1 Jari itu, asekot paˈin disi Isa ni daˈira Awrusalam, boˈ ma tongod būd Kayu Jaitun na, taˈabut eˈ sigām kalumaˈan Betpage. Mahēˈ paˈin, sinohoˈ eˈ si Isa duwangan mulidna parahū. 2 Yukna, "Pehēˈ na kam ni kalumaˈan ya ma dahuanbi ilu. Pagtˈkkabi pinaˈan, makabāk du kam kuraˈ maka anakna paengkot mainaˈan. Hubarinbi boˈ bowahunbi piˈitu. 3 Bang aniyaˈ gantaˈ atilaw kaˈam bang angay ngāˈbi, hakaˈinbi buwattitu, yukbi, 'Tuˈud pagguna eˈ nakuraˈ.' Jari pinasagaran du kam magtūy eˈna." 4 Pinaniyaˈ buwattēˈ boˈ magtandaˈ ya bay pinagkallam eˈ dakayuˈ nabi, ya yuk-i, 5 "Hakaˈinbi saga aˈa Awrusalam, Ilu na sultanbi atˈkka ni kaˈam. Areyoˈ pangatayanna, anguraˈ iya ma anak kuraˈ." 6 Na, pehēˈ duwangan mulid eˈ, nihinang eˈ sigā ya bay panohoˈan si Isa. 7 Binowa eˈ sigā kuraˈ maka anakna, nilampikan maka badjuˈ sigā boˈ yampa panguraˈan eˈ si Isa. 8 Anguraˈ paˈin iya, landuˈ aheka aˈa bay amˈllat sˈmmek sigām ma lān palabayanna. Saga aˈa kaseheˈ bay anabulakan pinaˈan saga engas-engas dahunan bay labasan sigām. 9 Manjari baˈanan saga aˈa ya maglˈngnganan min dahuan si Isa, sampay sigām paturul min buliˈanna, magpangolang sama-sama yuk-i, "Mahaldikaˈ ni tubuˈ sultan Daˈud! Bang paˈin binarakatan ya kawakilan eˈ Tuhan piˈitu! Sanglitantam Tuhan Mahatinggi!" 10 Manjari pagtˈkka si Isa ni Awrusalam, ahiluhalaˈ deyom daˈira inān kamemon. Yuk saga aˈa mainaˈan, "Sai bahāˈ aˈa ilu?" 11 Anambung kahekaˈan, yuk sigām, "Si Isa koˈ itu, nabi min Nasaret ma lahat Jalil." 12 Sakali itu pasōd si Isa ni deyom langgal pagkulbanan boˈ yampa pinalaˈan eˈna sasuku maglilitu maka magdagang mainaˈan. Binaliskat eˈna lamisahan saga aˈa magsambiˈan sīn bangsa liyu ni sīn Yahudi. Ya du binaliskat eˈna paningkōˈan saga aˈa magdagang assang pagkulban. 13 Yuk si Isa ni saga aˈa inān, "Tasulat asal ma Kitab Kanabi-nabihan bay pagkallam Tuhan, ya yuk-i, 'Lumaˈku itu niōnan lumaˈ pagsambahayangan saga aˈa.' Sagōˈ tahinangbi na saliˈ lumaˈ patapukan mundu." 14 Mainaˈan lagiˈ si Isa ma deyom langgal, pinaˈan ni iya saga aˈa buta maka aˈa pengkaˈ ati kauliˈan sigām eˈna. 15 Sagōˈ angastol saga kaimaman alanga maka saga guru saraˈ agama, pagˈndaˈ sigām ma hinang si Isa makainu-inu inān, maka pagkale sigām ma saga ondeˈ magpangolang ma deyom langgal, ya yuk-i, "Mahaldikaˈ ni tubuˈ Sultan Daˈud!" 16 Jari ahˈlling saga nakuraˈ inān ni si Isa, yuk sigām, "Takalenu bahāˈ ya pinahˈlling eˈ saga ondeˈ-ondeˈ itu?" "Ahoˈ," yuk si Isa. "Angay? Kilāku halam tabassabi ya tasulat ma Kitab Jabul, ya yuk-i, 'Min kahandaknu saga kamanahutan amudji ōnnu, saga anak duruˈan lagiˈ ananglitan kaˈa.' " 17 Puwas eˈ alaˈan si Isa min sigām boˈ paluwas min daˈira tudju ni kalumaˈan Betani. Pahantiˈ iya mahēˈ dambahangi. 18 Pagkˈllat llaw, ma labayan paˈin si Isa tudju ni Awrusalam pabīng, lingantu iya. 19 Taˈndaˈna dampoˈon kayu igira ma bihing lān, sagōˈ pagpehēˈna, halam aniyaˈ buwaˈ tabākna mainaˈan, luwal dahun. Jari sinapdahan eˈ si Isa kayu inān, yukna, "Puwas minnitu, kayu itu mbal toˈongan magbuwaˈ pabīng." Magtūy alanos kayu inān. 20 Pagˈndaˈ saga mulidna, ainu-inu sigām. "Allā," yuk sigām, "angay kayu igira itu alanos saruˈun-duˈun?" 21 "Na, hakaˈanta kam toˈongan," yuk si Isa, "bang kam angandol toˈongan ma halam aniyaˈ hawal-hawal deyom ataybi, makahinang du kam buwat bay hinangku ma kayu igira itu. Maka nggaˈi ka hal eˈ-i. Minsan būd inān, bang sohoˈbi alaˈan min baina boˈ patˈnnaˈ ni deyom sˈllang, tantu du ameyaˈ. 22 Bang kam angandol, tasambutbi du ai-ai pangamuˈ-ngamuˈbi ni Tuhan." 23 Jari pabīng na si Isa ni deyom langgal pagkulbanan boˈ amanduˈ. Sabuna paˈin amanduˈ, pinaˈan ni iya saga kaimaman alanga maka saga pagmattoˈahan Yahudi. Yuk sigām, "Ai kapatutnu maghinang ka buwattilu? Sai bay amuwanan kaˈa kapatut?" 24 Anambung si Isa, yukna, "Aniyaˈ dakayuˈ patilawku ma kaˈam dahū. Bang itu sambunganbi, hakaˈanta du kam bang ai kapatutku maghinang buwattitu. 25 Ya bay kapatut si Yahiya magpandi saga aˈa, kapatut min Tuhan bahāˈ atawa min manusiyaˈ sadja?" Na, magisun-isun sigām, yuk-i, "Bang saupama yukta in kapatut si Yahiya inān bay min Tuhan, tantu kitam tinilaw eˈna bang angay kitam halam bay magkahagad ma si Yahiya. 26 Sagōˈ bang yukta in kapatut si Yahiya inān min manusiyaˈ sadja, na piligdu kitam. Sabab saga aˈa itu magkahagad kamemon in si Yahiya nabi min Tuhan." 27 Angkan buwattitu ya panambung saga nakuraˈ ma panilaw si Isa, yuk-i, "Mbal kataˈuwan kami." "Na," yuk si Isa, "ya du aku mbal angahakaˈan kaˈam bang minningga ya kapatutku maghinang saga hinang itu." 28 Amissala si Isa, yukna, "Pikilunbi paralilanku itu. Aniyaˈ aˈa duwa anakna lˈlla. Na pehēˈ aˈa itu ni anakna siyaka, yukna, 'Otōˈ, pehēˈ ka llaw ilu maghinang ma kabbun.' 29 Yuk sambung siyaka heˈ, 'Mbal aku.' Saguwāˈ apinda pikilanna ati pehēˈ iya ni kabbun maghinang. 30 Jari pehēˈ aˈa itu ni anakna siyali, anohoˈ iya maghinang buwat bay panohoˈanna ma siyaka. 'Ahoˈ, Mmaˈ,' yuk sambung siyali. Sagōˈ halam iya bay pehēˈ. 31 Na," yuk si Isa ni saga aˈa inān, "bang ma kaˈam, sai ya bay ameyaˈ ma kabayaˈan mmaˈna?" "Ya anak siyaka," yuk sambung sigām. "Hakaˈanta kam toˈongan," yuk si Isa, "saga aˈa dusahan, ya buwat magaˈāˈ sukay parinta maka dˈnda alaˈat, parahū sigām min kaˈam ameyaˈ ma pagparinta Tuhan. 32 Sabab si Yahiya Magpapandi bay piˈilu ni kaˈam amataˈuwan kaˈam bang ingga ya lān abontol, sagōˈ halam iya bay kahagadbi. Malaingkan saga aˈa magāˈ sukay parinta maka saga dˈnda alaˈat, bay magkahagad. Maka minsan taˈndaˈbi inaˈan-i, halam bay apinda pikilanbi boˈ kam magkahagad ma si Yahiya." 33 "Pakale kam ma paralilan dakayuˈ itu," yuk si Isa. "Aniyaˈ dakayuˈ aˈa tag-dapu tanaˈ bay ananom bahan anggul ma kabbunna. Nilikus eˈna maka ād, kinali eˈna lowang pagpˈggaˈan buwaˈ anggul, maka nihinang eˈna pamantawan alanga. Puwas eˈ patungguˈanna kabbun inān ma saga magtutungguˈ, boˈ yampa iya atulak ni lahat saddī. 34 Taˈabut paˈin musim pagpusuˈ buwaˈ anggul, sinohoˈ eˈ tag-dapu kabbun saga sosohoˈanna pehēˈ ni saga magtutungguˈ angāˈ palsukuˈanna. 35 "Sagōˈ pagtˈkka pehēˈ saga sosohoˈan itu, sinaggaw sigām eˈ magtutungguˈ. Dakayuˈ sosohoˈan inān bay niraplosan, dakayuˈ bay pinapatay, dakayuˈ isab bay pinagbantung. 36 Puwas eˈ in tag-dapu bay amapehēˈ saga sosohoˈan saddī, aheka lagiˈ min bay dahū. Ya du sigām bay nilaˈat eˈ saga tungguˈ, buwat bay pangalaˈat sigām ma sosohoˈan tagnaˈ. 37 Na, ma katapusan, bay pinapehēˈ anak tag-dapu, sabab pangannalna, 'Tantu pinagaddatan anakku eˈ saga tungguˈ heˈ.' 38 "Sagōˈ pagˈndaˈ saga tungguˈ ma anak tag-dapu itu, magtūy sigām magisun, yuk-i, 'Ya na koˈ ilu anak tag-dapu. Sūng kitam, papataytam iya boˈ taˈāˈtam tanaˈna.' 39 Manjari sinaggaw eˈ sigām anak tag-dapu. Nijudjalan iya paluwas min likusan, boˈ pinapatay. 40 "Na," yuk si Isa, "bang atˈkka tag-dapu kabbun pehēˈ, ai bahāˈ hinangna ma saga aˈa magtutungguˈ?" 41 Anambung sigām, yuk-i, "Tantu papatayna saga pilliyu inān. Patungguˈanna kabbunna ma aˈa saddī, ya bilahi angˈndeˈan palsukuˈanna bang taˈabut musimna." 42 Yuk si Isa ni sigām, "Halam bahāˈ tabassabi ayat Kitab ya yuk-i, 'Ya batu bay sinulak eˈ aˈa maghinang lumaˈ, ya na batu manjari pamapagon lumaˈ. Hinang Tuhan koˈ inān, landuˈ ahāp ma pangˈndaˈ kami.' 43 "Angkan kam hakaˈanku," yuk si Isa, "nilaˈanan du min kaˈam bay palsukuˈanbi ma deyom pagparintahan Tuhan boˈ pinapinda ni aˈa saddī bangsa. Jari sigām ya amaluwas kahāpan ya tōp ma pagparintahan Tuhan. [ 44 Sasuku ahūg ni batu itu atumu-tumu du baranna. Maka sasuku kahūgan batu itu apipis du kamemonna.]" 45 Pagkale eˈ saga kaimaman alanga maka eˈ saga Parisi ya pamaralil eˈ si Isa itu, magtūy tasayu in sigām ya pinaˈandigan eˈna. 46 Angkan sigām bilahi anaggaw si Isa, sagōˈ halam kalanduˈan. Tināw sigām ma kahekaˈan aˈa inān sabab dī nabi si Isa bang ma bistahan sigām.
