu mbal ahāp pagbuwaˈna, pinuwad du boˈ tinimanan ni deyom api. 20 Angkan yukku ma kaˈam, takilābi du saga nabi ya nggaˈi ka bˈnnal sabab min kahinangan sigām." 21 "Nggaˈi ka aˈa kamemon ya anabbut aku 'Panghūˈ, O Panghūˈ,' makasōd ni deyom pagparintahan Tuhan. Luwal saga aˈa ya ameyaˈ ma kabayaˈan Mmaˈku ma sulgaˈ. 22 Bang taˈabut na llaw pangahukum ma manusiyaˈ, aheka du amissala ni aku, yuk-i: 'O Panghūˈ, bay kami amatanyag lapal Tuhan min kawasa ōnnu. Bay kami amalaˈan baˈanan saitan min deyom baran aˈa, maka aheka isab saga hinang makainu-inu bay tahinang kami, min kawasa ōnnu.' 23 Sakali bontolanku sigām, yukku, 'Mbal kam takilāku. Alaˈan kam min aku, kaˈam kamemon maghinang kalaˈatan ilu.' " 24 "Na, sasuku aˈa akale ma bissalaku itu sampay ameyaˈ, in iya saliˈ aˈa ahāp akkalna, ya bay makahinang lumaˈna ma papagan abatu. 25 Manjari aniyaˈ ulan alandos bay patumbuk, maka angandunuk kasapaˈan, maka taluwaˈ hunus lumaˈ inān. Sagōˈ halam ahˈbbaˈ sabab ahogot papaganna. 26 Sasuku isab akale ma bissalaku boˈ mbal ameyaˈ, saliˈ kahantang aˈa kulang akkalna, ya makahinang lumaˈna ma kalˈbbohan. 27 Jari aniyaˈ ulan alandos patumbuk, boˈ angandunuk kasapaˈan, boˈ taluwaˈ hunus lumaˈ inān. Magtūy ahˈbbaˈ, alubu toˈongan." 28 Aubus paˈin eˈ si Isa amissala, kinainu-inuhan panduˈna eˈ baˈanan aˈa bay makakale inān. 29 Ya angkan buwattēˈ sabab magbiddaˈ toˈongan panduˈ si Isa maka panduˈ saga guru sigām. Taga-kawasa asal si Isa bang amanduˈ.
