1 Manjari pagˈndaˈ paˈin si Isa ma manusiyaˈ sikatimukan inān, patukad iya ni bīd boˈ aningkōˈ mahēˈ. Pinaˈan ni iya saga mulidna, 2 ati anagnaˈ iya amanduˈ ma sigām, yuk-i, 3 "Aheya kahāpan ma sasuku kataˈuwanna halam aniyaˈ pasangdolanna saddī min Tuhan, sabab tantu aniyaˈ okomanna ma pagparintahan Tuhan. 4 Aheya kahāpan sasuku magkarukkaˈan, sabab pinahantap pangatayanna eˈ Tuhan. 5 Aheya kahāpan sasuku areyoˈ pangatayanna, sabab makataimaˈ iya pusakaˈ min Tuhan. 6 Aheya kahāpan sasuku magmatayan itikad abontol, sabab karūlan iya eˈ Tuhan. 7 Aheya kahāpan sasuku maˈaseˈ ma kaseheˈanna, sabab ya du iya kinaˈaseˈan eˈ Tuhan. 8 Aheya kahāpan sasuku apoteˈ atayna tudju ni Tuhan, sabab makapagˈndaˈ du iya maka Tuhan. 9 Aheya isab kahāpan sasuku amapagsulut ma saga pagkahina, sabab kaōnan iya anak Tuhan. 10 Aheya isab kahāpan sasuku nilaˈat ma sabab pameyaˈna ma kabayaˈan Tuhan, sabab aniyaˈ okomanna ma pagparintahan Tuhan. 11 "Aheya isab kahāpanbi bang kam gantaˈ niudjuˈ maka pininjalaˈ, maka bang kam nilimut nggaˈi ka bˈnnal ma sabab pameyaˈbi ma aku. 12 Subay kam akōd toˈongan bang buwattēˈ, sabab tantu du aheya tungbasbi ma deyom sulgaˈ. Buwattēˈ isab bay paminjalaˈ ma saga nabi ya bay ma dunya itu ma masa awal eˈ." 13 Amanduˈ lagiˈ si Isa, yuk-i, "Kaˈam bebeyaˈanku dalil asin ma bangsa manusiyaˈ. Sagōˈ bang asin itu magtinuˈ na, halam aniyaˈ pamabalik nanamna. Halam aniyaˈ kagunahanna, hal tinimanan boˈ pinaggiˈikan eˈ aˈa. 14 "Kaˈam ilu dalil sawa pamasawa bangsa manusiyaˈ. Bang aniyaˈ kalumaˈan patˈnnaˈ ma diyataˈ būd, taˈndaˈan di-na du. 15 Halam aniyaˈ anūˈan palitaˈan boˈ turunganna maka undam, sagōˈ pinatˈnnaˈ ma diyataˈ patˈnnaˈanna boˈ amuwan sawa ma sasuku ma deyom lumaˈ. 16 Buwattēˈ du isab kam, subay kam amuwan sawa ma pagkahibi manusiyaˈ. Hatina subay taˈndaˈ kahinanganbi ahāp eˈ aˈa kaseheˈ, boˈ sigām tabowa ananglitan Mmaˈbi ma sulgaˈ." 17 "Daˈa kam maghimangkan saga aku piˈitu amapasan saraˈ ya bay pangˈbba eˈ si Musa, maka panduˈ bay min kanabi-nabihan. Ya gawiku piˈitu subay pahatiku pasal saraˈ heˈ bang ai kamaksuranna toˈongan. 18 Hakaˈanta kam toˈongan: satˈggol masi langit maka dunya itu, halam du aniyaˈ kinulangan min saraˈ itu minsan laˈa hal dambatang sulatna maka balisna. Subay asampulnaˈ kamemon boˈ yampa pahalam kapūsanna. 19 Angkan sai-sai angalanggal saraˈ itu minsan laˈa hal ma karikiˈan, maka bang bidjakanna seheˈna ameyaˈ ma iya angalanggal, aˈa inān areyoˈ toˈongan ma deyom pagparintahan Tuhan. Sagōˈ sai-sai ya ameyaˈ ma saraˈ sampay amanduˈan seheˈna subay ameyaˈ, alanga du iya ma deyom pagparintahan Tuhan. 20 Sagōˈ hakaˈanta kam, mbal kam makasōd ni deyom pagparintahan Tuhan bang mbal palabi kaˈadilanbi min kaˈadilan saga Parisi maka saga guru saraˈ agama." 21 "Bay na takalebi panohoˈan ma saga aˈa ma masa awal eˈ, ya yuk-i, 'Wajib kam daˈa amapatay pagkahibi manusiyaˈ. Sai-sai amapatay pagkahina pinatˈnnaˈan hukuman.' 22 Sagōˈ buwattitu na pamanduˈku ma kaˈam: sai-sai angastol ma pagkahina subay nihukum. Maka sai-sai angōn 'dupang' ma seheˈna subay binowa ni Tumpukan Maghuhukum. Sai-sai isab amahˈllingan pagkahina, yukna, 'Ē! Babbal ka! Halam aniyaˈ pūsnu!' Piligdu aˈa inān pinalabay min api nalkaˈ. 23 Angkanna, bang ka gantaˈ ma deyom langgal song anukbal ai-ai ni Tuhan, boˈ taentomnu aniyaˈ pagkahinu apˈddiˈ atayna ma kaˈa, 24 mailuhun lagiˈ panukbalnu ati pasaˈut ka ni pagkahinu inān maghāp maka iya dahū boˈ yampa ka pabīng angungsuran panukbalnu ni Tuhan. 25 "Abila ka tinuntutan eˈ aˈa boˈ tinˈkkahan ni saraˈ, bowahun iya magsulut ma halam giˈ makatampal ni saraˈ. Sabab bang kam mbal magsulut dahū, tinˈkkahan ka ni huwis, ati niˈndeˈan ka eˈ huwis ni saga pulis boˈ niˈisi ni deyom kalabusu. 26 Jari kaˈddasan ka mainaˈan. Subay puwasannu bay kataksilannu kamemon boˈ yampa ka makaluwas minnēˈ." 27 "Bay na takalebi panohoˈan ītu, ya yuk-i, 'Wajib kam daˈa angaliyu-lakad ni nggaˈi ka pagholaˈbi.' 28 Sagōˈ buwattitu na pamanduˈku ma kaˈam: sai-sai angˈndaˈ ni dˈnda maka eˈna anganapsuhan iya, aˈa inān katōngan dusa sabab makalanduˈ na iya angandusa ni dˈnda heˈ ma deyom pikilanna. 29 Bang matanu kowan gantaˈ amowa kaˈa magdusa, subay paggatun. Gom lagiˈ lugitnu matanu ilu boˈ tinimanan. Ahāp lagiˈ abuta matanu dambilaˈ, bang paˈin daˈa nilarukan katibuˈukannu ni deyom nalkaˈ ma ajukup matanu karuwambilaˈ. 30 Damikiyanna isab bang tangannu kowan gantaˈ amowa kaˈa magdusa, paggatun. Gom lagiˈ pinukulan dambilaˈ tangannu boˈ tinimanan. Ahāp lagiˈ apukul dambilaˈ tangannu, bang paˈin daˈa nilarukan katibuˈukannu ni deyom nalkaˈ ma ajukup tangannu karuwambilaˈ." 31 "Aniyaˈ isab bay panohoˈan saraˈ, ya yuk-i, 'Sai-sai animanan hˈndana subay iya amuwan pagpasahan.' 32 Sagōˈ buwattitu na pamanduˈku ma kaˈam: sai-sai animanan hˈndana ma halam aniyaˈ sababanna, ma halam du bay angaliyu-lakad min iya, taga-dusa lˈlla inān ma hˈndana heˈ. Sabab bang dˈnda heˈ aminda hˈlla, taga-dusa iya angaliyu-lakad min hˈllana tagnaˈ. Maka dusahan isab lˈlla angahˈnda dˈnda inān." 33 "Bay na takalebi isab panohoˈan ma saga aˈa masa awal eˈ, ya yuk-i, 'Wajib kam daˈa magputing bang bay makasapa. Wajib isab sinuhul bang aniyaˈ najalbi ni Tuhan.' 34 Sagōˈ buwattitu na pamanduˈku ma kaˈam: daˈa kam magsapa. Daˈa sibahatunbi sulgaˈ pagsapahanbi sabab paningkōˈan Tuhan koˈ inān. 35 Daˈa sibahatunbi dunya sabab patˈkkaran tapeˈna. Sampay daˈira Awrusalam, daˈa sibahatunbi isab sabab sukuˈ Tuhan, ya Sultan Mahatinggi. 36 Minsan kōkbi, subay mbal sibahatbi pagsapahanbi sabab nggaˈi ka kaˈam ya bay amapanjari. Minsan dalamba buˈunbi mbal kapindahanbi walnaˈna ni ettom atawa ni poteˈ. 37 Bang kam angahoˈ, subay ahoˈ sadja, bang kam maginˈmbal, subay mbal sadja. Ai-ai pamasugpatbi saddī minnēˈ, min saitan patilaˈatun koˈ itu." 38 "Bay na takalebi panaraˈ, ya yuk-i, 'Bang aniyaˈ amakaˈat dambilaˈ mata seheˈna subay binalosan pinakaˈat dambilaˈ matana. Damikiyanna bang aniyaˈ angalutu empon seheˈna subay binalosan nilutu emponna.' 39 Sagōˈ ya na itu pamanduˈku ma kaˈam: daˈa kam amalos bang aniyaˈ makarusa ma kaˈam. Abila aniyaˈ aˈa anampak baihuˈnu dambilaˈ, patampalun isab dambilaˈ panampakanna. 40 Abila aniyaˈ gantaˈ anuntutan kaˈa boˈ niamuˈ multa kamisitanu, pamuwanun ma iya sampay badjuˈnu. 41 Abila aniyaˈ aˈa magmandahan kaˈa paseheˈ ma iya dabatu lawakna, seheˈin giˈ iya duwa batu. 42 Sai-sai angamuˈ ni kaˈa, buwanin. Maka sai-sai bilahi angindam, paindamin." 43 "Bay na takalebi isab pamanduˈ dakayuˈ itu, ya yuk-i, 'Kalasahinbi bagaybi, sagōˈ kabˈnsihinbi bantabi.' 44 Sagōˈ ya na itu pamanduˈku ma kaˈam: kalasahinbi bantabi. Amuˈ-amuˈinbi kahāpan min Tuhan sasuku angalaˈat kaˈam 45 boˈ supaya kam anˈppu addat Tuhan, ya Mmaˈbi ma sulgaˈ. Sabab Tuhan ya amasilak llaw ma aˈa kamemon ahāp ka atawa alaˈat. Amapˈttak iya ulan ma saga aˈa maghinang kabontolan sampay isab ma aˈa maghinang kalaˈatan. 46 Bang hal aˈa alasahan kaˈam ya kalasahanbi, daˈa kam aholat tinungbasan pahalaˈ eˈ Tuhan. Minsan saga aˈa magāˈ sukay parinta, alasa du ma sasuku alasahan sigām. 47 Bang hal bagaybi ya saginabi pahāp, saliˈ du kam maka saga aˈa mbal magtaˈat ma Tuhan, sabab ya du sigām magsagina dakabagayan. Mbal pabiddaˈ kahāp addatbi min sigām. 48 Kaˈam ilu subay ajukup ma kaul maka piˈil tudju ni aˈa kamemon, buwat Mmaˈbi ma sulgaˈ."
