1 Taˈabut paˈin pagkˈllat llaw, maggaraˈ kaimaman alanga kamemon maka saga pagmattoˈahan bangsa Yahudi bang buwattingga pamapatay sigām ma si Isa. 2 Manjari kinarenahan si Isa boˈ yampa tinˈkkahan ni si Pilatu, gubnul bangsa Rōm. 3 Pagtaˈu si Judas, in si Isa pinatˈnnaˈan hukuman na ni kamatay, magtūy iya magsusun ma bay hinangna anukbalan iya ni bantana. Jari pehēˈ iya ni kaimaman alanga maka ni pagmattoˈahan, arak angˈndeˈ sīn bay panamba iya, tˈllumpūˈ solag sīn Yahudi, dī pilak. 4 Yukna ma sigām, "Aheya dusaku sabab katukbalanku aˈa halam taga-dusa, maka itiyaˈ iya araiˈ na pinapatay." "Min kaˈa koˈ ilu," yuk sigām. "Nggaˈi ka min kami." 5 Sakali nihantakan sīn inān eˈ si Judas ni lantay langgal boˈ yampa paluwas minnēˈ maggantung di-na boˈ amatay. 6 Manjari kaimaman inān amuwaˈ sīn bay nihantakan eˈ si Judas eˈ. Yuk sigām, "Sīn itu haram bang ma agamata sabab bay tambahan pamapatay aˈa. Mbal manjari pinatimbul ni sīn langgal." 7 Arakayuˈ paˈin paggaraˈ sigām pasal sīn inān, boˈ waˈi tapamˈlli tanaˈ min aˈa magtatampa, ati ginuna pangubulan saga aˈa liyu. 8 Angkan tanaˈ inān niōnan, 'Tanaˈ tambahan lahaˈ' sampay ni kabuwattituhan. 9 Na, ma sabab hinang inān, aniyaˈ kamaksuranna ma bay tasulat eˈ nabi Irimiya, ya yukna, "Niāˈ eˈ sigām tˈllumpūˈ solag sīn dī pilak ya halgaˈ baran aˈa bang ma bangsa Israˈil, 10 ati ginuna pamˈlli tanaˈ min aˈa magtatampa. Ya na heˈ bay panohoˈan aku eˈ Tuhan." 11 Manjari inaˈan si Isa anˈngge ma dahuan gubnul Pilatu, sinumariya eˈna. "Na," yuk gubnul, "sultan ka bahāˈ ma bangsa Yahudi?" Anambung si Isa, yukna, "Ya na yuknu ilu." 12 Sagōˈ halam bay sambunganna saga tuntut bay panuntut iya eˈ kaimaman alanga maka pagmattoˈahan. 13 Ahˈlling si Pilatu ni iya, yukna, "Halam bahāˈ takalenu panuntut saga aˈa itu ma kaˈa?" 14 Sagōˈ halam anambung si Isa minsan dakabtang, angkan ainu-inu toˈongan gubnul eˈ. 15 Na, kahabaˈ tahun, ma waktu paghinang bangsa Yahudi ma Hinang Paglakad, ya kabiyaksahan gubnul subay aniyaˈ dakayuˈ pilisu pinaluwas, sai-sai pineneˈ eˈ saga Yahudi. 16 Ma waktu inaˈan aniyaˈ dakayuˈ pilisu babantugun, ōnna si Barabbas. 17 Manjari, makapagtimuk paˈin pinaˈan kahekaˈan aˈa, tinilaw sigām eˈ si Pilatu. "Sai kabayaˈanbi," yukna, "subay paluwasku? Si Barabbas atawa si Isa, ya niōnan Al-Masi itu?" 18 Malaingkan kinataˈuwan eˈ gubnul bang ai sababanna angkan si Isa bay tinˈkkahan ni iya. Tuˈud sigām angihid ma si Isa. 19 Aningkōˈ paˈin si Pilatu ma lugal paghukuman, aniyaˈ lapal pinabeyaˈ ni iya eˈ hˈndana. Yuk lapal, "Daˈa ka palamud ni hukuman aˈa aˈadil ilu. Sabab aniyaˈ tauppiku dibuhiˈ pasalanna, sidda aku bay maglimpa-limpa." 20 Manjari baˈanan aˈa inān bay tapogos eˈ kaimaman alanga maka eˈ pagmattoˈahan subay angamuˈ pinaluwas si Barabbas, boˈ si Isa ya sinōˈ pinapatay. 21 Sagōˈ tinilaw sigām pabīng eˈ gubnul eˈ. "Sai ma deyom duwangan pilisu itu," yukna, "subay paluwasku?" "Si Barabbas," yuk sigām. 22 Atilaw si Pilatu ma sigām, yukna, "Inayku bahāˈ si Isa itu, ya niōnan Al-Masi?" "Lansangun iya ni hāg," yuk sigām kamemon. 23 Sagōˈ atilaw giˈ si Pilatu. Yukna, "Ai bay hinangna alaˈat?" Luhūy pakosog pangolang saga aˈa heˈ, yuk-i, "Lansangun iya ni hāg!" 24 Pagtaˈu si Pilatu in katimukan aˈa inān mbal pahawid maka araiˈ na aheya kahiluhalaˈan, magtūy iya angāˈ boheˈ boˈ yampa koseˈanna tanganna ma dahuan sigām, paltandaˈan in iya papuwas min palkalaˈ heˈ. Yukna ni sigām, "Bang paˈin nggaˈi ka min aku bang aˈa itu pinapatay. Min kahinanganbi na." 25 Anambung saga aˈa inān kamemon, yuk-i, "Akuhan kami kamatayna, minsan kami kapellengan sampay ni magsuring-magsaingsing." 26 Sakali si Barabbas ya pinaluwas eˈ si Pilatu tudju ni baˈanan aˈa heˈ. Sagōˈ si Isa pinaraplosan eˈna ma saga sundalu. Pagubus, sinōngan iya ni saga aˈa ya angalansang iya ni hāg. 27 Manjari binowa si Isa eˈ saga sundalu gubnul pehēˈ ni deyom astanaˈ, ati tinimuk iya heˈ dambaˈan sundalu. 28 Nilaˈanan eˈ sigām sˈmmekna boˈ pamajuba ma iya manta keyat saliˈ hantang sultan. 29 Nilangbid isab bahan itingan eˈ sigām, nihinang saliˈ panumping sultan pinatˈnnaˈ ni kōkna. Puwas eˈ pinaˈntanan iya tungkud ma tanganna kowan, boˈ yampa sigām angōk-tuˈut ni dahuanna magtunggīng iya, yuk-i, "Mahaldikaˈ! Mahaldikaˈ! Sultan Yahudi!" 30 Pinagludjaˈan iya eˈ sigām, niāˈ eˈ sigām tungkud bay ma tanganna boˈ pamˈppok kōkna. 31 Na, aubus paˈin kapagtunggīng sigām ma iya, magtūy niurusan manta bay pajubana inān ati pinasˈmmekan iya maka bay sˈmmekna tagnaˈ. Puwas eˈ binowa iya paluwas minnēˈ boˈ nilansang ni hāg pamapatayan iya. 32 Saltaˈ paˈin sigām paluwas min daˈira inān, aniyaˈ talanggal sigām lˈlla min lahat Kirini, ōnna si Simun. Minandahan iya eˈ saga sundalu, sinōˈ ananggung hāg si Isa. 33 Pagtˈkka paˈin sigām ni jadjahan lahat niōnan Golgota, hatina lahat 'Peyaˈ-peyaˈ Kōk', 34 arak pamainum sigām ma si Isa binu-anggul kalamuran tambal apaˈit. Sagōˈ pagˈssana, mbal iya anginum. 35 Aubus paˈin eˈ saga sundalu bay angalansang si Isa ni hāg sampay amatˈngge hāgna, maglegot na sigām boˈ pinagtokoran eˈ sigām sˈmmekna bang sai katˈnnaˈanna. 36 Puwas eˈ aningkōˈ sigām mainaˈan anganjaga. 37 Aniyaˈ sulat panuntut bay pinatˈnnaˈ eˈ sigām ma hāg min diyataˈ kōk si Isa. Yuk sulat eˈ, 'SI ISA, SULTAN BANGSA YAHUDI.' 38 Aniyaˈ isab duwangan mundu pinasambeyaˈ ma si Isa. Nilansang sigām ma hāg, dakayuˈ ma bihing si Isa tampal ni kowan, dakayuˈ tampal ni gibang. 39 Na, pinagudjuˈ na paˈin si Isa eˈ aˈa maglaulabay, pinaghanduk-handukan. 40 "Allā," yuk sigām, "kaˈa iya angalangkat langgal pagkulbanan inān, ati pabangunnu konoˈ pabīng ma deyom tˈllungˈllaw! Angalappasan ka di-nu bang ka bˈnnal Anak Tuhan. Pareyoˈ ka min hāg ilu!" 41 Ya du magpangudjuˈ saga imam alanga maka saga guru saraˈ agama maka saga pagmattoˈahan. 42 "Aˈa itu," yuk sigām, "ataˈu angalappas ma aˈa saddī sagōˈ mbal makalappas di-na. Sultan bangsa Israˈil konoˈ iya! Bang iya gantaˈ makapareyoˈan di-na min hāg, amˈnnal kitam ma iya! 43 Angandol iya ma Tuhan, maka in iya konoˈ Anak Tuhan. Ndaˈta konoˈ bang Tuhan bilahi angalappas iya!" 44 Ya du duwangan mundu bay nilansang pinasambeyaˈ ma si Isa, ameyaˈ-meyaˈ isab angudjuˈ iya. 45 Na, augtu paˈin llaw, taluwaˈ lendom kaluhaˈan lahat eˈ sampay ni lisag tˈllu kohap. 46 Paglisag tˈllu saga, akosog eˈ si Isa angalingan, yukna, "Eli, Eli, lama sabaktani?" Hatina, "Tuhanku, O Tuhanku, angay aku pasagarannu?" 47 Pagkale itu eˈ saga aˈa magtˈnggehan mainaˈan, yuk sigām kaseheˈ, "Angalinganan iya nabi Elija." 48 Magtūy aniyaˈ dakayuˈ aˈa paraiˈ-daiˈ angˈggoman lˈppus ni deyom binu alˈssom boˈ yampa pasagnatna ni tōng kayu-kayu. Arak pamainumna ma si Isa. 49 Sagōˈ maginˈmbal saga aˈa kaseheˈ, yuk-i, "Sagarinbi iya. Ndaˈta lagiˈ bang patuwaˈ nabi Elija angalappas iya." 50 Sakali angolang si Isa pabalik, magtūy abˈkkat napasna. 51 Saruˈun-duˈun du ya kultina bay pangagpang ma deyom langgal pagkulbanan inān ageseˈ duwa min diyataˈna tudju pareyoˈ. Ajogjog deyom dunya, maka magkabilaˈ saga batu lakit. 52 Aniyaˈ isab kakubulan aukab maka aheka saga aˈa sukuˈ Tuhan bay pabungkal, allum pabīng min kamatay sigām. 53 Magluwasan sigām min deyom kubul, jari allum paˈin si Isa pabīng, pasōd sigām ni Awrusalam, ya daˈira Mahasussi. Aheka aˈa isab bay makaˈndaˈ sigām. 54 Tananam paˈin linug maka pakaradjaˈan inān kamemon eˈ kapitan maka saga sundaluna ya bay anganjaga ma kamatay si Isa, magtūy sigām sidda sinōd tāw. Yuk sigām, "Bˈnnal aˈa itu Anak Tuhan!" 55 Aheka isab saga dˈnda bay mainaˈan angˈndaˈ min katahan. Sigām ya bay ameyaˈ paumpig ma si Isa angussap iya, tinagnaˈan ma lahat Jalil lagiˈ. 56 Inaˈan si Mariyam min Magdala, si Mariyam inaˈ si Yakub maka si Yusup, maka hˈnda si Sibidi. 57 Pagabay kohap na, aniyaˈ atˈkka pinaˈan dakayuˈ aˈa dayahan, aˈa min lahat Arimati. Ōnna si Yusup. 58 Na pehēˈ si Yusup itu paˈalop ni si Pilatu angamuˈ patay si Isa. Jari magpanohoˈan si Pilatu inān ni saga sundaluna, sinōˈ niˈndeˈan patay si Isa ni si Yusup. 59 Taˈāˈ paˈin patay, sinaput eˈ si Yusup maka kakanaˈ bahaˈu 60 boˈ yampa palegena ma kubul bay tagamahanna di-na, kubul bahaˈu bay kineheˈan ma deyom batu lakit. Puwas eˈ ginulungan eˈna batu aheya panaplok bowaˈ lowang eˈ boˈ yampa iya alaˈan minnaˈan. 61 Mainaˈan asal si Mariyam aˈa Magdala, maka Mariyam isayna, aningkōˈ ma dahuan kubul inān. 62 Pagkˈllat llaw dakayuˈ, hatina llaw Sabtuˈ, patimuk ni si Pilatu saga kaimaman alanga maka saga Parisi. 63 Yuk sigām ni iya, "Tuwan, taentom kami ya bay lling aˈa putingan inān ma waktu kallumna lagiˈ. Yukna bang taˈabut tˈllungˈllaw min kamatayna in iya allum du pabīng. 64 Angkan kubulna inān subay sohoˈnu nijagahan sakuli-kuli sampay taˈabut katˈllungˈllawna. Kalu pehēˈ saga mulidna anangkaw mayatna boˈ angahaka ni kaseheˈan in iya allum pabīng min kamatayna. Bang gantaˈ buwattēˈ akalap lagiˈ puting sigām damuli min bay dahū." 65 "Na," yuk si Pilatu. "Bowahunbi sundalu pehēˈ ni kubul boˈ pajagahunbi sakuli-kuli." 66 Manjari maglaˈanan na sigām minnēˈ. Aniyaˈ gindan pinikit eˈ sigām ni taplok batu boˈ kinataˈuwan bang aniyaˈ bay angukab iya. Sinōˈ isab saga sundalu anganjaga mainaˈan.
